ଛତିଶଗଡର ଜଗଦଲପୁର ଠାରେ କେନ୍ଦ୍ରୀୟ ରିଜର୍ଭ ପୁଲିସ୍ ବଳ (ସିଆରପିଏଫ୍)ର ୮୪ ତମ ସ୍ଥାପନା ଦିବସ ଉତ୍ସବରେ ମୁଖ୍ୟ ଅତିଥି ଭାବରେ ଯୋଗ ଦେଲେ କେନ୍ଦ୍ର ଗୃହ ତଥା ସମବାୟ ମନ୍ତ୍ରୀ ଅମିତ ଶାହ
- ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱରେ ସୁରକ୍ଷା ବାହିନୀ ଗତ ୯ ବର୍ଷ ଧରି ବାମପନ୍ଥୀ ଉଗ୍ରବାଦ ବିରୋଧରେ ଦୃଢ଼ ଭାବରେ ଲଢ଼ି ନିର୍ଣ୍ଣାୟକ ବିଜୟ ହାସଲ କରିଛି
- ବାମପନ୍ଥୀ ଉଗ୍ରବାଦୀର କେନ୍ଦ୍ରସ୍ଥଳ ଛତିଶଗଡର ବସ୍ତର ଠାରେ ସିଆରପିଏଫ୍ ପ୍ରଥମ ଥର ପାଇଁ ଏହାର ସ୍ଥାପନା ଦିବସ ପ୍ୟାରେଡ ଆୟୋଜନ କରୁଛି ଏବଂ ଏହା ସମଗ୍ର ଦେଶ ପାଇଁ ଗର୍ବର ବିଷୟ ଅଟେ
- ଦେଶରେ ଆଭ୍ୟନ୍ତରୀଣ ସୁରକ୍ଷା ଏବଂ ଶାନ୍ତି ପାଇଁ ସିଆରପିଏଫ୍ ଯବାନମାନଙ୍କ ଉପରେ ଲୋକ ମାନଙ୍କର ସମ୍ପୂର୍ଣ୍ଣ ବିଶ୍ୱାସ ରହିଛି, ଯାହା ସେମାନଙ୍କର ସାହସ ଏବଂ ବୀରତ୍ୱ ଯୋଗୁଁ ସୃଷ୍ଟି ହୋଇଛି
ବାମପନ୍ଥୀ ଉଗ୍ରବାଦ ପ୍ରଭାବିତ ଅଞ୍ଚଳ, ଜାମ୍ମୁ ଏବଂ କାଶ୍ମୀର ଏବଂ ଉତ୍ତର ପୂର୍ବ ଅଂଚଳରେ ଶାନ୍ତି ଫେରାଇ ଆଣିବାରେ ସିଆରପିଏଫ୍ ବହୁତ ପ୍ରଶଂସନୀୟ ଭୂମିକା ଗ୍ରହଣ କରିଛି - ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱରେ ବାମପନ୍ଥୀ ଉଗ୍ରବାଦ ପ୍ରଭାବିତ ଅଞ୍ଚଳରେ ହିଂସାର ପରିମାଣ ହ୍ରାସ ପାଇଛି ଏବଂ ଏହି କ୍ଷେତ୍ରରେ ବିକାଶ ବର୍ତ୍ତମାନ ଶେଷ ବ୍ୟକ୍ତିଙ୍କ ନିକଟରେ ପହଞ୍ଚିଛି
ଅନେକ ଦଶନ୍ଧି ଧରି ବାମପନ୍ଥୀ ଉଗ୍ରବାଦର ଗଡ଼ ଥିବା ବିହାର ଏବଂ ଝାଡଖଣ୍ଡର ବୁଢ଼ା ପାହାଡ, ଚକରବନ୍ଧ ଏବଂ ପାରଶନାଥ ଅଞ୍ଚଳକୁ ବର୍ତ୍ତମାନ ଏଲ୍ଡବ୍ଲ୍ୟୁଇରୁ ମୁକ୍ତ କରାଯାଇଛି - ସିଆର୍ପିଏଫ୍ ବାମପନ୍ଥୀ ଉଗ୍ରବାଦକୁ ହଟାଇ ଦେଇଛି ଯାହା ଜନଜାତୀୟ କ୍ଷେତ୍ରରେ ବିକାଶ ମାର୍ଗରେ ବାଧା ସୃଷ୍ଟି କରିଥିଲା
