କନ୍ଧମାଳ, (ସୁରେନ୍ଦ୍ର କୁମାର ପାଣିଗ୍ରାହୀ) : କନ୍ଧମାଳ ବନ ବିଭାଗ ଦ୍ଵାରା ଆଜି ଏକ କଲରାପତରିଆ ବାଘ ଛାଲ ଉଦ୍ଧାର କରାଯାଇଛି । ଏହି ମାମଲାରେ ଜଣକୁ ଗିରଫ କରି କୋର୍ଟ ଚାଲାଣ କରାଯାଇଛି । ଗିରଫ ବ୍ୟକ୍ତିର ନାମ କବିଚନ୍ଦ୍ର କହଁର(୫୦) ଓ ତାଙ୍କ ଘର ସଦର ଥାନା ଅନ୍ତର୍ଗତ କୁଟିବାରୀ ଗ୍ରାମ । ସୂଚନା ମୁତାବକ, କୌଣସି ସୂତ୍ରରୁ ଖବର ପାଇ ଆଜି ସୁଡ୍ରୁକୁମ୍ପା ରେଞ୍ଜର ଶିଶିର କୁମାର ଝାଙ୍କର କବିଚନ୍ଦ୍ରଙ୍କ ଘରେ ଚଢ଼ାଉ କରିଥିଲେ । ପଚରାଉଚରା ପରେ କବିଚନ୍ଦ୍ର ଗତ ଏପ୍ରିଲ୧୯ ତାରିଖରେ ଏକ କଲରାପତରିଆ ଶୀକାର କରିଥିବା ସ୍ଵୀକାର କରିଥିଲେ । ତାଙ୍କ ଘରୁ ବନ ବିଭାଗ ଏକ ଟାଙ୍ଗିଆ, ଗନ ପାଉଡର ଓ ୯ଟି ଶୀଶା ଗୁଳି ପାଇଥିଲେ । ପରେ କବିଚନ୍ଦ୍ର କଲରାପତରିଆ ଛାଲକୁ ଗ୍ରାମ ନିକଟସ୍ଥ ଚାଷ ଜମିରେ ଲୁଚାଇ ରଖିଥିବା କହିଥିଲେ । ବନ ବିଭାଗ କର୍ମଚାରୀ ଜମିକୁ ଯାଇ ଏକ ବୁଦା ମୂଳରେ ପଲିଥିନ ଜରିରେ ଲୁଚାଯାଇ ରଖାଯାଇଥିବା ଛାଲକୁ ଉଦ୍ଧାର କରିଥିଲେ । ଏଥିସହ ନିକଟସ୍ଥ ଅନ୍ୟ ଏକ ସ୍ଥାନରୁ ସେ ଲୁଚାଇ ରଖିଥିବା ଦେଶୀ ବନ୍ଧୁକ ମଧ୍ୟ ଜବତ କରାଯାଇଛି ।