ଲୋଇସିଂହା, (ବିମଳେନ୍ଦୁ ସାହୁ) : ରାଜ୍ୟ ବାହାରକୁ ଗଞ୍ଜେଇ ଚୋରା ଚାଲାଣ ହେଉଥିବା ବେଳେ ଲୋଇସିଂହା ଅବକାରୀ ବିଭାଗ ହାତରେ ଗଞ୍ଜେଇ ଚାଲାଣକାରୀମାନେ ଧରାପଡିଛନ୍ତି । ଅଭିଯୁକ୍ତମାନେ ହେଲେ ଜାମୁଟ ଗ୍ରାମର ଦେବେନ୍ଦ୍ର ସାହୁ, ସିଦ୍ଧେଶ୍ୱର ସାହୁ ଓ ବିହାର ରାଜ୍ୟର ସଲିମ ରିୟାଉଦ୍ଦିନ ଅଲି । ଏକ କାର (ନଂ-ଓଡ଼ି ୦୫ ଏଡି ୬୬୬୬) ଯୋଗେ ଦୁଇଗୋଟି ବସ୍ତାରେ ପ୍ରାୟ ୨୧ କେଜି ଗଞ୍ଜେଇ ବିହାରକୁ ଚାଲାଣ ହେଉଥିବା ବେଳେ ନିକଟସ୍ଥ ବୁର୍ଡାଛକଠାରେ ଅବକାରୀ ବିଭାଗ ଏସ୍ଆଇ ଜଗନ୍ନାଥ ମିଶ୍ରଙ୍କ ନେତୃତ୍ୱରେ ଏକ ଟିମ୍ ଚଢ଼ାଉ କରି ଅଭିଯୁକ୍ତମାନଙ୍କୁ କାବୁ କରିଥିଲେ । ସେମାନଙ୍କ ଠାରୁ କାର ସମେତ ଗଞ୍ଜେଇ ଜବତ କରାଯିବା ସହିତ କୋର୍ଟ ଚାଲାଣ କରାଯାଇଥିବା ଅବକାରୀ ବିଭାଗ ସୂତ୍ରରୁ ଜଣାଯାଇଛି ।