ଟିଟିଲାଗଡ଼, (ସଂଜୟ କୁମାର ନାୟକ) : ଟିଟିଲାଗଡ ପୌରପରିଷଦ ୱାର୍ଡ ନମ୍ବର ୧୨ ଅନ୍ତର୍ଗତ ଝ।ଙ୍କରପଡ଼ାରେ ରହୁଥିବା ଜଣେ ରେଳ ବିଭାଗ କର୍ମଚାରୀଙ୍କ ପରିବାରର ନିହାର ରଞ୍ଜନ ବେହେରା ନିଟ୍ ପରୀକ୍ଷାରେ ସଫଳତା ହାସଲ କରିଛନ୍ତି । ମା’ ପ୍ରେମଲତା ବେହେରା ଜଣେ ଗୃହିଣୀ, ବାପା ଜଣେ ମେଲ ଏକ୍ସପ୍ରେସର ଲୋକୋ ପାଇଲଟ ଯୁଧିଷ୍ଠିର ବେହେରା । ତାଙ୍କର ଗୋଟିଏ ଝିଅ ଏବଂ ଗୋଟିଏ ପୁଅ । ପୁଅ ନିହାର ରଞ୍ଜନ ବେହେରା ଚଳିତ ବର୍ଷ ନିଟ୍ ଏନ୍ଟ୍ରାନ୍ସ ପରୀକ୍ଷାରେ ୭୨୦ ମାର୍କରୁ ୬୫୫ ମାର୍କ ରଖି ଅଲ୍ ଇଣ୍ଡିଆ ରେଙ୍କ ୫୭୯୭ ହାସଲ କରିଛନ୍ତି । ଏହି ଖବର ପ୍ରଚାରିତ ହେବା ପରେ ସହରବାସୀ ତଥା ଶୁଭେଚ୍ଛୁଙ୍କ ପକ୍ଷରୁ ଶୁଭେଚ୍ଛାର ସୁଅ ଛୁଟିଛି ନିହାରଙ୍କ ପାଇଁ । ନିହାର ଟିଟିଲାଗଡ ପ୍ରଭାବତୀ ପବ୍ଲିକ ସ୍କୁଲରେ ପାଠ ପଢି ଦଶମ ଶ୍ରେଣୀରେ ୮୫ ପ୍ରତିଶତ ମାର୍କ ରଖି ଯୁକ୍ତ ଦୁଇ ପଢ଼ିବା ପାଇଁ ଭୁବନେଶ୍ୱର ସ୍ଥିତ ଏଲ୍ଏନ୍ ଇନଷ୍ଟିଚ୍ୟୁଟରେ ନାମ ଲେଖାଇଥିଲେ । ସେଠାରେ ପଢି ପରୀକ୍ଷାରେ ୯୦ ପ୍ରତିଶତ ମାର୍କ ରଖିଥିଲେ । ଚଳିତ ବର୍ଷ ନିଟ୍ ଏନ୍ଟ୍ରାନ୍ସରେ ସଫଳତା ହାସଲ କରି ଟିଟିଲାଗଡ ସହର ପାଇଁ ଗୌରବ ଆଣି ଦେଇଛନ୍ତି । ମା, ବାପାଙ୍କ ଇଛା ଥିଲା ବଡ଼ ହୋଇ ନିହାର ଜଣେ ଭଲ ଡାକ୍ତର ହୁଅନ୍ତୁ । ନିହାର ଛୋଟ ବେଳୁ ବକ୍ତୃତା, ପ୍ରବନ୍ଧ, ସାଧାରଣ ଜ୍ଞାନ ପ୍ରତିଯୋଗିତାରେ ବହୁତ ପୁରସ୍କାର ପାଇଥିବା ବେଳେ ବେଡମିଣ୍ଟନ ଖେଳରେ ଉପଖଣ୍ଡ ସ୍ତରୀୟ ଠୁ ରାଜ୍ୟ ସ୍ତରୀୟ ପ୍ରତିଯୋଗିତାରେ ଅଂଶ ଗ୍ରହଣ କରିଥିଲେ । ଆଗକୁ ଜଣେ ଭଲ ନ୍ୟୁରୋ ସର୍ଜନ ଡାକ୍ତର ହେବାର ଲକ୍ଷ୍ୟ ରଖିଛନ୍ତି ନିହାର ।