ସଇଁନ୍ତଲା, (ଅଜିତ କୁମାର ସାହୁ) : ମୃତ୍ୟୁ ବି ଏମିତି ଆସେ । ହସ ଖୁସିରେ କାକା ଓ ପୁତୁରା ଗୋଟିଏ ବାଇକରେ ଯାଉଥିବା ବେଳେ ଘଟିଲା ଅଭାବନୀୟ ଘଟଣା । ତେବେ ବଲାଙ୍ଗିର ଜିଲ୍ଲା ମୁରିବାହାଲ ଥାନା ଚଣାବାହାଲ ପଞ୍ଚାୟତର ସୁକୁନାପଦର ଓ ବାଞ୍ଜିପଡ଼ା ଛକ ମଧ୍ୟରେ ଏକ ମର୍ମନ୍ତୁଦ ଦୁର୍ଘଟଣା ଘଟିଛି । ଏଥିରେ ଜଣେ ନାବାଳକଙ୍କ ମୃତ୍ୟୁ ଘଟିଥିବା ବେଳେ ତାଙ୍କ କାକା ଆହତ ହୋଇଛନ୍ତି । ମୃତକ ହେଉଛନ୍ତି ମନୋଜ ମାଝୀ (୧୭) । ତାଙ୍କ କାକାଙ୍କ ନାଁ ବୈଶାଖୁ ମାଝୀ । ସେମାନଙ୍କ ଘର ଘନାମହୁଲ ଗାଁ ବୋଲି ଜଣାପଡିଛି । ସୂଚନା ଅନୁଯାୟୀ, କୁମ୍ଭାରୀ ଗାଁର ସମ୍ପଦ ମାଝୀ କୌଣସି କାମରେ ଘନାମହୁଲ ଗାଁକୁ ଯାଇଥିଲେ । ବୈଶାଖୁ ଓ ମନୋଜ ତାଙ୍କୁ ବାଇକ୍ରେ କୁମ୍ଭାରୀ ଗାଁରେ ଛାଡ଼ି ଫେରୁଥିବା ବେଳେ ଭାରସାମ୍ୟ ହରାଇ ଏକ ଶାଗୁଆନ ଗଛରେ ପିଟି ହୋଇ ଯାଇଥିଲେ । ଫଳରେ ଘଟଣା ସ୍ଥଳରେ ହିଁ ମନୋଜଙ୍କ ମୃତ୍ୟୁ ଘଟିଥିଲା । ତାଙ୍କ କାକା ବୈଶାଖୁ ଆହତ ହୋଇଛନ୍ତି । ଗତ ଦୁଇ ଦିନ ହେଲା ଏ ଅଞ୍ଚଳରେ ଝିପି ଝିପି ବର୍ଷା ଲାଗି ରହିଛି । ବର୍ଷା ଯୋଗୁଁ ଭାରସାମ୍ୟ ହରାଇ ବାଇକ୍ଟି ଗଛରେ ପିଟି ହୋଇଥିଲା ବୋଲି ଜଣାପଡ଼ିଛି । କଣ୍ଟାବାଞ୍ଜି ହସ୍ପିଟାଲ୍ରେ ଶବ ବ୍ୟବଚ୍ଛେଦ ପରେ ମୁରିବାହାଲ ପୁଲିସ୍ ମୃତଦେହକୁ ପରିବାର ଲୋକଙ୍କୁ ହସ୍ତାନ୍ତର କରିବା ସହିତ ଘଟଣାର ତଦନ୍ତ କରୁଥିବା ଜଣାପଡ଼ିଛି ।