ଖପ୍ରାଖୋଲ, (ଅଶୋକ କୁମାର ବାଗ) : ଖପ୍ରାଖୋଲ ଥାନା ଅନ୍ତର୍ଗତ କରୁଆଁଝର ଗ୍ରାମରେ ଭାଇ-ଭାଇ ମଧ୍ୟରେ ହୋଇଥିବା କଳହ ଗୁରୁତର ଆକ୍ରମଣର ରୂପ ନେଇଛି । ଘଟଣାରେ ଅନ୍ତର୍ଯ୍ୟାମୀ ଭୁଏ (ଆହତ) ଗୁରୁତର ଅବସ୍ଥାରେ ଭୀମସାର ବୁର୍ଲାରେ ଭର୍ତ୍ତି ହୋଇଛନ୍ତି । ପୋଲିସ ତଦନ୍ତରେ ଜଣାପଡ଼ିଛି, ଆହତ ଅନ୍ତର୍ଯ୍ୟାମୀ ଓ ଅଭିଯୁକ୍ତ ଫକିର ଭୁଏ ଦୁଇ ଜଣ ଭାଇଭାଇ । ସେମାନେ ଏକାଠି ଗୋଟିଏ ଘରରେ ରହୁଥିବାବେଳେ ପାରିବାରିକ କଳହ ପ୍ରାୟ ସମୟରେ ଜାରି ରହୁଥିଲା । ଘଟଣା ୨୮ ନଭେମ୍ବର ଅପରାହ୍ନ ୪ଟା ସମୟରେ ଘଟିଥିଲା । ଅଭିଯୁକ୍ତ ଫକିର ଭୁଏ ସେତେବେଳେ ନିଜ ସ୍ତ୍ରୀ ଡୁଲେଶ୍ୱରୀ ସହ ଝଗଡ଼ା କରୁଥିଲେ । ଏହି ସମୟରେ ଅନ୍ତର୍ଯ୍ୟାମୀ ଭୁଏ ଓ ତାଙ୍କ ସ୍ତ୍ରୀ ଜମିରୁ ଘରକୁ ଫେରୁଥିଲେ । ଘରେ ଝଗଡ଼ା ଦେଖି ସାନ ଭାଇକୁ କାହିଁକି ସବୁବେଳେ ନିଜ ସ୍ତ୍ରୀ ସହ ଝଗଡ଼ା କରୁଛୁ ବୋଲି କହିଥିଲେ । ଏହାକୁ ଶୁଣି ଫକିର ଭୁଏ ଉତ୍ୟକ୍ତ ହୋଇ ଅଶ୍ଳୀଳ ଗାଳି କରି ଘରୁ ଏକ ଟାଙ୍ଗିଆ ଆଣି ଅନ୍ତର୍ଯ୍ୟାମୀଙ୍କ ମୁଣ୍ଡ ଓ ଗାଲରେ ପର୍ଯ୍ୟାୟକ୍ରମେ ଦୁଇ ଆଘାତ କରିଥିଲେ । ଆଘାତ ସଂଘାତିକ ହେବାରୁ ଅନ୍ତର୍ଯ୍ୟାମୀ ଘଟଣା ସ୍ଥଳରେ ଟଳିପଡିଥିଲେ । ପ୍ରବଳ ରକ୍ତସ୍ରାବ ହେବାରୁ ପରିବାର ସଦସ୍ୟମାନେ ତାଙ୍କୁ ତୁରନ୍ତ ଖପ୍ରାଖୋଲ ଡାକ୍ତରଖାନାକୁ ନେଇଯାଇଥିଲେ । ସେଠାରୁ ଡାକ୍ତର ତାଙ୍କ ସ୍ଥିତି ଗୁରୁତର ଦେଖି ପ୍ରଥମେ ବଲାଙ୍ଗିର, ବଲାଙ୍ଗିରରୁ ଶେଷରେ ଭୀମସାର ବୁର୍ଲାକୁ ରେଫର କରିଛନ୍ତି । ଘଟଣା ପରେ ଅଭିଯୁକ୍ତ ଫକିର ଭୁଏ ଫେରାର ମାରିଥିଲା । ଲାଠୋର ଥାନା ଅଧିକାରୀ ରମାକାନ୍ତ ସାହୁ ସଫଳ ତଦନ୍ତ ପରେ ଅଭିଯୁକ୍ତକୁ ଗିରଫ କରି ଅପରାଧରେ ବ୍ୟବହୃତ ଟାଙ୍ଗିଆକୁ ଜବତ କରିଛି । ଏନେଇ ଲାଠୋର ଥାନା କେସ ନଂ ୨୭୯/୨୦୨୫ ରେ ଏକ ମାମଲା ରୁଜୁକରି ଅଭିଯୁକ୍ତକୁ କୋର୍ଟ ଚାଲାଣ କରାଯାଇଥିବା ଥାନାଧିକାରୀ ଶ୍ରୀ ସାହୁ ପ୍ରକାଶ କରିଛନ୍ତି ।
Next Post