ଆଲିସାନ ସିନେମା ହଲରେ ଗଣ୍ଡଗୋଳ ଘଟଣାରେ କଣ୍ଟାବାଞ୍ଜି ବିଧାୟକଙ୍କ ପୁଅ ଅମିତ ସିଂ ସାଲୁଜାଙ୍କ ସମେତ ୬ ଗିରଫ ଓ କୋର୍ଟ ଚାଲାଣ
- ବେଲପଡାରେ ପୋଲିସର ଛାଉଣୀ
ପାଟଣାଗଡ଼, (ସଦାଶିବ ସରାଫ୍) : କଣ୍ଟାବାଞ୍ଜି ବେଳପଡା ସୀମାରେ ଥିବା ଆଲିସାନ ସିନେମା ହଲରେ ଗତକାଲି ରାତିରେ ବିଧାୟକ ସନ୍ତୋଷ ସିଂ ସାଲୁଜାଙ୍କ ପୁଅ ସେଜି ସିଂ ଓରଫ ଅମିତ ସିଂ ସାଲୁଜା ଓ ସିନେମା ହଲର ମାଲିକଙ୍କ ପୁଅ ସହ ଗଣ୍ଡଗୋଳ ହୋଇଥିଲା । ଏପରିକି ଅମିତ ସିଂ ସାଲୁଜା ବନ୍ଧୁକ ଦେଖାଇଥିବା ଅଭିଯୋଗ ହୋଇଥିବା ଜଣାପଡ଼ିଛି । ପରେ ଖବର ପାଇ ବେଲପଡା ପୋଲିସ ଘଟଣା ସ୍ଥଳରେ ପହଞ୍ଚି ଗଣ୍ଡଗୋଳକୁ ଆୟତ୍ତ କରିବା ସହ କଣ୍ଟାବାଞ୍ଜି ବିଧାୟକଙ୍କ ପୁଅ ଅମିତ ସିଂ ସାଲୁଜାଙ୍କ ସମେତ ୬ ଜଣଙ୍କୁ ବିଳମ୍ବିତ ରାତିରେ ବେଲପଡା ଥାନାକୁ ଆଣି ଏକ ମାମଲା ରୁଜୁ କରିଥିବା ବେଳେ ୬ ଜଣଙ୍କୁ ଆଜି ପାଟଣାଗଡ଼ କୋର୍ଟ ଚାଲାଣ କରିଛି । ଗିରଫ ୬ ଜଣ ହେଲେ କଣ୍ଟାବାଞ୍ଜି ବିଧାୟକଙ୍କ ପୁଅ ଅମିତ ସିଂ ସାଲୁଜା ଓରଫ ସେଜି ଅଜୟ ଅଗ୍ରୱାଲ ବିକାଶ ଅଗ୍ରୱାଲ, ବିପୁଳ ମାରୁ, ଧର୍ମବୀର ଗୁପ୍ତା ଓ ରାଜ ପାତ୍ରଙ୍କ ବିରୁଦ୍ଧରେ ଭାରତୀୟ ପିଙ୍ଗଲ କୋଡ଼ର ୪୫୨/୩୪୧/୩୪୩/୨୯୪/୫୦୬/୩୦୭/୩୮୪/ ୩୯୫ ସହ ଅସ୍ତ୍ରଶସ୍ତ୍ର ଆଇନର ୨୫ /୨୭ ଧାରାରେ ଗିରଫ କରି କୋର୍ଟ ଚାଲାଣ କରିଛି । ତା’ ସହ ଅମିତ ସିଂ ସାଲୁଜାଙ୍କ ସେଜି ଜିମରୁ ୧୯ ଲକ୍ଷ ଟଙ୍କା ନଗଦ ଓ କିଛି ପରିମାଣର ମଦ ଜବତ କରାଯାଇଥିବା ଜଣାପଡିଛି । ଏହି ଘଟଣା ପରେ ପାଟଣାଗଡ଼ ଏସ୍ଡିପିଓଙ୍କ ସମେତ ଜିଲ୍ଲାର ସମସ୍ତ ଥାନାର ଅଧିକାରୀମାନେ ଉପସ୍ଥିତ ରହିଛନ୍ତି ।