ପ୍ରଧାନମନ୍ତ୍ରୀଙ୍କ ସ୍ମାରକୀ – ପ୍ରଧାନମନ୍ତ୍ରୀଙ୍କୁ ମିଳିଥିବା ଉପହାରର ଇ ନିଲାମ ପ୍ରକ୍ରିୟା ଅକ୍ଟୋବର ୩୧, ୨୦୨୬ ପର୍ଯ୍ୟନ୍ତ ବୃଦ୍ଧି

● ପ୍ରଧାନମନ୍ତ୍ରୀ ସ୍ମାରକୀ ନିଲାମର ଅଷ୍ଟମ ସଂସ୍କରଣରେ ଦିଲ୍ଲୀରୁ ୩୦ଟି ସ୍ମାରକୀ ସ୍ଥାନ ପାଇଛି
● ଏହି ସଂଗ୍ରହରେ କଳାକୃତି, ଧାର୍ମିକ ବସ୍ତୁ, ଅନୁଷ୍ଠାନିକ ସ୍ମାରକୀ ଏବଂ ସାର୍ବଜନୀନ ସଫଳତା ସହିତ ଜଡିତ ବିଭିନ୍ନ ସାମଗ୍ରୀ ଅନ୍ତର୍ଭୁକ୍ତ, ନିଲାମରୁ ପ୍ରାପ୍ତ ଅର୍ଥ ନମାମି ଗଙ୍ଗେ ପ୍ରକଳ୍ପ’ରେ ବିନିଯୋଗ କରାଯିବ

ନୂଆଦିଲ୍ଲୀ, (ପିଆଇବି) : ପ୍ରଧାନମନ୍ତ୍ରୀଙ୍କୁ ପ୍ରଦାନ କରାଯାଇଥିବା ଅନନ୍ୟ ଉପହାର ଏବଂ କଳାକୃତି ସମ୍ବଳିତ ପ୍ରଧାନମନ୍ତ୍ରୀ ସ୍ମାରକୀର ୮ମ ସଂସ୍କରଣ ବର୍ତ୍ତମାନ ଚାଲୁ ରହିଛି ଏବଂ ଏହାକୁ ୩୧ ଅକ୍ଟୋବର ୨୦୨୬ ପର୍ଯ୍ୟନ୍ତ ବୃଦ୍ଧି କରାଯାଇଛି।
ଏହି ସଂସ୍କରଣରେ ଦିଲ୍ଲୀର ବିବିଧ ଦିଗକୁ ପ୍ରତିଫଳିତ କରୁଥିବା ୩୦ଟି ଭିନ୍ନ ଭିନ୍ନ ସ୍ମାରକୀ ସାମିଲ ରହିଛି। ସର୍ବସାଧାରଣ ନିଲାମ ପାଇଁ ଉଦ୍ଦିଷ୍ଟ ଏହି ସଂଗ୍ରହରେ ବିଭିନ୍ନ ପ୍ରକାରର କଳାକୃତି, ଧାର୍ମିକ ବା ଆସ୍ଥାଭାବ ଜଡ଼ିତ ସାମଗ୍ରୀ, ହସ୍ତଶିଳ୍ପ ସାମଗ୍ରୀ ଏବଂ ବିଭିନ୍ନ ସଂସ୍ଥା ସହ ଜଡ଼ିତ ସ୍ମାରକୀ ରହିଛି, ଯାହା ଅନନ୍ୟ ସ୍ମାରକୀ ଭାବେ ସାଇତି ରଖାଯାଇପାରିବ। ଏହି ନିଲାମରୁ ମିଳିଥିବା ଅର୍ଥ ‘ନମାମି ଗଙ୍ଗେ ପ୍ରକଳ୍ପ’କୁ ପ୍ରଦାନ କରାଯିବ।
