ଓଡ଼ିଶା ସମେତ ୫ ରାଜ୍ୟର ୫୪ ଏକଲବ୍ୟ ଆଦର୍ଶ ଆବାସିକ ବିଦ୍ୟାଳୟ ପାଇଁ ‘ଆମାଜନ ଫ୍ୟୁଚର ଇଞ୍ଜିନିୟର ପ୍ରୋଗ୍ରାମ’ର ଦ୍ୱିତୀୟ ପର୍ଯ୍ୟାୟ ଆରମ୍ଭ

• ଆମାଜନ ଇଣ୍ଡିଆ ଏବଂ ଲର୍ଣ୍ଣିଂ ଲିଙ୍କସ୍ ଫାଉଣ୍ଡେସନ୍ ସହଯୋଗରେ ଆଦିବାସୀ ବ୍ୟାପାର ମନ୍ତ୍ରଣାଳୟ ଅଧୀନ ଏନଇଏସଟିଏସ୍ ଆରମ୍ଭ
• ଏହି ପଦକ୍ଷେପ ଆଦିବାସୀ ସମ୍ପ୍ରଦାୟମାନଙ୍କ ମଧ୍ୟରେ ଥିବା ଶିକ୍ଷାଗତ ବ୍ୟବଧାନକୁ ଦୂର କରିବା, ଉଦୀୟମାନ ପ୍ରଯୁକ୍ତିବିଦ୍ୟାରେ ସେମାନଙ୍କ ସଫଳ କ୍ୟାରିୟର ସୁନିଶ୍ଚିତ କରିବାର କ୍ଷମତା ରଖିଛି: କେନ୍ଦ୍ରମନ୍ତ୍ରୀ ଅର୍ଜୁନ ମୁଣ୍ଡା
• କାର୍ଯ୍ୟକ୍ରମର ଦ୍ୱିତୀୟ ପର୍ଯ୍ୟାୟରେ ୫୪ଟି ଏକଲବ୍ୟ ଆଦର୍ଶ ଆବାସିକ ବିଦ୍ୟାଳୟରେ ଏଆଇ ପାଠ୍ୟକ୍ରମ ସାମିଲ; ସେପ୍ଟେମ୍ବର ୨୫ରୁ ୨୭ ପର୍ଯ୍ୟନ୍ତ ଏକଲବ୍ୟ ବିଦ୍ୟାଳୟ ଶିକ୍ଷକଙ୍କ ପାଇଁ ପ୍ରଶିକ୍ଷଣ କର୍ମଶାଳା ଅନୁଷ୍ଠିତ
• ଗତ ଶିକ୍ଷାବର୍ଷରେ ଏକଲବ୍ୟ ବିଦ୍ୟାଳୟ ଶ୍ରେଷ୍ଠ ୨୦ଟି କୋଡିଂ ପ୍ରକଳ୍ପର ପ୍ରଦର୍ଶନୀ ଇଏମଆରଏସ କୋଡର୍ସ ଏକ୍ସପୋ ମଧ୍ୟ ଉଦଘାଟିତ

ଦିଲ୍ଲୀ, (ପିଆଇବି) : କେନ୍ଦ୍ର ଆଦିବାସୀ ବ୍ୟାପାର ମନ୍ତ୍ରଣାଳୟ ଅଧୀନ ଜାତୀୟ ଆଦିବାସୀ ଛାତ୍ର ସୋସାଇଟୀ (ଏନଇଏସଟିଏସ୍) ଆନ୍ଧ୍ରପ୍ରଦେଶ, ଗୁଜରାଟ, ମଧ୍ୟପ୍ରଦେଶ, ଓଡ଼ିଶା, ରାଜସ୍ଥାନ ଏବଂ ତେଲଙ୍ଗାନାରେ ଥିବା ୫୪ଟି ଏକଲବ୍ୟ ମଡେଲ ଆବାସିକ ବିଦ୍ୟାଳୟ (ଇଏମଆରଏସ)ରେ ‘ଆମାଜନ ଫ୍ୟୁଚର ଇଞ୍ଜିନିୟର ପ୍ରୋଗ୍ରାମ’ର ଦ୍ୱିତୀୟ ପର୍ଯ୍ୟାୟ ଆରମ୍ଭ କରିଛି। ଦ୍ୱିତୀୟ ପର୍ଯ୍ୟାୟରେ ଆଡଭାନ୍ସ ବ୍ଲକ ପ୍ରୋଗ୍ରାମିଂ ଓ ଆର୍ଟିଫିସିଆଲ ଇଣ୍ଟେଲିଜେନ୍ସ ପାଠ୍ୟକ୍ରମ ଅନ୍ତର୍ଭୁକ୍ତ ହେବ। ଆଦିବାସୀ ବ୍ୟାପାର ସଚିବ ଅନିଲ କୁମାର ଝା ଆଜି ନୂଆଦିଲ୍ଲୀଠାରେ ତିନିଦିନିଆ ଶିକ୍ଷକ ପ୍ରଶିକ୍ଷଣ କର୍ମଶାଳା ତଥା ଇଏମଆରଏସ କୋଡର୍ସ ଏକ୍ସପୋକୁ ଉଦଘାଟନ କରିଛନ୍ତି ଯାହାକି ଗତ ଶିକ୍ଷାବର୍ଷରେ ଇଏମଆରଏସର ଶ୍ରେଷ୍ଠ ୨୦ଟି କୋଡିଂ ପ୍ରକଳ୍ପର ଏକ ପ୍ରଦର୍ଶନୀ।
ପୂର୍ବ ବର୍ଷର କାର୍ଯ୍ୟକାରିତାର ଉତ୍ସାହଜନକ ଫଳାଫଳ ଆଧାରରେ ସଂଶୋଧିତ ମଡ୍ୟୁଲରେ ଏକ ନିର୍ଦ୍ଦିଷ୍ଟ କୋଡିଂ ଏବଂ ଆର୍ଟିଫିସିଆଲ ଇଣ୍ଟେଲିଜେନ୍ସ (ଏଆଇ) ସମ୍ବନ୍ଧୀୟ ପାଠ୍ୟକ୍ରମ ପ୍ରଚଳନ କରାଯିବ ଯାହା ସିବିଏସଇ ଦକ୍ଷତା ଶିକ୍ଷା ସହିତ ସମାନ । ଏହା କୋଡିଂ, ଲଜିକାଲ ସିକ୍ୱେନ୍ସିଂ, ଲର୍ଣ୍ଣିଂ ଲୁପ୍ ଏବଂ ବ୍ଲକ ପ୍ରୋଗ୍ରାମିଂରେ ପ୍ରଚଳିତ ପାଠ୍ୟକ୍ରମ ଅତିରିକ୍ତ ପ୍ରଦାନ କରାଯିବ । କମ୍ପ୍ୟୁଟର ବିଜ୍ଞାନର ସାମ୍ପ୍ରତିକ ଅଭିଜ୍ଞତା ଓ ଆଦିବାସୀ ଛାତ୍ରଛାତ୍ରୀଙ୍କ କୋଡିଂକୁ ଦୃଷ୍ଟିରେ ରଖି ୨୦ ଘଣ୍ଟିଆ ମଡ୍ୟୁଲ୍ ନିର୍ମାଣ କରାଯାଇଛି। ଷଷ୍ଠ ଶ୍ରେଣୀ ଛାତ୍ରଛାତ୍ରୀଙ୍କୁ କମ୍ପ୍ୟୁଟର ବିଜ୍ଞାନର ମୌଳିକ ଶିକ୍ଷା ଦିଆଯିବ । ସପ୍ତମ ଶ୍ରେଣୀ ଛାତ୍ରଛାତ୍ରୀଙ୍କୁ ଭିଜୁଆଲ ପ୍ରୋଗ୍ରାମିଂର ଉନ୍ନତ ଧାରଣା ବିଷୟରେ ଅବଗତ କରାଯିବ। ଅଷ୍ଟମ ଶ୍ରେଣୀ ପାଇଁ ଏଆଇ ର ଏକ ଇଣ୍ଟରଆକ୍ଟିଭ୍ ଅଧିବେଶନ ହେବ; ଏବଂ ନବମ ଶ୍ରେଣୀ ଏଆଇର ମୌଳିକ ତାଲିମ ଶିଖିବ । ଦଶମ ଶ୍ରେଣୀ ପାଇଁ ସିବିଏସଇ ଦକ୍ଷତା ପାଠ୍ୟକ୍ରମ ଅନୁଯାୟୀ ଏଆଇ ମଡ୍ୟୁଲ୍ ୨୦୨୪-୨୫ ଶିକ୍ଷାବର୍ଷରେ ଆରମ୍ଭ ହେବ।
