ମାଲକାନଗିରି : ସୀମାନ୍ତ ଦନ୍ତେୱାଡା ଜିଲ୍ଲାରେ ୬ ଜଣ ନକଲି ନକ୍ସଲକୁ ଗିରଫ କରିଛି ପୁଲିସ । ଜିଲ୍ଲାର ବିଭିନ୍ନ ନକ୍ସଲ ପ୍ରବଣ ଗ୍ରାମଗୁଡିକରେ କିଛି ସଶସ୍ତ୍ର ନକ୍ସଲ ଘରେ ଘରେ ପଶି ଲୁଟପାଟ କରୁଥିବା ନେଇ ଥାନାରେ ଏତଲା ଦାୟର କରାଯାଇଥିଲା । ଏତଲାକୁ ଭିତ୍ତି କରି ପୁଲିସ ଖୋଳତାଡ ଆରମ୍ଭ କରିଥିଲା । ତେବେ କିଛି ସୁରାକ ପୁଲିସ ପାଇପାରି ନଥିଲା ।
ସୂଚନା ଅନୁସାରେ ବଚେଲିଠାରେ ହୋଇଥିବା ଲୁଟପାଟରେ ପୁଲିସ ଭୁଷଣ ନାମକ ଜଣେ ଯୁବକକୁ ଗିରଫ କରି ପଚରାଉଚରା କରିବା ପରେ ସେ ସ୍ୱୀକାର କରିଥିଲା ଯେ ବିଭିନ୍ନ ଗ୍ରାମରେ ହେଉଥିବା ଲୁଟପାଟରେ ସେ ସାମିଲ ଥିଲା । ତାର ଖବରର ଆଧାରରେ ୬ ଜଣ ନକଲି ନକ୍ସଲକୁ ଗିରଫ କରାଯାଇଥିଲା । ସମସ୍ତେ ବଜାରରେ ମିଳୁଥିବା ଅତ୍ୟାଧୁନକ ନକଲି ବନ୍ଧୁକ, ନକ୍ସଲ ଟି ସାର୍ଟ ଇତ୍ୟାଦି ଧରି ରାତି ଅଧରେ ଗାଁ ଗାଁରେ ବୁଲି ଲୋକଙ୍କ ଘରୁ ଲୁଟପାଟ କରୁଥିଲେ । ଏମାନେ ହେଲେ ଭୁଷଣ ମାଡକାମ, ଲଖନ ନାଥ, ଅନନ୍ତ ନାଗ, ବିଶାଲ, ଦୀପକ ଠାକୁର, ଗୌରୀ ଶଂକର ନାଥ ପ୍ରମୁଖ ରହିଥିଲେ । ପୁଲିସ ଏମାନଙ୍କୁ ଧରି ପଚରାଉଚରା କରିବା ପରେ କୋର୍ଟ ଚାଲାଣ କରିଥିବା କହିଛି ।