ଏହି ୩୦ଟି ସ୍ମାରକୀ ମଧ୍ୟରେ ନଅଟି ଫଟୋ ଫ୍ରେମ୍, ନଅଟି ସ୍ମାରକୀ ଏବଂ ଛଅଟି ମୂର୍ତ୍ତି ଓ ଭାସ୍କର୍ଯ୍ୟ, ପ୍ରତିମା ଅନ୍ତର୍ଭୁକ୍ତ। ଏହା ବ୍ୟତୀତ, ଏହି ସଂଗ୍ରହରେ ଦୁଇଟି ଦିଲ୍ଲୀ ମେଟ୍ରୋ ମଡେଲ୍, କ୍ରୀଡ଼ା ସମ୍ବନ୍ଧୀୟ ଏକ ସ୍ମାରକୀ ସାମଗ୍ରୀ, ଏକ ଚିତ୍ରକଳା ତଥା ବିଭିନ୍ନ କଳା ଓ ହସ୍ତଶିଳ୍ପ ସାମଗ୍ରୀ ମଧ୍ୟ ସାମିଲ ରହିଛି।
ଧାର୍ମିକ ଏବଂ ସାଂସ୍କୃତିକ ପରମ୍ପରା
ଏହି ସଂଗ୍ରହରେ ଭାରତର ଧାର୍ମିକ ପରମ୍ପରା ସହିତ ଜଡ଼ିତ ଅନେକ ସ୍ମାରକୀ ସାମିଲ ରହିଛି। ଏଥିମଧ୍ୟରୁ ଚାରୋଟି ସାମଗ୍ରୀ ଭଗବାନ ରାମ କିମ୍ବା ରାମାୟଣର ଦୃଶ୍ୟକୁ ଚିତ୍ରଣ କରେ। ଏଗୁଡ଼ିକ ମଧ୍ୟରେ ରହିଛି ଏକ ‘ରାମ ଦରବାର’ ମୂର୍ତ୍ତି; ପିତ୍ତଳ ଫଳକ ଯେଉଁଥିରେ ରାମ, ସୀତା ଓ ଲକ୍ଷ୍ମଣ କୈବର୍ତ୍ତଙ୍କ ସହ ନଦୀ ପାର ହେଉଥିବାର ଦୃଶ୍ୟ ରହିଛି ; ପାଲାମ ଗ୍ରାମର ସନ୍ଥ ‘ଦାଦା ଦେବ’ଙ୍କ ଏକ ଚିତ୍ର ; ଏବଂ ‘ରାମ ଲାଲ୍ଲା’ଙ୍କ କାଠରେ ତିଆରି ଏକ ଖୋଦିତ ମୂର୍ତ୍ତି।
ଏହି ସଂଗ୍ରହରେ ବୌଦ୍ଧ ଧର୍ମର ‘ଅଷ୍ଟମଙ୍ଗଳ’ (ଆଠଟି ଶୁଭ ପ୍ରତୀକ)ର ଏକ ପ୍ରତିରୂପ ମଧ୍ୟ ସାମିଲ ରହିଛି। ‘ଅଷ୍ଟମଙ୍ଗଳ’ ଭାବରେ ଜଣାଶୁଣା ଏହି ସ୍ମାରକୀଟି ଗଭୀର ଆଧ୍ୟାତ୍ମିକ ମହତ୍ତ୍ୱ ବହନ କରେ ଏବଂ ପାରମ୍ପରିକ ଭାବରେ ବୌଦ୍ଧ ଶିକ୍ଷା ତଥା ଭଗବାନ ବୁଦ୍ଧଙ୍କ ଜ୍ଞାନୋଦୟ ସହିତ ଜଡ଼ିତ ଅଟେ।
ଦିଲ୍ଲୀର ପ୍ରତିଷ୍ଠାନ ଏବଂ ଭିତ୍ତିଭୂମି
ଏହି ସଂଗ୍ରହରେ ଦିଲ୍ଲୀର ଅନେକ ଅନୁଷ୍ଠାନ ଏବଂ ଐତିହାସିକ ସ୍ଥାନର ପ୍ରତିନିଧିତ୍ୱ ଅନ୍ତର୍ଭୁକ୍ତ। ଏକ ଫ୍ରେମ୍ ହୋଇଥିବା କଳାକୃତି ସେଣ୍ଟ ଷ୍ଟିଫେନ୍ସ କଲେଜକୁ ଚିତ୍ରଣ କରିଥାଏ, ଯେତେବେଳେ ପୁରୁଣା ସଚିବାଳୟ କୋଠାର ଏକ ସ୍ଫଟିକ ସ୍ମାରକୀ ଏବଂ ନୂତନ ସଂସଦ କୋଠାର ପ୍ରତିନିଧିତ୍ୱ କରୁଥିବା ଏକ କପଡ଼ା କଳାକୃତି ଦିଲ୍ଲୀର ସାଂଗଠନିକ ଐତିହ୍ୟର ବିଭିନ୍ନ ଦିଗକୁ ପ୍ରତିଫଳିତ କରିଥାଏ।