- ବାମପନ୍ଥୀ ଉଗ୍ରବାଦ ସମ୍ବନ୍ଧୀୟ ହିଂସା ଘଟଣା ଗୁଡିକରେ ୨୦୧୦ ମସିହାର ଉଚ୍ଚତମ ସ୍ତର ତୁଳନାରେ ୭୬% ହ୍ରାସ ପାଇଛି, ଜନହାନି ସଂଖ୍ୟାରେ ମଧ୍ୟ ପ୍ରାୟ ୭୮% ହ୍ରାସ ଦେଖା ଦେଇଛି
ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱରେ ଦେଶର ସୁରକ୍ଷା ବାହିନୀକୁ ସମସ୍ତ ପ୍ରକାରର ସୁବିଧା ଯୋଗାଇବା ଏବଂ ସେମାନଙ୍କ ସମସ୍ୟାର ସମାଧାନ ପାଇଁ ସରକାର ପ୍ରତିବଦ୍ଧ - ଅମିତ ଶାହ ସ୍ଥାନୀୟ ହାଲବି ଭାଷାରେ ବସ୍ତର କ୍ଷେତ୍ରରେ ପ୍ରସାର ଭାରତୀ ସମ୍ବାଦ ବୁଲେଟିନ୍ ସେବା ଆରମ୍ଭ କରିଛନ୍ତି, ଆଦିବାସୀ ମାନଙ୍କ ନିଜ ଭାଷାରେ ପ୍ରଥମ ସମ୍ବାଦ ବୁଲେଟିନ୍ ଆରମ୍ଭ କରିଥିବାରୁ ଅଲ୍ ଇଣ୍ଡିଆ ରେଡିଓ ଏବଂ ଦୂରଦର୍ଶନକୁ ଶୁଭେଚ୍ଛା ଜଣାଇଛନ୍ତି
- ଏହା କେବଳ ଆମର ସ୍ଥାନୀୟ ଭାଷା ଏବଂ ଉପଭାଷାକୁ ମଜବୁତ କରିବ ନାହିଁ, ବରଂ ଏହା ଯୋଗୁଁ ଏହି ଅଂଚଳରେ ବାସ କରୁଥିବା ଲୋକମାନେ ବିଶ୍ୱରେ ଘଟୁଥିବା ଘଟଣା ଗୁଡ଼ିକର ଖବର ପାଇପାରିବେ ଏବଂ ଦେଶ ଏବଂ ବିଶ୍ୱ ସହିତ ସେମାନଙ୍କ ସମ୍ପର୍କ ମଧ୍ୟ ବୃଦ୍ଧି ପାଇବ
ଦିଲ୍ଲୀ, (ପିଆଇବି) : କେନ୍ଦ୍ର ଗୃହ ତଥା ସମବାୟ ମନ୍ତ୍ରୀ ଅମିତ ଶାହ ଗତକାଲି ଛତିଶଗଡର ଜଗଦଲପୁର ଠାରେ କେନ୍ଦ୍ରୀୟ ରିଜର୍ଭ ପୋଲିସ ବଳ (ସିଆର୍ପିଏଫ୍) ର ୮୪ ତମ ସ୍ଥାପନା ଦିବସ ଉତ୍ସବରେ ମୁଖ୍ୟ ଅତିଥି ଭାବରେ ଯୋଗ ଦେଇଛନ୍ତି । ଏହି ଅବସରରେ କେନ୍ଦ୍ର ଗୃହ ମନ୍ତ୍ରୀ ମଧ୍ୟ ପ୍ୟାରେଡର ଅଭିବାଦନ ଗ୍ରହଣ କରିଛନ୍ତି । ଅମିତ ଶାହା ମଧ୍ୟ ସ୍ଥାନୀୟ ଭାଷା ହାଲବିରେ ବସ୍ତର ଡିଭିଜନ ପାଇଁ ପ୍ରସାର ଭାରତୀର ସମ୍ବାଦ ବୁଲେଟିନ୍ ପ୍ରସାରଣକୁ ଉଦ୍ଘାଟନ କରିଥିଲେ ।
