ବରଗଡ଼, (ଗୋପୀନାଥ ସାହୁ) : ସମ୍ବିଧାନ ସୁରକ୍ଷା ମଞ୍ଚ ଓ ହସ୍ପିଟାଲ ବଞ୍ଚାଅ ଅଭିଯାନ ବରଗଡ଼ ପକ୍ଷରୁ ପୁରୁଣା ଜିଲ୍ଲା ମୁଖ୍ୟ ଡାକ୍ତରଖାନାକୁ ଆବଶ୍ୟକ ପରିମାଣର ଡାକ୍ତର, ଫାର୍ମାସିଷ୍ଟ, ନର୍ସ ତଥା ଅନ୍ୟ ଆନୁସଙ୍ଗିକ ସୁବିଧା ପ୍ରଦାନ ଦାବୀରେ ଜରୁରୀ କାଳୀନ ବୈଠକ ଅନୁଷ୍ଠିତ ହୋଇ ଯାଇଅଛି । ମଞ୍ଚର ଆବାହକ ଭବାନୀ ସାହୁଙ୍କ ସଂଯୋଜନାରେ ଅନୁଷ୍ଠିତ ବୈଠକରେ ଉପସ୍ଥିତ ନାଗରିକ ଗଣ ଏକ ସ୍ଵରରେ ପୁରୁଣା ଜିଲ୍ଲା ମୁଖ୍ୟ ଚିକିତ୍ସାଳୟରେ ସରକାରଙ୍ଙ୍କ ଘୋଷଣା ମୁତାବକ ଡାକ୍ତର, ନର୍ସ ଓ ଆବଶ୍ୟକୀୟ ପାରା ମେଡିକାଲ ଷ୍ଟାଫ ଯୋଗାଇ ଦେଇ ନଥିବାରୁ ଏହି ପୁରୁଣା ସ୍ୱାସ୍ଥ୍ୟ କେନ୍ଦ୍ର ଯାହାକୁ କି ରାଜ୍ୟ ସରକାର ଅର୍ବାନ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ର ଭାବରେ ଘଷଣା କରିଥିଲେ , ଜନ ସାଧାରଣ ନାହିଁ ନଥିବା ଅସୁବିଧା ଭୋଗୁଛନ୍ତି । ସରକାର କେବଳ ଘୋଷଣା କରିଛନ୍ତି ହେଲେ କାର୍ୟ୍ୟକାରିତା ହୋଇ ପାରିନାହିଁ । ଏହା ଭିତରେ କରୋନାର ପ୍ରବେଶ ଫଳରେ ଜନସାଧାରଣଙ୍କ ଅସୁବିଧା ଦ୍ଵିଗୁଣିତ ହୋଇ ଯାଇଅଛି । ସାମାନ୍ୟତମ ସ୍ୱାସ୍ଥ୍ୟ ସୁବିଧା ଜନସାଧାରଣ ପାଇବାରୁ ବଞ୍ଚିତ ହେଉଛନ୍ତି । ଆଜିର ବୈଠକରେ ଉପସ୍ଥିତ ରହି ସମସ୍ତେ ନିଜ ନିଜ ମତ ଦେବା ସହ ରାଜ୍ୟ ସରକାର ସେମାନଙ୍କୁ ଅଯଥାରେ ଆନ୍ଦୋଳନାତ୍ମକ ପନ୍ଥା ଅବଲମ୍ବନ କରିବାକୁ ବାଧ୍ୟ କରନ୍ତୁ ନାହିଁ ବୋଲି ଚେତାବନୀ ଦେଇଛନ୍ତି । ଏହି ବୈଠକ ପୂର୍ବରୁ ମଞ୍ଚ ପକ୍ଷରୁ ଜିଲ୍ଲା ମୁଖ୍ୟ ଚିକିତ୍ସାଧିକାରୀଙ୍କୁ ଏହି ବିଷୟରେ ଏକ ସ୍ମାରକପତ୍ର ପ୍ରଦାନ କରାଯାଇଥିଲା । ବୈଠକରେ ଅନ୍ୟମାନଙ୍କ ମଧ୍ୟରେ ପବିତ୍ର ଦେହେରୀ, ଶିବାନନ୍ଦ ମଟାରୀ, ରମେଶ ମହାପାତ୍ର, ଦେବିକା ସିକା, ପ୍ରଦୀପ ଧାନୂକା ପ୍ରମୁଖ ଉପସ୍ଥିତ ଥିଲେ ।
