ପଦ୍ମପୁର, (ନିରୋଜ କୁମାର ପାଣୀ) : ପଦ୍ମପୁର ଉପଜିଲ୍ଲାପାଳଙ୍କ କାର୍ଯ୍ୟାଳୟରେ ଆଜି ବରିଷ୍ଠ ରାଜସ୍ୱ ସହାୟକ ଆକବର ହୁସେନଙ୍କୁ ଅବସରକାଳୀନ ସମ୍ବର୍ଦ୍ଧନା ଜ୍ଞାପନ କରାଯାଇଛି । ଏଥିପାଇଁ ଅନୁଷ୍ଠିତ ସମ୍ବର୍ଦ୍ଧନା ସଭାରେ କାର୍ଯ୍ୟାଳୟର ସମସ୍ତ କର୍ମଚାରୀ ଶ୍ରୀ ହୁସେନଙ୍କ ସହ ଚାକିରି ଜୀବନର ଅନେକ ମଧୂର ଅନୁଭୂତିକୁ ମନେ ପକାଇ ତାଙ୍କର ଅନେକ ସୁଗୁଣ ସବୁର ସ୍ମୃତି ଚାରଣ କରିଥିଲେ । ଉପଜିଲ୍ଲାପାଳ ଆଲୋକ ପଟେଲ ନିଜର ବକ୍ତବ୍ୟ ରଖି ଶ୍ରୀ ହୁସେନଙ୍କ ଅବସର ପରବର୍ତ୍ତୀ ଜୀବନ ପାଇଁ ସୁଖ, ଶାନ୍ତି ଓ ଉତ୍ତମ ସ୍ୱାସ୍ଥ୍ୟର କାମନା କରିଥିଲେ । ଏହି ଅବସରରେ ସହକାରୀ ଜିଲ୍ଲାପାଳ ମନୋରଂଜନ ନାୟକ, ଏସିଏସ୍ଓ ସନ୍ତୋଷ ପ୍ରଧାନ, ତୁଷାର ପ୍ରଧାନ, ଅଜିତ ରାୟ ଓ ଅନ୍ୟ କର୍ମଚାରୀ ବୃନ୍ଦ ମଧ୍ୟ ଶ୍ରୀ ହୁସେନଙ୍କୁ କୃତଜ୍ଞତା ଜଣାଇ ତାଙ୍କ ଅବସରକାଳୀନ ଦୀର୍ଘ ଓ ନିରାମୟ ଜୀବନର ଶୁଭେଚ୍ଛା ଜଣାଇଥିଲେ । ଏହି ସଭାକୁ ଉପଖଣ୍ଡ ସୂଚନା ଓ ଲୋକସମ୍ପର୍କ ଅଧିକାରୀ ବିନାୟକ ମିଶ୍ର ପରିଚାଳନା କରି ଶ୍ରୀ ହୁସେନଙ୍କୁ ସମଗ୍ର ପଦ୍ମପୁର ଉପଖଣ୍ଡ ପ୍ରଶାସନ ଓ ଓଡ଼ିଶା ସରକାରଙ୍କ ତରଫରୁ କୃତଜ୍ଞତା ଜଣାଇଥିଲେ ଓ ମଂଗଳମୟ ଜୀବନର କାମନା କରିଥିଲେ । ସଭା ଶେଷରେ ଉପଜିଲ୍ଲାପାଳ ଶ୍ରୀ ପଟେଲ, ଅନ୍ୟ ଅଧିକାରୀ ଓ କର୍ମଚାରୀ ମିଳିତ ଭାବରେ ଆକବର ହୁସେନଙ୍କୁ ପୁଷ୍ପଗୁଚ୍ଛ, ଉପଢୌକନ ଓ ଅନ୍ୟ ଉପହାର ସବୁ ଦେଇ ସମ୍ମାନିତ କରିଥିଲେ ।