ଶ୍ରମ ସଂହିତା ଅଧିନରେ ଦେଶବ୍ୟାପୀ ମାଗଣା ବାର୍ଷିକ ସ୍ବାସ୍ଥ୍ୟ ପରୀକ୍ଷା କାର୍ଯ୍ୟକ୍ରମର ଉଦ୍ଘାଟନ କଲେ କେନ୍ଦ୍ରମନ୍ତ୍ରୀ ଡ. ମନସୁଖ ମାଣ୍ଡଭୀୟ
- ସାରାଦେଶରେ ୪୦ ବର୍ଷରୁ ଅଧିକ କର୍ମଚାରୀମାନଙ୍କ ପାଇଁ ମାଗଣା ସ୍ବାସ୍ଥ୍ୟ ପରୀକ୍ଷା
- ଶ୍ରମ ସଂହିତା ଅଧୀନରେ ଗିଗ୍ ଏବଂ ପ୍ଲାଟଫର୍ମ କର୍ମଚାରୀମାନଙ୍କୁ ସାମାଜିକ ସୁରକ୍ଷା କଭରେଜ୍ ପ୍ରଦାନ କରିବାରେ ଭାରତ ବିଶ୍ବର ପ୍ରଥମ ଦେଶମାନଙ୍କ ମଧ୍ୟରେ ଅନ୍ୟତମ : ଡକ୍ଟର ମାଣ୍ଡଭୀୟ
- ଭାରତରେ ସାମାଜିକ ସୁରକ୍ଷା କଭରେଜ୍ ୧୯ ପ୍ରତିଶତରୁ ୬୪ ପ୍ରତିଶତକୁ ବୃଦ୍ଧି ପାଇଛି, ଯାହା ପ୍ରାୟ ୯୪ କୋଟି ଲୋକଙ୍କୁ ଲାଭ ଦେଇଛି: ଡକ୍ଟର ମାଣ୍ଡଭୀୟ
- ଇଏସଆଇସି କଭରେଜ୍ ଏକ ଦଶନ୍ଧି ପୂର୍ବେ ୭ କୋଟି ଥିବାବେଳେ ଏବେ ତାହା ୧୫ କୋଟି ହିତାଧିକାରୀଙ୍କ ନିକଟରେ ପହଞ୍ଚିଛି: ଡକ୍ଟର ମାଣ୍ଡଭୀୟ
ନୂଆଦିଲ୍ଲୀ, (ପିଆଇବି) : କେନ୍ଦ୍ର ଶ୍ରମ ଏବଂ ନିଯୁକ୍ତି ଏବଂ ଯୁବ ବ୍ୟାପାର ଏବଂ କ୍ରୀଡାମନ୍ତ୍ରୀ ଡକ୍ଟର ମନସୁଖ ମାଣ୍ଡଭୀୟ ଆଜି ଦିଲ୍ଲୀର ବାସେଇଦାରପୁର ସ୍ଥିତ ଇଏସଆଇସି ମେଡିକାଲ କଲେଜ ଏବଂ ହସ୍ପିଟାଲରେ ୪୦ ବର୍ଷ ଏବଂ ଅଧିକ ବୟସର ସମସ୍ତ ଶ୍ରମିକଙ୍କ ପାଇଁ ଏକ ଦେଶବ୍ୟାପୀ ବାର୍ଷିକ ସ୍ୱାସ୍ଥ୍ୟ ପରୀକ୍ଷା କାର୍ଯ୍ୟକ୍ରମର ଶୁଭାରମ୍ଭ କରିଛନ୍ତି। ଦେଶର କର୍ମଶକ୍ତି ପାଇଁ ବୃତ୍ତିଗତ ସ୍ୱାସ୍ଥ୍ୟସେବା ଏବଂ ସାମାଜିକ ସୁରକ୍ଷା କଭରେଜକୁ ସୁଦୃଢ଼ କରିବା ଦିଗରେ ଏହାକୁ ଏକ ଗୁରୁତ୍ୱପୂର୍ଣ୍ଣ ମାଇଲଖୁଣ୍ଟ ବୋଲି କୁହାଯାଉଛି।
