କଣ୍ଟାବାଞ୍ଜି, (କୈଳାଶ ସଗ୍ରିଆ) : ସାରା ବିଶ୍ୱ ବର୍ତ୍ତମାନ କରୋନା ଯୋଗୁଁ ତାଲା ବନ୍ଦରେ ଥିବାବେଳେ ଜୁନିୟର ରେଡକ୍ରସ ତରଫରୁ କରୋନା ସଚେତନତା ଓ ଶୁଖିଲା ଖାଦ୍ୟ ବଣ୍ଟନ ଜାରି ରହିଛି । ଜୁନିୟର ରେଡକ୍ରସ୍ ପରାମର୍ଶ ଦାତା ବିରଞ୍ଚି ନାରାୟଣ ଦାଶଙ୍କ ପ୍ରଚେଷ୍ଠାରେ ବଙ୍ଗୋମୁଣ୍ଡା ବ୍ଳକ ଅନ୍ତର୍ଗତ ଖଇରାସ୍ଥିତ ଭରସା ଅନାଥ ଆଶ୍ରମରେ କରୋନା ସଚେତନ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା । ଶ୍ରୀ ଦାଶ କରୋନା କାଳରେ କିପରି ସାମାଜିକ ଦୂରତା ବଜାୟ ରଖିବା, ମାସ୍କ ପରିଧାନ କରିବା ଓ ସର୍ବୋପରି ହାତ ଧୋଇବା ଉପରେ ଅନ୍ତେବାସିନୀଙ୍କୁ ଅବଗତ କରାଇଥିଲେ । ତାପରେ ସେମାନଙ୍କୁ ଆର୍ଥିକ ସହାୟତା ସହିତ ମାସ୍କ, ସାବୁନ, ବିସ୍କୁଟ, ପାଉରୁଟି, ଚକୋଲେଟ, ଫଳ ଓ ପ୍ରସାଧନ ସାମଗ୍ରୀ ଦିଆଯାଇଥିଲା । ଏଥିପାଇଁ ଶ୍ରୀ ବୈକୁଣ୍ଠ ନାଥ ଦାଶ, ଶଶିଧର ନିଆଲ, ସାଧନା ଦାସ, ସବିତା ଭୋଇ ଆର୍ଥିକ ସାହାଯ୍ୟ ଯୋଗେଇ ଦେଇଥିଲେ । ପରିଶେଷରେ ଶ୍ରୀ ଦାଶ ବିଭିନ୍ନ ସ୍ଥାନରେ ଥିବା ଅନାଥ ଆଶ୍ରମ ଓ ବୃଦ୍ଧାଶ୍ରମକୁ ଏଭଳି ପରିସ୍ଥିତିରେ ସାହାଯ୍ୟ ସହଯୋଗ କରିବାକୁ ଜନସାଧାରଣଙ୍କୁ ଅନୁରୋଧ କରିଥିଲେ ।