ସାର୍ବଜନୀନ ଜୀବନ ଏବଂ କୃତିତ୍ୱ
ଏହି ସଂଗ୍ରହରେ ସଫଳତା, ଜନସେବା ଏବଂ ବ୍ୟକ୍ତିଗତ ଅଭିବ୍ୟକ୍ତିକୁ ପ୍ରତିଫଳିତ କରୁଥିବା ବିଭିନ୍ନ ସାମଗ୍ରୀ ସ୍ଥାନ ପାଇଛି। ଏଥିରେ ସାମିଲ ଥିବା ସାମଗ୍ରୀଗୁଡ଼ିକ ମଧ୍ୟରେ ରୋହିଣୀର ଜଣେ ଛାତ୍ରଙ୍କ ଦ୍ୱାରା ଅଙ୍କିତ ମାନ୍ୟବର ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଏକ ଅତ୍ୟନ୍ତ ସୂକ୍ଷ୍ମ ପେନ୍ସିଲ୍ ଚିତ୍ର (କ୍ଳୋଜ ଅପ୍ ପୋର୍ଟ୍ରେଟ୍) ରହିଛି।
ପାରାଲିମ୍ପିକ୍ ରୌପ୍ୟ ପଦକ ବିଜେତା ଯୋଗେଶ କାଥୁନିୟାଙ୍କ ଡିସକସ୍ କ୍ରୀଡ଼ା କ୍ଷେତ୍ରରେ ସଫଳତା ଓ ଦୃଢ଼ ମନୋବଳର ପ୍ରତୀକ ଅଟେ। ଏନସିସି ର ସ୍ୱର୍ଣ୍ଣ-ପଲିସ୍ଯୁକ୍ତ ‘ପରମ ବୀର ମାଟି କଳସ’ ସେବା ଓ ସ୍ମୃତିର ଭାବନାକୁ ବହନ କରେ। ଏହା ବ୍ୟତୀତ, ପ୍ରାକୃତିକ ଓ ଶିରାବିନ୍ୟାସଯୁକ୍ତ ବୋଧି ପତ୍ର ଉପରେ ଅତି ଯତ୍ନର ସହ ଅଙ୍କିତ ଏକ ଚିତ୍ର ବ୍ୟକ୍ତିଗତ ତଥା କଳାତ୍ମକ ଅଭିବ୍ୟକ୍ତିର ଏକ ନୂତନ ଦିଗକୁ ଯୋଡିଥାଏ।
ରୋହିଣୀର ଜଣେ ଛାତ୍ରଙ୍କଠାରୁ ଦିଲ୍ଲୀ ମେଟ୍ରୋ, ବିଧାନସଭା ଏବଂ ନୂତନ ସଂସଦ ପର୍ଯ୍ୟନ୍ତ, ଏହି ସ୍ମାରକୀଗୁଡ଼ିକ ଦିଲ୍ଲୀର ବିଭିନ୍ନ ସ୍ଥାନରୁ କାହାଣୀ ବହନ କରେ। ନିଲାମ ଏହି ସ୍ମୃତିଗୁଡ଼ିକୁ ଏକ ବୃହତ୍ତର ସାର୍ବଜନୀନ ଉଦ୍ଦେଶ୍ୟ ପ୍ରଦାନ କରେ। ଏଥିରୁ ହେଉଥିବା ଆୟ ନମାମି ଗଙ୍ଗେ ପ୍ରକଳ୍ପକୁ ଯିବ ।