ଏହି ଅବସରରେ ସମାବେଶକୁ ସମ୍ବୋଧିତ କରି କେନ୍ଦ୍ରମନ୍ତ୍ରୀ କହିଥିଲେ ଯେ ଚାରୋଟି ଶ୍ରମ ସଂହିତା ଲାଗୁ ହେବା ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଦେଶବ୍ୟାପୀ ଶ୍ରମିକଙ୍କ ପାଇଁ ମର୍ଯ୍ୟାଦା, କଲ୍ୟାଣ ଏବଂ ସାମାଜିକ ସୁରକ୍ଷା ସୁନିଶ୍ଚିତ କରିବାର ଗ୍ୟାରେଣ୍ଟିକୁ ପ୍ରତିଫଳିତ କରେ।
ଏହି ଅବସରକୁ ଦେଶର “ଶ୍ରମଶକ୍ତି” ସମ୍ମାନ ପାଇଁ ଉତ୍ସର୍ଗୀକୃତ ଦିନ ଭାବରେ ବର୍ଣ୍ଣନା କରି, ସେ କହିଥିଲେ ଯେ ସରକାର ସମସ୍ତ ଶ୍ରମିକଙ୍କ ପାଇଁ ସାମାଜିକ ସୁରକ୍ଷା କଭରେଜକୁ ସୁଦୃଢ଼ କରିବା ପାଇଁ ପ୍ରତିବଦ୍ଧ।
କେନ୍ଦ୍ରମନ୍ତ୍ରୀ ଗୁରୁତ୍ୱାରୋପ କରି କହିଥିଲେ ଯେ, ପ୍ରଧାନମନ୍ତ୍ରୀ ମୋଦୀଙ୍କ ନେତୃତ୍ବାଧୀନ ସରକାର ଗତ ୧୨ ବର୍ଷ ଧରି ନିଯୁକ୍ତି ସୃଷ୍ଟି ଏବଂ କଲ୍ୟାଣକାରୀ ପଦକ୍ଷେପ ମାଧ୍ୟମରେ “ଶ୍ରମଶକ୍ତି” ଏବଂ “ଯୁବଶକ୍ତି”କୁ ସଶକ୍ତ କରିବା ଦିଗରେ କାର୍ଯ୍ୟ କରିଚାଲିଛନ୍ତି।
ସେ ଏହା ମଧ୍ୟ କହିଥିଲେ ଯେ ଦେଶରେ ସାମାଜିକ ସୁରକ୍ଷା କଭରେଜ ଏକ ଉଲ୍ଲେଖନୀୟ ଅଭିବୃଦ୍ଧି ଦେଖିଛି। ଏକ ଦଶନ୍ଧି ପୂର୍ବେ ପ୍ରାୟ ୩୦ କୋଟି ଲୋକ ଏଥିରେ ଅନ୍ତର୍ଭୁକ୍ତ ଥିବାବେଳେ ଆଜି ତାହା ପ୍ରାୟ ୯୪ କୋଟି ହିତାଧିକାରୀଙ୍କ ନିକଟରେ ପହଞ୍ଚିଛି, ଅର୍ଥାତ୍ ସାମାଜିକ ସୁରକ୍ଷା କଭରେଜ ୧୯ ପ୍ରତିଶତରୁ ୬୪ ପ୍ରତିଶତକୁ ବୃଦ୍ଧି ପାଇଛି।
ସେ ଆହୁରି ମଧ୍ୟ କହିଥିଲେ ଯେ ଏକ ଦଶନ୍ଧି ତଳେ ପ୍ରାୟ ୭ କୋଟି ଲୋକଙ୍କ ନିକଟରେ ଇଏସଆଇସି କଭରେଜ୍ ଥିବାବେଳେ ଏବେ ତାହା ୧୫ କୋଟିକୁ ବୃଦ୍ଧି ପାଇଛି।
ଡ. ମାଣ୍ଡଭୀୟ କହିଥିଲେ ଯେ ଏଣିକି ସାରାଦେଶରେ ପ୍ରତିବର୍ଷ ୪୦ ବର୍ଷରୁ ଅଧିକ ବୟସର ସମସ୍ତ କର୍ମଚାରୀମାନଙ୍କର ମାଗଣା ସ୍ବାସ୍ଥ୍ୟ ପରୀକ୍ଷା କରାଯିବ। ସ୍ବାସ୍ଥ୍ୟ ପରୀକ୍ଷା ମାଧ୍ୟମରେ ସହଳ ରୋଗଚିହ୍ନଟ ହେବା ଦ୍ବାରା ଗୁରୁତର ରୋଗ ଦାଉରୁ ରକ୍ଷା ମିଳିଥାଏ। ସେ ଆହୁରି ମଧ୍ୟ କହିଥିଲେ ଯେ ସ୍ବାସ୍ଥ୍ୟ ପରୀକ୍ଷା ଶିବିରରେ ଚିହ୍ନଟ ଚିକିତ୍ସା ଓ ଔଷଧ ଇଏସଆଇସି ଚିକିତ୍ସାକେନ୍ଦ୍ରରୁ ମିଳିପାରିବ।
ଚାରୋଟି ଶ୍ରମ ସଂହିତା ଅଧୀନରେ ଅଣାଯାଇଥିବା ପ୍ରମୁଖ ଶ୍ରମ ସଂସ୍କାର ଉପରେ ଆଲୋକପାତ କରି କେନ୍ଦ୍ରମନ୍ତ୍ରୀ କହିଥିଲେ ଯେ ପୁରୁଷ ଏବଂ ମହିଳା ଶ୍ରମିକଙ୍କ ପାଇଁ ସମାନ ଦରମା ପାଇଁ ବ୍ୟବସ୍ଥା ସୁନିଶ୍ଚିତ କରାଯାଇଛି, ମାତୃତ୍ୱ ଛୁଟିକୁ ୧୨ ସପ୍ତାହରୁ ୨୬ ସପ୍ତାହକୁ ବୃଦ୍ଧି କରାଯାଇଛି, ଏବଂ ମହିଳାଙ୍କ ପାଇଁ ‘ଘରୁ କାର୍ଯ୍ୟ’ ପାଇଁ ବ୍ୟବସ୍ଥା ମଧ୍ୟ କରାଯାଇଛି।
ସେ କହିଥିଲେ ଯେ ବିଶ୍ବର ଅନ୍ୟ ଦେଶମାନେ ଗିଗ୍ ଓ ପ୍ଲାଟଫର୍ମ କର୍ମଚାରୀଙ୍କୁ ସାମାଜିକ ସୁରକ୍ଷା ବ୍ୟବସ୍ଥା ଅଧିନରେ ଆଣିବାକୁ ଚିନ୍ତା କରୁଥିବାବେଳେ, ମୋଦୀ ସରକାର ଏକ ସକ୍ରିୟ ଆଭିମୁଖ୍ୟ ଗ୍ରହଣ କରି ସେମାନଙ୍କୁ ନୂଆ ଶ୍ରମ ସଂହିତା ଅଧିନରେ ସାମାଜିକ ସୁରକ୍ଷା ବ୍ୟବସ୍ଥାରେ ଅନ୍ତର୍ଭୁକ୍ତ କରିଛନ୍ତି। ସେ ସୂଚନା ଦେଇଥିଲେ ଯେ କ୍ଷତିକାରକ ପେସାରେ କାମ କରୁଥିବା କର୍ମଚାରୀ ଓ ୧୦ ଜଣରୁ କମ କର୍ମଚାରୀ ଥିବା ସଂସ୍ଥାଗୁଡ଼ିକୁ ବି ଇଏସଆଇସି କଭରେଜ୍ ଅଧିନକୁ ଅଣାଯାଇଛି।
କେନ୍ଦ୍ରମନ୍ତ୍ରୀ ଆହୁରି ମଧ୍ୟ କହିଥିଲେ ଯେ ପୂର୍ବରୁ ଶ୍ରମିକମାନଙ୍କୁ ଉପେକ୍ଷା କରାଯାଉଥିଲା ଏବଂ ସେମାନଙ୍କ ସ୍ୱର ଶୁଣାଯାଉନଥିଲା, କିନ୍ତୁ ବର୍ତ୍ତମାନର ସରକାର ନିଶ୍ଚିତ କରିଛନ୍ତି ଯେ ସେମାନଙ୍କ ଅଭିଯୋଗକୁ ପ୍ରତିବଦ୍ଧତା ଏବଂ ସମ୍ବେଦନଶୀଳତାର ସହିତ ସମାଧାନ କରାଯାଉଛି। ସେ ଆହୁରି ମଧ୍ୟ କହିଛନ୍ତି ଯେ ଦେଶବ୍ୟାପୀ ସ୍ୱାସ୍ଥ୍ୟ ପରୀକ୍ଷା କାର୍ଯ୍ୟକ୍ରମ ଦେଶର କର୍ମଶକ୍ତି ପାଇଁ ମର୍ଯ୍ୟାଦା, ସୁରକ୍ଷା ଏବଂ ଉନ୍ନତ ସ୍ୱାସ୍ଥ୍ୟସେବା ସୁନିଶ୍ଚିତ କରିବା ଉଦ୍ଦେଶ୍ୟରେ ନିଆଯାଇଥିବା ଆଉ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ।
ଏହି କାର୍ଯ୍ୟକ୍ରମ ଦେଶର ଅନ୍ୟ ୧୧ଟି ସ୍ଥାନରେ – କର୍ମଚାରୀ ରାଜ୍ୟ ବୀମା ନିଗମ (ଇଏସଆଇସି) ସହିତ ଜଡିତ ହସ୍ପିଟାଲଗୁଡ଼ିକରେ ଆୟୋଜନ ହୋଇଥିଲା। ଏସବୁ କାର୍ଯ୍ୟକ୍ରମରେ ରାଜ୍ୟ ଶ୍ରମ ମନ୍ତ୍ରୀ, ସାଂସଦ, ବିଧାୟକ, ବରିଷ୍ଠ ଅଧିକାରୀ, ନିଯୁକ୍ତିଦାତାଙ୍କ ପ୍ରତିନିଧି, କର୍ମଚାରୀ ଏବଂ ଅନ୍ୟାନ୍ୟ ମାନ୍ୟଗଣ୍ୟ ବ୍ୟକ୍ତିମାନେ ଯୋଗ ଦେଇଥିଲେ।
ଏହି ଅବସରରେ, ଦିଲ୍ଲୀ ସରକାରଙ୍କ ଆଇନ ଏବଂ ନ୍ୟାୟ, ଶ୍ରମ, ନିଯୁକ୍ତି, ବିକାଶ, କଳା, ସଂସ୍କୃତି ଏବଂ ଭାଷା ଏବଂ ପର୍ଯ୍ୟଟନ ମନ୍ତ୍ରୀ ଶ୍ରୀଯୁକ୍ତ କପିଲ ମିଶ୍ର ଏବଂ ଇଏସଆଇସିର ମହାନିର୍ଦ୍ଦେଶକ ଶ୍ରୀଯୁକ୍ତ ଅଶୋକ କୁମାର ସିଂହ ମଧ୍ୟ ଉପସ୍ଥିତ ଥିଲେ ।