ସୁରଟ : ସୁରଟର ଜଣେ ମହିଳାଙ୍କ ଅଙ୍ଗରୁ ପାଞ୍ଚ ଜଣ ନୂଆ ଜୀବନ ପାଇଛନ୍ତି ଏବଂ ଆଉ ଦୁଇଜଣ ଲୋକ ଉପକୃତ ହେବାକୁ ଯାଉଛନ୍ତି । ଏହି ମହିଳା ଜଣକ ଆଉ ଏହି ଦୁନିଆରେ ନାହାଁନ୍ତି । କିନ୍ତୁ ତାଙ୍କ ହୃଦୟ ଏବେ ବି ଜଣେ ମହିଳାଙ୍କ ଛାତିରେ ଜୀବିତ ରହିଛି । ତାଙ୍କ ଫୁସଫୁସ ଅନ୍ୟ ମହିଳାଙ୍କ ରକ୍ତରେ ଅମ୍ଳଜାନ ଯୋଗାଉଛି । ତାଙ୍କର ଉଭୟ କିଡନୀ ଦୁଇ ମଣିଷଙ୍କ ଶରୀରରେ ରକ୍ତ ସଫା କରୁଛି । ଯକୃତ ଅନ୍ୟ ମାନବ ଶରୀରର ଶକ୍ତି ଗୃହ ହୋଇ ରହିଛି । ମହିଳାଙ୍କ ଦୁଇ ଆଖି ବର୍ତ୍ତମାନ ଜଣେ ବ୍ୟକ୍ତିଙ୍କ ଜୀବନକୁ ଆଲୋକିତ କରିବାକୁ ପ୍ରସ୍ତୁତ ।
ଏହି ମହାନ୍ ମହିଳାଙ୍ଙ୍କ ନାମ କାମିନୀ ପଟେଲ(୪୬) । ସୁରଟର ବାର୍ଡୋଲିର ବାସିନ୍ଦା ଥିଲେ । ମସ୍ତିଷ୍କ ଆଘାତ ଯୋଗୁଁ ତାଙ୍କୁ ହସ୍ପିଟାଲରେ ଭର୍ତ୍ତି କରାଯାଇଥିଲା । ସେ ୧୭ ମଇରୁ ଚିକିତ୍ସିତ ହେଉଥିଲେ । କିନ୍ତୁ ପରେ ଅବସ୍ଥା ଏପରି ହୋଇଗଲା ଯେ, ସେ ବିଛଣାରୁ ଉଠି ପାରିଲେ ନାହିଁ । ଦିନେ ହଠାତ୍ ତାଙ୍କ ରକ୍ତଚାପ ବଢ଼ିଗଲା ଏବଂ ଡାକ୍ତରମାନେ କହିଥିଲେ ଯେ ତାଙ୍କ ମସ୍ତିଷ୍କରେ ରକ୍ତସ୍ରାବ ହୋଇଛି । ଏହା ପରେ ତାଙ୍କୁ ଗୁଜୁରାଟର ସେଲବି ହସ୍ପିଟାଲକୁ ସ୍ଥାନାନ୍ତର କରାଯାଇଥିଲା । ଏଠାରେ ମସ୍ତିଷ୍କ ଅସ୍ତ୍ରୋପଚାର କରାଯାଇଥିଲା, କିନ୍ତୁ ଅବସ୍ଥାରେ କୌଣସି ଉନ୍ନତି ହୋଇନଥିଲା ।
ଡାକ୍ତରମାନେ ସବୁକିଛି ଚେଷ୍ଟା କରିଥିଲେ ମଧ୍ୟ ସଫଳ ହୋଇପାରିଲା ନାହିଁ । ପରିବାର ଲୋକଙ୍କୁ କୁହାଯାଇଥିଲା ଯେ, କାମିନୀ ପଟେଲଙ୍କ ମସ୍ତିଷ୍କ ମୃତ । ବର୍ତ୍ତମାନ କିଛି ଔପଚାରିକତା ବାକି ରହିଲା । ପରିବାରରେ କାମିନୀ ପଟେଲଙ୍କ ସ୍ୱାମୀ, ପୁଅ, ଭାଇ ଥିଲେ । ପରିବାର ସଦସ୍ୟ ଡାକ୍ତରମାନଙ୍କୁ ପଚାରିଲେ, ସେମାନେ ବର୍ତ୍ତମାନ କଣ କରିପାରିବେ ? କାମିନୀ ବର୍ତ୍ତମାନ ଫେରି ପାରିବେ ନାହିଁ ବୋଲି ଡାକ୍ତରମାନେ କହିଥିଲେ । କିନ୍ତୁ, ତାଙ୍କ ଶରୀରର ସମସ୍ତ ଅଙ୍ଗ ଅନେକ ଲୋକଙ୍କୁ ଜୀବନ ଦେଇପାରେ । ଡାକ୍ତରଙ୍କ ମନାଇବାରେ କାମିନୀଙ୍କ ପରିବାର ତାଙ୍କ ଅଙ୍ଗ ଦାନ କରିବାକୁ ନିଷ୍ପତ୍ତି ନେଇଥିଲେ ।
ଏହା ପରେ କାମିନୀଙ୍କ ଅଙ୍ଗ ସଂରକ୍ଷଣ ପ୍ରକ୍ରିୟା ଆରମ୍ଭ ହୋଇଥିଲା । ଏହି ସମୟରେ ଡାକ୍ତରଖାନା ଏବଂ ଏକ ଏନଜିଓ ତରଫରୁ ଜଣେ ମହିଳା ସୁରଟରେ ଜଣେ ଅଙ୍ଗ ଦାନ କରିଥିବା ଏକ ବାର୍ତ୍ତା ଭାସମାନ ହୋଇଥିଲା । ତାଙ୍କର ଫୁସଫୁସ, ହୃଦୟ, ଯକୃତ, କିଡନୀ ଏବଂ କର୍ଣ୍ଣିଆ ଦାନ ପାଇଁ ପ୍ରସ୍ତୁତ । ତା’ପରେ ହାଇଦ୍ରାବାଦ, ମୁମ୍ବାଇ ଏବଂ ଅହମ୍ମଦାବାଦରୁ ଡାକ୍ତରଙ୍କ ଏକ ଟିମ୍ ସୁରଟର ଡାକ୍ତରଖାନାରେ ଏକାଠି ହୋଇଥିଲେ । ହାଇଦ୍ରାବାଦର ଜଣେ ମହିଳା ଫୁସଫୁସର ଆବଶ୍ୟକତା କରୁଥିଲେ । ମୁମ୍ବାଇର ଏକ ଡାକ୍ତରଖାନାରେ ଜଣେ ମହିଳାଙ୍କୁ ହୃଦୟ ପ୍ରତିରୋପଣ ପାଇଁ ଭର୍ତ୍ତି କରାଯାଇଥିଲା। ଅହମ୍ମଦାବାଦରେ କିଡନୀ ଏବଂ ଯକୃତର ଆବଶ୍ୟକତା ଥିଲା ।
ଶେଷରେ ଅନ୍ୟମାନଙ୍କ ଶରୀରରେ ବଂଚିରହିଲେ କାମିନୀ । ତାଙ୍କ ମୃତ୍ୟୁ ପରେ ବି ସେ ଅନ୍ୟମାନଙ୍କ ପାଇଁ ଉଦାହରଣ ସୃଷ୍ଟି କଲେ ।