ପଦ୍ମପୁର, (ନିରୋଜ କୁମାର ପାଣୀ) : ପଦ୍ମପୁର ଅନ୍ତର୍ଗତ ସରେଇକେଲା ଗ୍ରାମରେ ଶ୍ରୀ ଶ୍ରୀ ପୁଢ଼ୀ ମା’ ମନ୍ଦିର ପ୍ରାଣ ପ୍ରତିଷ୍ଠା ମହୋତ୍ସବର ଆଜି ତୃତୀୟ ଦିନରେ ସଂକଳ୍ପ ପରିବାର, ବରଗଡ ଓ ସରେଇକେଲା ଗ୍ରାମବାସୀଙ୍କ ମିଳିତ ଉଦ୍ୟମରେ ଏକ ସ୍ୱେଚ୍ଛାକୃତ ରକ୍ତଦାନ ଶିବିର ଆୟୋଜିତ ହୋଇଯାଇଛି । ଆଜି ସକାଳ ୧୦ଟାରେ ଅବସରପ୍ରାପ୍ତ ସୈନିକ ହର୍ଷ ବର୍ଦ୍ଧନ ବିଶି ଓ ଅବସରପ୍ରାପ୍ତ ସୈନିକ ଲଳିତ ପ୍ରଧାନ ଦୀପ ପ୍ରଜ୍ୱଳନ ପୂର୍ବକ ଶିବିରକୁ ଆରମ୍ଭ କରିଥିଲେ । ଆଜିର ରକ୍ତଦାନ ଶିବିରରେ ୧୮ ଜଣ ମହିଳା ରକ୍ତଦାତା ସମେତ ମୋଟ ୧୦୧ ୟୁନିଟ ରକ୍ତ ବରଗଡ ଜିଲ୍ଲା ରକ୍ତଭଣ୍ଡାର କର୍ମଚାରୀଙ୍କ ଦ୍ୱାରା ସଂଗୃହୀତ ହୋଇଥିଲା । ରକ୍ତଦାନ କରିବାକୁ ନେଇ ଗ୍ରାମବାସୀ ବେଶ ସଚେତନ ଥିବା ଦେଖିବାକୁ ମିଳିଥିଲା । ଆଜି ସରେଇକେଲା ଗ୍ରାମରେ ପ୍ରଥମ କରି ହେଉଥିବା ରକ୍ତଦାନ ଶିବିରରେ ଅନେକ ରକ୍ତଦାତା ପ୍ରଥମ କରି ରକ୍ତଦାନ କରି ବେଶ ଉତ୍ସାହିତ ହୋଇଥିଲେ । ଗ୍ରାମବାସୀ ଓ ସଂକଳ୍ପ ପରିବାରଙ୍କ ମହତ କାର୍ଯ୍ୟକ୍ରମକୁ ଅଂଚଳବାସୀଙ୍କ ତରଫରୁ ପ୍ରଶଂସା କରାଯାଇଛି ।