ଅମିତ ଶାହ ତାଙ୍କ ଅଭିଭାଷଣରେ କହିଛନ୍ତି ଯେ ଛତିଶଗଡ ଠାରେ ସିଆର୍ପିଏଫ୍ ପ୍ରତିଷ୍ଠା ହେବା ପରେ ଏବଂ ବାମପନ୍ଥୀ ଉଗ୍ରବାଦ ସମସ୍ୟା ଆରମ୍ଭ ହେବା ପର ଠାରୁ ପ୍ରଥମ ଥର ପାଇଁ ଏହି ଦିନ ପାଳନ କରାଯାଉଥିବାରୁ ଏହା ଆମ ସମସ୍ତଙ୍କ ପାଇଁ ବହୁତ ଖୁସିର ବିଷୟ । ସେ କହିଛନ୍ତି ଯେ ଛତିଶଗଡରେ ବାମପନ୍ଥୀ ଉଗ୍ରବାଦକୁ ଶେଷ କରିବା ପାଇଁ ଅଭିଯାନ ସମୟରେ ୭୬୩ ସିଆର୍ପିଏଫ୍ କର୍ମଚାରୀ ସର୍ବୋଚ୍ଚ ବଳିଦାନ ଦେଇଛନ୍ତି । ଆଜି ବାମପନ୍ଥୀ ଉଗ୍ରବାଦ ବିରୋଧରେ ଆମର ସଂଗ୍ରାମ ଏକ ନିର୍ଣ୍ଣାୟକ ପର୍ଯ୍ୟାୟରେ ଅଛି, ଯେଉଁଥି ପାଇଁ ସହିଦ ଯବାନମାନେ ଅତୁଳନୀୟ ଅବଦାନ ଦେଇଛନ୍ତି ।
କେନ୍ଦ୍ର ଗୃହ ମନ୍ତ୍ରୀ ତଥା ସମବାୟ ମନ୍ତ୍ରୀ କହିଛନ୍ତି ଯେ ଜାମ୍ମୁ କାଶ୍ମୀର ହେଉ କିମ୍ବା ଉତ୍ତର ପୂର୍ବାଂଚଳରେ ଶାନ୍ତି ଫେରାଇ ଆଣିବା ପାଇଁ ହେଉ କିମ୍ବା ଆଦିବାସୀମାନଙ୍କର ବିକାଶ ନିମନ୍ତେ ବାମପନ୍ଥୀ ଉଗ୍ରବାଦ ବିରୋଧରେ ଲଢ଼ିବା ହେଉ, ସିଆର୍ପିଏଫ୍ ଯବାନମାନେ ପ୍ରତ୍ୟେକ କ୍ଷେତ୍ରରେ ଅତୁଳନୀୟ ବୀରତ୍ୱ ଏବଂ ସାହସିକତା ପ୍ରଦର୍ଶନ କରିଛନ୍ତି । ସେ ଆହୁରି ମଧ୍ୟ କହିଛନ୍ତି ଯେ, ଦେଶର ଆଭ୍ୟନ୍ତରୀଣ ସୁରକ୍ଷା କ୍ଷେତ୍ରରେ ସିଆର୍ପିଏଫ୍ର ସ୍ୱର୍ଣ୍ଣିମ ଇତିହାସ ସମସ୍ତ ଯବାନ ମାନଙ୍କର ସାହସିକତା, ବୀରତ୍ୱ ଏବଂ ବଳିଦାନର ଭାବନା ଦ୍ୱାରା ଚିହ୍ନିତ ହୋଇଛି । ଶ୍ରୀ ଶାହ କହିଛନ୍ତି ଯେ ଆଜି ଏଠାରେ ସିଆର୍ପିଏଫ୍ର ୧୭୪ କୋଟି ଟଙ୍କା ମୂଲ୍ୟର ତିନୋଟି ବିକାଶମୂଳକ ପ୍ରକଳ୍ପ ମଧ୍ୟ ଆରମ୍ଭ କରାଯାଇଛି । ସେ କହିଛନ୍ତି ଯେ ଆକାଶବାଣୀ ଆଜି ଠାରୁ ହାଲବି ଭାଷାରେ ପ୍ରସାର ଭାରତୀର ସାପ୍ତାହିକ ଖବର ବୁଲେଟିନ୍ ଆରମ୍ଭ କରିଛି । ଛତିଶଗଡ ଠାରେ ଆଦିବାସୀ ଭାଷାରେ ପ୍ରଥମ ସମ୍ବାଦ ବୁଲେଟିନ୍ ଆରମ୍ଭ କରିଥିବାରୁ କେନ୍ଦ୍ର ଗୃହ ମନ୍ତ୍ରୀ ଅଲ୍ ଇଣ୍ଡିଆ ରେଡିଓ ଏବଂ ଦୂରଦର୍ଶନକୁ ଶୁଭେଚ୍ଛା ଜଣାଇଛନ୍ତି । ସେ କହିଛନ୍ତି ଯେ ଏହା କେବଳ ଆମର ସ୍ଥାନୀୟ ଭାଷାକୁ ମଜବୁତ କରିବ ନାହିଁ, ବରଂ ଏହି ଅଂଚଳରେ ବାସ କରୁଥିବା ଲୋକମାନେ ସମଗ୍ର ବିଶ୍ୱର ଖବର ପାଇପାରିବେ ଏବଂ ଦେଶ ଏବଂ ବିଶ୍ୱ ସହିତ ଯୋଡି ହୋଇପାରିବେ ।
ଅମିତ ଶାହ କହିଛନ୍ତି ଯେ ଆଜି ସିଆର୍ପିଏଫ୍ ମହିଳା ମୋଟରସାଇକେଲ ଦଳକୁ ସବୁଜ ପତାକା ଦେଖାଇବାର କାର୍ଯ୍ୟକ୍ରମ ମଧ୍ୟ ରହିଛି । ଏହି ୭୫ ଜଣ ମହିଳା ଯବାନ ୩୮ଟି ମୋଟର ସାଇକେଲରେ ୧୮୪୮ କିଲୋମିଟର ଯାତ୍ରା ଶେଷ କରିବା ପରେ ଆଜି ଏଠାରେ ପହଞ୍ଚିଛନ୍ତି । ସେମାନେ ଏହି ଯାତ୍ରା ୯ ମାର୍ଚ୍ଚ ୨୦୨୩ ରେ ଆରମ୍ଭ କରିଥିଲେ । ସେ କହିଛନ୍ତି ଯେ ଏହି ମହିଳା ଯବାନମାନଙ୍କର ସାହସିକତା ସାରା ଦେଶରେ ନାରୀ ଶକ୍ତିର ବାର୍ତ୍ତା ବିସ୍ତାର କରିବାରେ ସହାୟକ ହେବ ।
କେନ୍ଦ୍ର ଗୃହ ମନ୍ତ୍ରୀ କହିଛନ୍ତି ଯେ, ୨୭ ଜୁଲାଇ, ୧୯୩୯ ରେ ସିଆର୍ପିଏଫ୍ ପ୍ରତିଷ୍ଠା କରାଯାଇଥିଲା, କିନ୍ତୁ ଏହି ବଳକୁ ଲୌହ ମାନବ ତଥା ଦେଶର ପ୍ରଥମ ଗୃହ ମନ୍ତ୍ରୀ ସର୍ଦ୍ଦାର ପଟେଲ ଆଧୁନିକ ରୂପ ପ୍ରଦାନ କରିଥିଲେ । ସେ କହିଛନ୍ତି ଯେ ୧୯୪୯ ମସିହା ଡିସେମ୍ବର ୨୮ ତାରିଖରେ ସର୍ଦ୍ଦାର ପଟେଲ ଏହାର ନାମ ପରିବର୍ତ୍ତନ କରି କେନ୍ଦ୍ରୀୟ ରିଜର୍ଭ ପୋଲିସ ବଳ ରଖିଥିଲେ ଏବଂ ୧୯୫୦ ମସିହା ମାର୍ଚ୍ଚ ୧୯ ତାରିଖରେ ସେ ଏହି ଫୋର୍ସକୁ ସଙ୍କେତ ପ୍ରଦାନ କରିଥିଲେ । ଶ୍ରୀ ଶାହ କହିଛନ୍ତି ଯେ ଗୋଟିଏ ବାଟାଲିୟନରୁ ଆରମ୍ଭ ହୋଇଥିବା ଏହି ବାହିନୀ ଆଜି ଦେଶର ସବୁଠାରୁ ବଡ ସିଆର୍ପିଏଫ୍ ଅଟେ, ଏଥିରେ ୨୪୬ ବାଟାଲିୟନ, ୪ ଟି ଜୋନାଲ ମୁଖ୍ୟାଳୟ, ୨୧ ସେକ୍ଟର ମୁଖ୍ୟାଳୟ, ୨ ଅପରେସନ୍ ସେକ୍ଟର ମୁଖ୍ୟାଳୟ, ୧୭ ଅପରେସନ୍ ରେଞ୍ଜ, ୪୨ ଟି ପ୍ରଶାସନିକ ରେଞ୍ଜ ଏବଂ ୩.