ବଲାଙ୍ଗିର, (କେପିଏନ୍ଏସ୍) : ବଲାଙ୍ଗିରର ପ୍ରମୁଖ ସାମାଜିକ ସଂଗଠନ ସହଯୋଗ ଫାଉଣ୍ଡେସନ ଦ୍ୱାରା ପିତୃପକ୍ଷ ଭୋଜନ ସେବାର କାର୍ଯ୍ୟକ୍ରମ ସମାପ୍ତ ହୋଇଛି । ଏହି କାର୍ଯ୍ୟକ୍ରମ ୭ ସେପ୍ଟେମ୍ବରରୁ ଆରମ୍ଭ ହୋଇ ୧୫ ଦିନ ଧରି ଅବିରତ ଚାଲିଥିଲା । ପ୍ରତିଦିନ ଜିଲ୍ଲା ମୁଖ୍ୟାଳୟ ହସ୍ପିଟାଲରେ ରୁଟି, ତରକାରୀ, ଫଳ ଓ ମିଠା ପ୍ରାୟ ୭୦୦ରୁ ଅଧିକ ଲୋକଙ୍କୁ ବଣ୍ଟନ କରାଯାଇଥିଲା । ହିନ୍ଦୁ ସଂସ୍କୃତିରେ ପିତୃପକ୍ଷକୁ ଅତ୍ୟନ୍ତ ପବିତ୍ର ବୋଲି ଧରାଯାଏ । ଏହା ପୂର୍ବଜଙ୍କ ପ୍ରତି କୃତଜ୍ଞତା ଓ ସ୍ମରଣର ସମୟ । ଏହି ସମୟରେ ଦରିଦ୍ର ଓ ଜରୁରୀ ଲୋକଙ୍କୁ ଭୋଜନ କରାଇବାକୁ ଶ୍ରେଷ୍ଠ ପୂଣ୍ୟ କାମ ମନାଯାଏ । ସହଯୋଗ ଫାଉଣ୍ଡେସନ ଏହି ପାରମ୍ପରିକତାକୁ ପାଳନ କରି ୧୫ ଦିନ ଧରି ନିରନ୍ତର ପିତୃପକ୍ଷ ଭୋଜନ ସେବା କରିଥିଲା । ପିଛଲା ୩ ବର୍ଷ ଧରି ସହଯୋଗ ଫାଉଣ୍ଡେସନ ପ୍ରତି ରବିବାରରେ ଦିନରେ ୪୦୦ ଓ ରାତିରେ ୭୦୦ରୁ ଅଧିକ ଲୋକଙ୍କୁ ଭୋଜନ ସରକାରୀ ହସ୍ପିଟାଲରେ ବଣ୍ଟନ କରୁଛି । ତା’ ସହିତ ଆମ୍ବୁଲାନ୍ସ ସେବା, ରକ୍ତଦାନ, ବସ୍ତ୍ରଦାନ, ପୁସ୍ତକ ଦାନ, ସ୍ୱାସ୍ଥ୍ୟ ଶିବିର, ଯୋଗ, ଧ୍ୟାନ, ଗଛ ଲଗାଣ, ଅକ୍ସିଜେନ୍ ସେବା ପରି ବିଭିନ୍ନ ସେବାକାର୍ଯ୍ୟ ମଧ୍ୟ କରୁଛନ୍ତି । ଏହି ପିତୃପକ୍ଷ ଭୋଜନ ସେବା ପବିତ୍ର କାର୍ଯ୍ୟରେ କିଛି ବିଶିଷ୍ଟ ଅତିଥିମାନେ ଯୋଗ ଦେଇଥିଲେ । ସେମାନେ ହେଲେ ସୁଷମା ମହାପାତ୍ର (ଡ଼ିଏସ୍ଡବ୍ଲୁଓ), ମନୋରଞ୍ଜନ ଯୋଷୀ, ପବିତ୍ର ବେହେରା (ଏଡ଼ିଏମ୍), ଆଲୋକ କୁମାର ପଟେଲ (ସବ୍ କଲେକ୍ଟର ବଲାଙ୍ଗିର), ସରୋଜ କୁମାର ଉପାଧ୍ୟାୟ (ଏସ୍ଡ଼ିପିଓ, ସଦର ପୋଲିସ) ଏବଂ କମଳ କୁମାର ପଣ୍ଡା । ସମସ୍ତ ଅତିଥି ସହଯୋଗ ଫାଉଣ୍ଡେସନର ଏହି କାର୍ଯ୍ୟକ୍ରମକୁ ବହୁତ ପ୍ରଶଂସା କରିଥିଲେ ।
Next Post