ବଲାଙ୍ଗିର, (କେପିଏନ୍ଏସ୍) : ସ୍ଥାନୀୟ ଟିକ୍ରାପଡ଼ା ରାମମନ୍ଦିରଠାରେ ଶିଶୁବିକାଶ କେନ୍ଦ୍ର, ବଲାଙ୍ଗିର ତରଫରୁ ଅନ୍ତର୍ଜାତୀୟ ଶିଶୁ ଦିବସ ପାଳିତ ହୋଇଯାଇଛି । ଅବସରପ୍ରାପ୍ତ ଶିକ୍ଷକ କପିଳ ପତିଙ୍କ ସଭାପତିତ୍ୱ ଅନୁଷ୍ଠିତ ସଭାରେ ନାଟ୍ୟଭୂଷଣ ଜଗଦାନନ୍ଦ ଛୁରିଆ ଓ ଶିକ୍ଷୟତ୍ରୀ ଅନୁପ୍ରିୟା ମିଶ୍ର ଯୋଗଦେଇ “ଶିଶୁର ସ୍ୱପ୍ନ” ଓ “ଶିଶୁ ହସିଲେ ଦୁନିଆ ହସେ” ବିଷୟ ଉପରେ ଆଲୋଚନା କରିଥିଲେ । ପରେ ପରେ ଶିକ୍ଷକ ମଦନ ମୋହନ ରଥ, ମଧୁ ସାହୁ, ଅରୁଣ ଖୁଆସ ନିଜ ନିଜର ମନ୍ତବ୍ୟ ରଖିଥିଲେ । ଶିଶୁମାନଙ୍କ ଭିତରେ ପ୍ରତିଯୋଗିତା ମୂଳକ ଭାବନା ନ ରଖି, ପରସ୍ପରକୁ ସହଯୋଗର ଭାବନା ସୃଷ୍ଟି କରିବା ଉଚିତ ବୋଲି ସମସ୍ତଙ୍କର ଏକମତ ପ୍ରକାଶ ପାଇଥିଲା । ସଭାପରିଚାଳନା କରିଥିଲେ ଅନୁଷ୍ଠାନର ସମ୍ପାଦକ ରତ୍ନମୟ ତ୍ରିପାଠୀ । ଶେଷରେ ସମସ୍ତଙ୍କୁ ଧନ୍ୟବାଦ ଦେଇଥିଲେ ଶିକ୍ଷୟତ୍ରୀ କସ୍ତୁରୀ ରଥ । ଏହି କାର୍ଯ୍ୟକ୍ରମରେ ସହରର ଅନେକ ଶିକ୍ଷକ ଶିକ୍ଷୟତ୍ରୀ ଓ ଶିଶୁପ୍ରେମୀ ଯୋଗଦେଇଥିଲେ ।