୨୫ ଲକ୍ଷରୁ ଅଧିକ କର୍ମଚାରୀ ଅଛନ୍ତି ।
ଅମିତ ଶାହ ଏହା ମଧ୍ୟ କହିଛନ୍ତି ଯେ ୧୯୫୯ ମସିହା ଅକ୍ଟୋବର ୨୧ ତାରିଖରେ ଲଦାଖର ହଟ୍ ସ୍ପ୍ରିଙ୍ଗରେ ଚାଇନା ସେନା ସହିତ ଲଢ଼ୁଥିବାବେଳେ ସିଆର୍ପିଏଫ୍ ଯବାନମାନେ ଅଦମ୍ୟ ସାହସ ଏବଂ ବଳିଦାନର ଭାବନା ପ୍ରଦର୍ଶନ କରିଥିଲେ ଏବଂ ସହିଦ ହୋଇ ଯାଇଥିଲେ । ସେମାନଙ୍କର ପ୍ରାଣବଳିକୁ ଅମର କରିବା ପାଇଁ ଦେଶ ୨୧ ଅକ୍ଟୋବରକୁ ପୁଲିସ୍ ସ୍ମୃତି ଦିବସ ଭାବରେ ପାଳନ କରିବାକୁ ନିଷ୍ପତ୍ତି ନେଇଛି । ସେ କହିଛନ୍ତି ଯେ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ନୂଆଦିଲ୍ଲୀର ଚାଣକ୍ୟପୁରୀ ଠାରେ ଜାତୀୟ ପୁଲିସ ସ୍ମାରକୀ ନିର୍ମାଣ କରାଇଛନ୍ତି ଯେଉଁଠାରେ ପ୍ରତିବର୍ଷ ୨୧ ଅକ୍ଟୋବରରେ ସହିଦ ପୁଲିସ କର୍ମଚାରୀ ମାନଙ୍କୁ ଶ୍ରଦ୍ଧାଞ୍ଜଳି ଅର୍ପଣ କରାଯାଏ । ସେ କହିଛନ୍ତି ଯେ ୧୯୬୫ ମସିହା ଏପ୍ରିଲ ୯ ତାରିଖରେ, ସିଆର୍ପିଏଫ୍ ସାହସର ସହିତ କଚ୍ଛ ମରୁଭୂମିରେ ସର୍ଦ୍ଦାର ପୋଷ୍ଟ ଠାରେ ପାକିସ୍ତାନୀ ସେନାକୁ ଉପଯୁକ୍ତ ଉତ୍ତର ଦେଇଥିଲା ଏବଂ ଏହି ଦିବସକୁ ପାଳନ କରିବା ପାଇଁ ୯ ଏପ୍ରିଲକୁ ସାରା ଦେଶରେ ଶୌର୍ଯ୍ୟ ଦିବସ ଭାବରେ ପାଳନ କରାଯାଇଥାଏ ।
ଅମିତ ଶାହ କହିଛନ୍ତି ଯେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱରେ ଦେଶର ସୁରକ୍ଷା ବାହିନୀ ଗତ ୯ ବର୍ଷ ମଧ୍ୟରେ ବାମପନ୍ଥୀ ଉଗ୍ରବାଦ ବିରୋଧରେ ଏକ ନିର୍ଣ୍ଣାୟକ ଯୁଦ୍ଧ କରିଛି ଏବଂ ବିପୁଳ ସଫଳତା ହାସଲ କରିଛି । ସେ କହିଛନ୍ତି ଯେ ବାମପନ୍ଥୀ ଉଗ୍ରବାଦୀ ମାନଙ୍କ ଯୋଗୁଁ ବିକାଶର ମାର୍ଗରେ ଦେଖା ଦେଇଥିବା ପ୍ରତିବନ୍ଧକକୁ ହଟାଇବାରେ ସିଆର୍ପିଏଫ୍ ସକ୍ଷମ ହୋଇଛି । ଶ୍ରୀ ଶାହ ସୂଚନା ଦେଇଛନ୍ତି ଯେ ସମସ୍ତ ସମସ୍ୟା କ୍ଷେତ୍ର ଗୁଡିକରେ ସିଆର୍ପିଏଫ୍ ସ୍ଥାନୀୟ ପୁଲିସ ସହିତ ମିଶି ସେମାନଙ୍କୁ ଉତ୍ସାହିତ କରି ଏକ ଅତୁଳଣୀୟ ଶକ୍ତି ସୃଷ୍ଟି କରି ଏହାର ସାଂଗଠନିକ ଦକ୍ଷତା ପ୍ରଦର୍ଶନ କରିଥିଲା ।
କେନ୍ଦ୍ର ଗୃହ ମନ୍ତ୍ରୀ ତଥା ସମବାୟ ମନ୍ତ୍ରୀ କହିଛନ୍ତି ଯେ ବାମପନ୍ଥୀ ଉଗ୍ରବାଦ ସହ ଜଡିତ ହିଂସା ଘଟଣା ୨୦୧୦ ମସିହାରେ ଚରମ ସୀମାରେ ପହଂଚିଥିବା ବେଳେ ତାହା ୭୬% ହ୍ରାସ ପାଇଛି ଏବଂ ଜୀବନ ହାନି ମଧ୍ୟ ପ୍ରାୟ ୭୮% ହ୍ରାସ ପାଇଛି । ଏହା ବ୍ୟତୀତ ବାମପନ୍ଥୀ ଉଗ୍ରବାଦୀ ମାନଙ୍କୁ ଆନ୍ତଃ ରାଜ୍ୟ ସୀମାର ଫାଇଦା ଉଠେଇବା କ୍ଷେତ୍ରରେ ପ୍ରତିବନ୍ଧକ ଲଗାଇବା ପାଇଁ ସିଆର୍ପିଏଫ୍ ବିଭିନ୍ନ ରାଜ୍ୟ ପୁଲିସ୍ ସହିତ ମିଳିତ ଟାସ୍କଫୋର୍ସ ମଧ୍ୟ ଗଠନ କରିଛି । ସେ କହିଛନ୍ତି ଯେ ଆଜି ବୁଢ଼ା ପାହାଡ, ଚକରବନ୍ଧ ଏବଂ ପାଶ୍ୱର୍ନାଥ ଟ୍ରାଇ ଜଙ୍କସନକୁ ବାମପନ୍ଥୀ ଉଗ୍ରବାଦରୁ ମୁକ୍ତ କରାଯାଇ ଦେଶର ମୁଖ୍ୟ ସ୍ରୋତକୁ ଅଣାଯାଇଛି ଏବଂ ଆଜି ସେଠାରେ ସମସ୍ତ ବିକାଶମୂଳକ କାର୍ଯ୍ୟ ଚାଲିଛି । ଶ୍ରୀ ଶାହ କହିଛନ୍ତି ଯେ ବିହାର ଏବଂ ଝାଡଖଣ୍ଡରେ ସୁରକ୍ଷା ଶୂନ୍ୟସ୍ଥାନ ଶେଷ ହେବାକୁ ଯାଉଛି ଏବଂ ଏହା କେବଳ ସାହସୀ ସିଆର୍ପିଏଫ୍ ଯବାନ ଏବଂ ପୁଲିସ ବାହିନୀର ମିଳିତ ଶକ୍ତି ହେତୁ ସମ୍ଭବ ହୋଇ ପାରିଛି । ସେ କହିଛନ୍ତି ଯେ ବାମପନ୍ଥୀ ଉଗ୍ରବାଦୀଙ୍କ ଆର୍ଥିକ ଉତ୍ସକୁ ରୋକିବା ପାଇଁ ସରକାର ଏନଆଇଏ ଏବଂ ଇଡି ଦ୍ୱାରା ମାମଲା ପଞ୍ଜିକରଣ କରି କଡା କାର୍ଯ୍ୟାନୁଷ୍ଠାନ ଗ୍ରହଣ କରୁଛନ୍ତି ।
