ନୂଆଦିଲ୍ଲୀ : ଦରବୃଦ୍ଧି ଏବଂ ବେରୋଜଗାରୀ ସମସ୍ୟାକୁ ନେଇ କଂଗ୍ରେସର ପୂର୍ବତନ ସଭାପତି ରାହୁଲ ଗାନ୍ଧୀ ଶନିବାର କେନ୍ଦ୍ର ସରକାରଙ୍କୁ ଟାର୍ଗେଟ କରିଛନ୍ତି । ଭାରତୀୟ ଜନତା ପାର୍ଟି (ବିଜେପି) ଶାସନରେ ପେଟ୍ରୋଲ ଏବଂ ରନ୍ଧନ ଗ୍ୟାସର ମୂଲ୍ୟ ବୃଦ୍ଧି ସହିତ ଗବର ସିଂ ଟିକସ ଲୁଟ ଏବଂ ବେକାରୀ ମାମଲାରେ ସୁନାମି ଘଟିଥିବାର ସେ ଅଭିଯୋଗ କରିଛନ୍ତି । ରାହୁଲ ଟୁଇଟ୍ କରି କହିଛନ୍ତି, “ପ୍ରଧାନମନ୍ତ୍ରୀ କହିଛନ୍ତି, ୧୩୩ କୋଟି ଭାରତୀୟ ପ୍ରତ୍ୟେକ ବାଧାବିଘ୍ନରେ କହୁଛନ୍ତି, ଯଦି ଆପଣଙ୍କର ଶକ୍ତି ଅଛି, ତେବେ ଆମକୁ ଅଟକାନ୍ତୁ । ବିଜେପି ଶାସନ ଅଧୀନରେ ଏଲପିଜି ସିଲିଣ୍ଡର ମୂଲ୍ୟ ୧୫୭ ପ୍ରତିଶତ ବୃଦ୍ଧି ପାଇଛି, ରେକର୍ଡ ଭାଙ୍ଗା ପେଟ୍ରୋଲ ଦରବୃଦ୍ଧି, ‘ଗବର ସିଂ ଟ୍ୟାକ୍ସ’ର ଲୁଟ୍ ଏବଂ ବେରୋଜଗାରର ସୁନାମି ଆସିଛି ।” କଂଗ୍ରେସ ନେତା ଆହୁରି ଲେଖିଛନ୍ତି, ପ୍ରକୃତରେ ଜନସାଧାରଣ ପ୍ରଧାନମନ୍ତ୍ରୀଙ୍କୁ କହୁଛନ୍ତି, ତୁମ ଦ୍ୱାରା ସୃଷ୍ଟି ହୋଇଥିବା ଏହି ପ୍ରତିବନ୍ଧକ ସେମାନଙ୍କୁ ଶେଷ କରିଦେଇଛି, ବର୍ତ୍ତମାନ ବନ୍ଦ କର ।
ଦରବୃଦ୍ଧି ଏବଂ ବେରୋଜଗାରୀକୁ ନେଇ ରାହୁଲ ପ୍ରାୟତଃ କେନ୍ଦ୍ର ଉପରେ ଆକ୍ରମଣ କରନ୍ତି । ଅତୀତରେ ମଧ୍ୟ ରାହୁଲ ଦରବୃଦ୍ଧି ଏବଂ ବେରୋଜଗାରୀ ସମ୍ପର୍କରେ କେନ୍ଦ୍ର ସରକାରଙ୍କୁ ଏକ ତୀବ୍ର ପ୍ରଶ୍ନ କରିଥିଲେ । ରାହୁଲ କହିଥିଲେ ଯେ, ଦେଶରେ ଆର୍ଥିକ ମନ୍ଥରତା ସ୍ପଷ୍ଟ ଦେଖାଯାଉଛି, କିନ୍ତୁ ନୀତି ଦେବାଳିଆରେ ପୀଡିତ ସରକାର ଏହାକୁ ଦେଖୁ ନାହାଁନ୍ତି ଏବଂ ସରକାରଙ୍କ ଏ ସମ୍ପର୍କରେ କୌଣସି ଉତ୍ତର ନାହିଁ । ସେ ଆହୁରି ମଧ୍ୟ ଦାବୀ କରିଛନ୍ତି ଯେ, ଦେଶରେ ମୁଣ୍ଡପିଛା ଆୟ ୨ ବର୍ଷ ପୂର୍ବ ତୁଳନାରେ ହ୍ରାସ ପାଇଛି । ରାହୁଲ ଗାନ୍ଧୀ ଏକ ସୋସିଆଲ ମିଡିଆ ପୋଷ୍ଟରେ କହିଛନ୍ତି ଯେ, ଦେଶର ପ୍ରତ୍ୟେକ ପରିବାର ଦରବୃଦ୍ଧି ଏବଂ ଜୀବିକା ହରାଇବାର ସ୍ସ୍ଥିତିର ସମ୍ମୁଖୀନ ହେଉଛନ୍ତି । ଦୁଇ ବର୍ଷ ପୂର୍ବ ତୁଳନାରେ ଆଜି ମୁଣ୍ଡପିଛା ଆୟ ଯଥେଷ୍ଟ ହ୍ରାସ ପାଇଛି । ମୁଣ୍ଡପିଛା ଆୟ ୯୪,୨୭୦ ରୁ ୯୧,୪୮୧ ଟଙ୍କାକୁ ଖସି ଆସିଛି । କିନ୍ତୁ ସରକାର ଏହାକୁ ଦେଖୁନାହାଁନ୍ତି ।