କେନ୍ଦ୍ର ଆଦିବାସୀ ବ୍ୟାପାର ମନ୍ତ୍ରୀ ଶ୍ରୀ ଅର୍ଜୁନ ମୁଣ୍ଡା ଏହି କାର୍ଯ୍ୟକ୍ରମର ପାଇଲଟ୍ ପର୍ଯ୍ୟାୟର ଶୁଭାରମ୍ଭ କରି କହିଛନ୍ତି, ଭବିଷ୍ୟତ ପିଢ଼ି ଯେପରି ଡିଜିଟାଲ୍ ସୁଯୋଗର ଫାଇଦା ଉଠାଇବା ପାଇଁ ଭଲ ଭାବେ ପ୍ରସ୍ତୁତ ହୋଇପାରିବେ ସେ ଦିଗରେ ଆମାଜନ ଫ୍ୟୁଚର ଇଞ୍ଜିନିୟର ପ୍ରୋଗ୍ରାମ ଏକ ବଡ଼ ପଦକ୍ଷେପ। ଆମାଜନ ଫ୍ୟୁଚର ଇଞ୍ଜିନିୟର ପ୍ରୋଗ୍ରାମ ଏବଂ ଏନଇଟିଏସ ମଧ୍ୟରେ ସହଯୋଗ ଆଦିବାସୀ ସମ୍ପ୍ରଦାୟ ମଧ୍ୟରେ ଥିବା ଶିକ୍ଷାଗତ ବ୍ୟବଧାନକୁ ଦୂର କରିବାର କ୍ଷମତା ରଖିଛି, ଯାହା ଉଦୀୟମାନ ଜ୍ଞାନକୌଶଳରେ ସେମାନଙ୍କର ସଫଳ କ୍ୟାରିୟରସୁନିଶ୍ଚିତ କରିବ ।”
କାର୍ଯ୍ୟକ୍ରମକୁ ସମ୍ବୋଧିତ କରି ଆଦିବାସୀ ବ୍ୟାପାର ସଚିବ ଶ୍ରୀ ଅନୀଲ କୁମାର ଝା କହିଥିଲେ ଯେ ଭାରତରେ ୧୦ କୋଟିରୁ ଅଧିକ ଆଦିବାସୀ ଜନସଂଖ୍ୟା ରହିଛି, ଯେଉଁମାନେ ଅନେକ କ୍ଷେତ୍ରରେ ଆଧୁନିକ ଶିକ୍ଷା ପାଇବା ପାଇଁ ଭାଷା ଏବଂ ସାଂସ୍କୃତିକ ପ୍ରତିବନ୍ଧକର ସମ୍ମୁଖୀନ ହେଉଛନ୍ତି। ଶିକ୍ଷାଦାନରେ ଥିବା ଏହି ପ୍ରତିବନ୍ଧକଗୁଡ଼ିକୁ ଦୂର କରିବା ଆଦିବାସୀ ଛାତ୍ରଛାତ୍ରୀଙ୍କ ଶିକ୍ଷଣ ପ୍ରକ୍ରିୟାରେ ଉନ୍ନତି ଆଣିବାରେ ସହାୟକ ହେବ। ସେ କହିଥିଲେ ଯେ ସେମାନଙ୍କର ସ୍ଥାନୀୟ ଭାଷାରେ ଶିକ୍ଷକମାନଙ୍କ ଦକ୍ଷତା ବୃଦ୍ଧି, ବିଶେଷକରି ଭାରତର ଆଦିବାସୀ ସମ୍ପ୍ରଦାୟମାନଙ୍କ ପାଇଁ ଅତ୍ୟନ୍ତ ଉନ୍ନତ ପଦ୍ଧତିରେ ପାଠ୍ୟକ୍ରମ ପ୍ରଦାନ କରିବା ଏବଂ ଆଦିବାସୀ ଛାତ୍ରଛାତ୍ରୀଙ୍କୁ ବୈଷୟିକ ଜ୍ଞାନକୌଶଳରେ ଉନ୍ନତ ବିଶ୍ୱରେ ପ୍ରତିଦ୍ୱନ୍ଦ୍ୱିତା କରିବାକୁ ପ୍ରସ୍ତୁତ କରିବାକୁ ସଶକ୍ତ କରିବ । ଏହି କାର୍ଯ୍ୟକ୍ରମରେ ଅଂଶଗ୍ରହଣ କରିବା ପାଇଁ ଛାତ୍ରଛାତ୍ରୀଙ୍କୁ ଉତ୍ସାହିତ କରିବା ସହ କୋଡିଂ ଓ ଏଆଇର ମୌଳିକ ଶିକ୍ଷା ଗ୍ରହଣ କରିବାକୁ ଶ୍ରୀ ଝା ଇଏମଆରଏସ ଶିକ୍ଷକମାନଙ୍କୁ ଆହ୍ୱାନ କରିଥିଲେ। ଏହି ଅବସରରେ ସେ ଶ୍ରେଷ୍ଠ ୩ ଜଣ ଶିକ୍ଷକ ଓ ଛାତ୍ରଛାତ୍ରୀଙ୍କୁ ସମ୍ବର୍ଦ୍ଧିତ କରିଥିଲେ।
ଆମାଜନ ଇଣ୍ଡିଆ ଆଣ୍ଡ ଲର୍ଣ୍ଣିଂ ଲିଙ୍କସ୍ ଫାଉଣ୍ଡେସନ (ଏଲଏଲଏଫ)ର ମିଳିତ ସହଯୋଗରେ ଗତବର୍ଷ ଆରମ୍ଭ ହୋଇଥିବା ଏହି ପାଇଲଟ୍ ପର୍ଯ୍ୟାୟରେ ଷଷ୍ଠରୁ ଅଷ୍ଟମ ଶ୍ରେଣୀ ପର୍ଯ୍ୟନ୍ତ ୭ ହଜାରରୁ ଅଧିକ ଛାତ୍ରଛାତ୍ରୀଙ୍କୁ କମ୍ପ୍ୟୁଟର ବିଜ୍ଞାନ ଓ ବ୍ଲକ ପ୍ରୋଗ୍ରାମିଂ ମଡ୍ୟୁଲର ମୌଳିକ ତାଲିମ ଦିଆଯାଇଛି। ଦିନକୁ ଦିନ ବଢୁଥିବା ବୈଷୟିକ ଦୃଶ୍ୟପଟ ପାଇଁ ଆଦିବାସୀ ଛାତ୍ରଛାତ୍ରୀଙ୍କୁ ପ୍ରସ୍ତୁତ କରିବା ପାଇଁ ଶିକ୍ଷକମାନଙ୍କୁ ସଠିକ ଜ୍ଞାନ ଓ ସମ୍ବଳ ସହିତ ପ୍ରଶିକ୍ଷିତ କରିବା ଜରୁରୀ । ପ୍ରଥମ ପର୍ଯ୍ୟାୟରେ ୫୦ରୁ ଅଧିକ ଶିକ୍ଷକଙ୍କୁ ୨ ଦିନିଆ ଦକ୍ଷତା ବିକାଶ କର୍ମଶାଳା ମାଧ୍ୟମରେ ପ୍ରଶିକ୍ଷଣ ଦିଆଯିବା ପରେ ସମୟକ୍ରମେ ଭର୍ଚୁଆଲ୍ ଅଧିବେଶନ ଅନୁଷ୍ଠିତ ହୋଇଥିଲା। (ପ୍ରଥମ ପର୍ଯ୍ୟାୟ ଶୁଭାରମ୍ଭ-https://pib.gov.in/PressReleasePage.aspx?PRID=1887065)
ଆଜିର କାର୍ଯ୍ୟକ୍ରମରେ ଆମାଜନ ଇଣ୍ଡିଆର ପବ୍ଲିକ ପଲିସି (ଗ୍ରାହକ ବିଶ୍ୱାସ) ମୁଖ୍ୟ ନୀତିନ ସାଲୁଜା, ଲର୍ଣ୍ଣିଂ ଲିଙ୍କସ୍ ଫାଉଣ୍ଡେସନର ପରିଚାଳନା ସହଯୋଗୀ ନୁରିଆ ଅନସାରୀ ଓ ଅନ୍ୟମାନେ ଉପସ୍ଥିତ ଥିଲେ ।