ଅମିତ ଶାହ କହିଛନ୍ତି ଯେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱରେ ସରକାରଙ୍କ ବିକାଶମୂଳକ କାର୍ଯ୍ୟ ବର୍ତ୍ତମାନ ବାମପନ୍ଥୀ ଉଗ୍ରବାଦ ପ୍ରଭାବିତ ଅଞ୍ଚଳର ଶେଷ ବ୍ୟକ୍ତିଙ୍କ ନିକଟରେ ପହଞ୍ଚି ପାରୁଛି । ସେ କହିଛନ୍ତି ଯେ ବିକାଶ ପାଇଁ ମଞ୍ଜୁର ହୋଇଥିବା ୭୦,୦୦୦ କିଲୋମିଟର ରାସ୍ତା ମଧ୍ୟରୁ ୧୧,୦୦୦ କିଲୋମିଟର ରାସ୍ତା କାର୍ଯ୍ୟ ସମାପ୍ତ ହୋଇସାରିଛି, ୨୩୪୩ ଟି ମୋବାଇଲ୍ ଟାୱାର ସ୍ଥାପନ କରାଯାଇଛି, ପ୍ରାଥମିକ କ୍ଷେତ୍ରରେ ଏକଲବ୍ୟ ସ୍କୁଲ ଖୋଲା ଯାଉଛି, ମାତ୍ର ୫ ବର୍ଷ ମଧ୍ୟରେ ୧୨୫୮ ଟି ବ୍ୟାଙ୍କ ଶାଖା ଖୋଲାଯାଇଛି, ୧୩୪୮ଟି ଏଟିଏମ୍ ଖୋଲା ଯାଇଛି, ଦକ୍ଷତା ବିକାଶ ଯୋଜନା ଅଧୀନରେ ୪୭ ଟି ଆଇଟିଆଇ ଏବଂ ୬୮ ଟି ଦକ୍ଷତା ବିକାଶ କେନ୍ଦ୍ର ଖୋଲିବାର କାର୍ଯ୍ୟ ମଧ୍ୟ ସମାପ୍ତ ହୋଇଛି । ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ, ସିଆର୍ପିଏଫ୍ ଏବଂ ସ୍ଥାନୀୟ ପୁଲିସର ନେତୃତ୍ୱରେ ସରକାରଙ୍କ ମିଳିତ ଉଦ୍ୟମ ଯୋଗୁଁ ଏହି କ୍ଷେତ୍ରରେ ବିକାଶର ଗତି ବୃଦ୍ଧି ପାଉଛି ବୋଲି ସେ କହିଛନ୍ତି ।
କେନ୍ଦ୍ର ଗୃହମନ୍ତ୍ରୀ କହିଛନ୍ତି ଯେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱରେ ସରକାର ସିଆର୍ପିଏଫ୍ ଯବାନଙ୍କ କଲ୍ୟାଣ ପାଇଁ ଅନେକ ପଦକ୍ଷେପ ନେଇଛନ୍ତି । ଛତିଶଗଡ ବସ୍ତରିଆ ବାଟାଲିୟନରେ ୪୦୦ ସ୍ଥାନୀୟ ଯୁବକଙ୍କୁ ନିଯୁକ୍ତି ଦିଆଯାଇଛି, ବାମପନ୍ଥୀ ଉଗ୍ରବାଦ ପ୍ରଭାବିତ ଅଞ୍ଚଳରେ ରାସ୍ତା ନିର୍ମାଣ କରାଯାଇଛି ଏବଂ ୩୯୮ ଟି ବଡ଼ ଏବଂ ଛୋଟ ସେତୁ ନିର୍ମାଣରେ ସିଆର୍ପିଏଫ୍ ମଧ୍ୟ ସହଯୋଗ କରିଛି । ସେ କହିଛନ୍ତି ଯେ ୨୫ ଲକ୍ଷରୁ ଅଧିକ ତିରଙ୍ଗା ଉତ୍ତୋଳନ କରି ହର ଘର ତିରଙ୍ଗା ଅଭିଯାନଙ୍କୁ ସଫଳତା ଦେବାରେ ସିଆର୍ପିଏଫ୍ ମଧ୍ୟ ସହଯୋଗ କରିଛି । ସେ କହିଛନ୍ତି ଯେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱରେ ସିଆର୍ପିଏଫ୍ର ଆଧୁନିକୀକରଣ ଉପରେ ଅନେକ ଧ୍ୟାନ ଦିଆଯାଇଛି । ସେ କହିଛନ୍ତି ଯେ କେବଳ ୨୦୨୨-୨୩ ମସିହାରେ ୧୪ଟି ପ୍ରକଳ୍ପ ଶେଷ ହୋଇଛି । ଜଗଦଲପୁର ଠାରେ ଟ୍ରମା କେନ୍ଦ୍ର ଏବଂ ବାଟାଲିୟନରେ ମୌଳିକ ସୁବିଧା ଯୋଗାଇବା ପାଇଁ ସିଆର୍ପିଏଫ୍ ନିମନ୍ତେ ୪୩୦୯ କୋଟି ଟଙ୍କା ଖର୍ଚ୍ଚ ହୋଇଛି । ଗୃହ ସନ୍ତୁଷ୍ଟି ଅନୁପାତ ବୃଦ୍ଧି କରିବାକୁ ପ୍ରାୟ ୧୧,୦୦୦ ଘର ନିର୍ମାଣ କରାଯାଇଛି ଏବଂ ସିଆର୍ପିଏଫ୍ ପାଇଁ ୨୮,୫୦୦ ଅଧିକ ଘର ନିର୍ମାଣ କାର୍ଯ୍ୟ ଚାଲୁ ରହିଛି । ପ୍ରଧାନମନ୍ତ୍ରୀଙ୍କ ଛାତ୍ରବୃତ୍ତି ଯୋଜନା ଅଧୀନରେ ପ୍ରତି ମାସରେ ଝିଅମାନଙ୍କୁ ୩୦୦୦ ଟଙ୍କା ଏବଂ ପୁଅମାନଙ୍କୁ ୨୫୦୦ ଟଙ୍କା ମଧ୍ୟ ପ୍ରଦାନ କରାଯାଉଛି ।
ଅମିତ ଶାହା ସିଆର୍ପିଏଫ୍ ଯବାନ ମାନଙ୍କୁ କହିଛନ୍ତି ଯେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱରେ ସରକାର ସେମାନଙ୍କୁ ପ୍ରତ୍ୟେକ ସୁବିଧା ଯୋଗାଇବା ପାଇଁ ଏବଂ ସେମାନଙ୍କ ସମସ୍ୟାର ସମାଧାନ କରିବା ନିମନ୍ତେ ସେମାନଙ୍କ ସହିତ ଠିଆ ହୋଇଛନ୍ତି । ସେ ବିଶ୍ୱାସ ବ୍ୟକ୍ତ କରିଛନ୍ତି ଯେ ସିଆର୍ପିଏଫ୍ର ୮୪ ବର୍ଷର ଗୌରବମୟ ଇତିହାସକୁ ଆହୁରି ଦୃଢ଼ କରୁଥିବାବେଳେ ବାମପନ୍ଥୀ ଉଗ୍ରବାଦକୁ ସମ୍ପୂର୍ଣ୍ଣରୂପେ ବିଲୋପ ନହେବା ପର୍ଯ୍ୟନ୍ତ ଏହି ଶକ୍ତି ଉତ୍ସର୍ଗୀକୃତ ହୋଇ ମାଆ ଭାରତୀଙ୍କ ସେବା ଜାରି ରଖିବ ।