● କେନ୍ଦ୍ର ମନ୍ତ୍ରୀ ଡକ୍ଟର ମନସୁଖ ମାଣ୍ଡଭୀୟ ଏବଂ ଶ୍ରୀ ଅଶ୍ୱିନୀ ବୈଷ୍ଣବଙ୍କ ଉପସ୍ଥିତିରେ ଯୁବ ବ୍ୟାପାର ଓ କ୍ରୀଡା ମନ୍ତ୍ରଣାଳୟ ଏବଂ ଡିଜିଟାଲ୍ ଇଣ୍ଡିଆ କର୍ପୋରେସନ ମଧ୍ୟରେ ଏମଓୟୁ
● ମାଇଁ ଭାରତ ୨.୦ ସଂସ୍କରଣ ୨୦୪୭ ସୁଦ୍ଧା ଅମୃତପିଢିଙ୍କୁ ସଶକ୍ତ କରିବ ଏବଂ ବିକଶିତ ଭାରତର ଦୃଷ୍ଟିକୋଣକୁ ଆଗକୁ ବଢ଼ାଇବ
● ମାଇଁ ଭାରତ ୨.୦ ଯୁବକମାନଙ୍କୁ ସ୍ମାର୍ଟ ସିଭି ବିଲ୍ଡର, ଏଆଇ ଚାଟବଟ୍ସ ଏବଂ ଭଏସ୍-ଆସିଷ୍ଟେଡ୍ ନେଭିଗେସନ୍ ସୁବିଧା ସହିତ ସକ୍ଷମ କରିବ
● ମାଇଁ ଭାରତ ୨.୦ ଜାତୀୟ କ୍ୟାରିଅର ସେବା, ମେଣ୍ଟରସିପ୍ ହବ୍ ଏବଂ ଫିଟ୍ ଇଣ୍ଡିଆ ପାଇଁ ସମର୍ପିତ ବିଭାଗ ରହିବ
● ମାଇଁ ଭାରତ ୨.୦ ଆଣ୍ଡ୍ରଏଡ୍ ଏବଂ ଆଇଓଏସ ଉପଭୋକ୍ତାଙ୍କ ପାଇଁ ସମ୍ପୂର୍ଣ୍ଣ କାର୍ଯ୍ୟକ୍ଷମ ମୋବାଇଲ୍ ଆପ୍ ଲଞ୍ଚ କରିବ
● ୧.୭୬ କୋଟିରୁ ଅଧିକ ଯୁବକ ଏବଂ ୧.୧୯ ଲକ୍ଷରୁ ଅଧିକ ସଂଗଠନ ମାଇଁ ଭାରତ ପ୍ଲାଟଫର୍ମରେ କରିଛନ୍ତି ପଞ୍ଜୀକରଣ
ନୂଆଦିଲୀ, (ପିଆଇବି) : ଦେଶର ଯୁବପିଢ଼ିଙ୍କ ସହିତ ଡିଜିଟାଲ୍ ସମ୍ପର୍କକୁ ସୁଦୃଢ଼ କରିବା ଦିଗରେ ଏକ ପ୍ରମୁଖ ପଦକ୍ଷେପ ସ୍ୱରୂପ, ଯୁବ ବ୍ୟାପାର ଓ କ୍ରୀଡା ମନ୍ତ୍ରଣାଳୟ ଆଜି ନୂଆଦିଲ୍ଲୀରେ ମାଇଁ ଭାରତ ୨.୦ ପ୍ଲାଟଫର୍ମର ବିକାଶ ପାଇଁ ଏକ ବୁଝାମଣାପତ୍ର ସ୍ୱାକ୍ଷର କରିଛି । ଇଲେକ୍ଟ୍ରୋନିକ୍ସ ଏବଂ ସୂଚନା ପ୍ରଯୁକ୍ତି ମନ୍ତ୍ରଣାଳୟର ଡିଜିଟାଲ୍ ଇଣ୍ଡିଆ କର୍ପୋରେସନ ସହିତ ଏହି ବୁଝାମଣା ହୋଇଛି । ଅପଗ୍ରେଡ୍ ବା ଉନ୍ନତ ହୋଇଥିବା ଏହି ଜାତୀୟ ଯୁବ ପ୍ଲାଟଫର୍ମ ଦେଶବ୍ୟାପୀ ଯୁବକମାନଙ୍କୁ ସଶକ୍ତ ଏବଂ ସଂଯୋଗ କରିବା ପାଇଁ ପ୍ରଯୁକ୍ତିବିଦ୍ୟା-ଚାଳିତ ସମାଧାନଗୁଡ଼ିକୁ ବ୍ୟବହାର କରିବ । କେନ୍ଦ୍ର ଯୁବ ବ୍ୟାପାର ଏବଂ କ୍ରୀଡା ଏବଂ ଶ୍ରମ ଏବଂ ନିଯୁକ୍ତି ମନ୍ତ୍ରୀ ଡକ୍ଟର ମନସୁଖ ମାଣ୍ଡଭୀୟ ଏବଂ ମାନ୍ୟବର କେନ୍ଦ୍ର ରେଳ, ସୂଚନା ଓ ପ୍ରସାରଣ ଏବଂ ଇଲେକ୍ଟ୍ରୋନିକ୍ସ ଓ ସୂଚନା ପ୍ରଯୁକ୍ତି ମନ୍ତ୍ରୀ ଶ୍ରୀ ଅଶ୍ୱିନୀ ବୈଷ୍ଣବଙ୍କ ଉପସ୍ଥିତିରେ ଏହି ବୁଝାମଣାପତ୍ର ସ୍ୱାକ୍ଷରିତ ହୋଇଥିଲା । ଏହି ଅବସରରେ ବିଭିନ୍ନ ମନ୍ତ୍ରଣାଳୟର ବରିଷ୍ଠ ଅଧିକାରୀମାନେ ଉପସ୍ଥିତ ଥିଲେ । ଯୁବବ୍ୟାପାର ବିଭାଗ ଯୁଗ୍ମ ସଚିବ ନିତେଶ କୁମାର ମିଶ୍ର ଏବଂ ଡିଜିଟାଲ୍ ଇଣ୍ଡିଆ କର୍ପୋରେସନର ପରିଚାଳନା ନିର୍ଦ୍ଦେଶକ ତଥା ସିଇଓ ଶ୍ରୀ ନନ୍ଦ କୁମାରମ୍ ବୁଝାମଣାପତ୍ରରେ ସ୍ୱାକ୍ଷର କରିଛନ୍ତି । ଏହି ଅବସରରେ ଅଶ୍ୱିନୀ ବୈଷ୍ଣବ କହିଛନ୍ତି, ଆଜି, ଯେତେବେଳେ ଆମେ ଜୀବନକୁ ପରିବର୍ତ୍ତନ କରୁଥିବା ସାର୍ବଜନୀନ ଡିଜିଟାଲ୍ ପ୍ଲାଟଫର୍ମ ନିର୍ମାଣ କରୁଛୁ, ମାଇଁ ଭାରତ ପଛରେ ଥିବା ବିଚାର ଆମେ ୟୁପିଆଇ, ଡିଜିଲକର କିମ୍ବା କମନ୍ କମ୍ପ୍ୟୁଟ୍ ସୁବିଧା ସହିତ ଯାହା କରିଛୁ ତାହାଠାରୁ ଭିନ୍ନ ନୁହେଁ । ଏଠାରେ ମଧ୍ୟ ଉଦ୍ଦେଶ୍ୟ ସମାନ। ଏଠି ଉଦ୍ଦେଶ୍ୟ ସହିତ ବ୍ୟାପକତା ଏବଂ ଗତି ସହିତ ପ୍ରଭାବକୁ ଯୋଡ଼ାଯାଇଛି । କେନ୍ଦ୍ର ଯୁବ ବ୍ୟାପାର ଓ କ୍ରୀଡା ଏବଂ ଶ୍ରମ ଓ ନିଯୁକ୍ତି ମନ୍ତ୍ରୀ ଡକ୍ଟର ମନସୁଖ ମାଣ୍ଡଭୀୟ କହିଛନ୍ତି, ଭାରତର ଜନସଂଖ୍ୟାର ୬୫% ଯୁବକ – ଆମର ସର୍ବୋତ୍ତମ ଶକ୍ତି ଏବଂ ସର୍ବୋତ୍ତମ ସୁଯୋଗ । ବୁଝାମଣାପତ୍ର ସ୍ୱାକ୍ଷର ପରେ, ମାଇଁ ଭାରତ ପ୍ଲାଟଫର୍ମ ଏବେ ମାଇଁ ଭାରତ ୨.୦ ରେ ବିକଶିତ ହେବା ପାଇଁ ଏକ ବ୍ୟାପକ ଅପଗ୍ରେଡ୍ ହେବ । ଏହି ଉନ୍ନତ ସଂସ୍କରଣ ବ୍ୟବହାରକାରୀ ଅଭିଜ୍ଞତା, ସୁଲଭତା ଏବଂ କାର୍ଯ୍ୟକ୍ଷମତାକୁ ଉନ୍ନତ କରିବା ପାଇଁ ନୂତନ ବୈଶିଷ୍ଟ୍ୟଗୁଡ଼ିକୁ ପ୍ରଚଳନ କରିବ । ବ୍ୟାପକତା ଓ ନମନୀୟତା ସୁନିଶ୍ଚିତ କରିବା ପାଇଁ ଏକ ମଡ୍ୟୁଲାର୍ ଆର୍କିଟେକ୍ଚର ପଦ୍ଧତି ବ୍ୟବହାର କରି ପ୍ଲାଟଫର୍ମକୁ ସମ୍ପୂର୍ଣ୍ଣ ପୁନଃନିର୍ମାଣ କରାଯିବ । ଏହା ସହିତ, ଆଣ୍ଡ୍ରଏଡ୍ ଏବଂ ଆଇଓଏସ ଉଭୟ ପାଇଁ ଏକ ସମ୍ପୂର୍ଣ୍ଣ କାର୍ଯ୍ୟକ୍ଷମ ମୋବାଇଲ୍ ଆପ୍ଲିକେସନ୍ ବିକଶିତ କରାଯିବ । ପ୍ଲାଟଫର୍ମର ବ୍ୟାକଏଣ୍ଡ ଭିତ୍ତିଭୂମିକୁ ସୁଦୃଢ଼ କରିବା ପାଇଁ ଏକ ସମର୍ପିତ କଲ୍ ସେଣ୍ଟର, ତାଲିମ ମଡ୍ୟୁଲ୍, କ୍ଲାଉଡ୍ ସେବା, ଏମଆଇଏସ (ପରିଚାଳନା ସୂଚନା ପ୍ରଣାଳୀ), ଏବଂ ଇମେଲ୍ ଏବଂ ଏସଏମଏସ ସେବା ସମେତ ଯୋଗାଯୋଗ ଉପକରଣ ଭଳି ସମର୍ଥନ କାର୍ଯ୍ୟ ପ୍ରତିଷ୍ଠା କରାଯିବ । ଯୁବବ୍ୟାପାର ବିଭାଗ ସଚିବ ଡକ୍ଟର ପଲ୍ଲବୀ ଜୈନ କହିଛନ୍ତି, ମାଇଁ ଭାରତ ୨.୦ ସଂସ୍କରଣ ମଧ୍ୟ ଆଧାର, ଡିଜିଲକର, ଭାଷିନୀ ଏବଂ ମାଇଁ ଭଳି ଜାତୀୟ ଡିଜିଟାଲ ପ୍ଲାଟଫର୍ମଗୁଡ଼ିକ ସହିତ ସୁଗମ ସମନ୍ୱୟ ପ୍ରଦାନ କରିବ, ଯାହା ଆନ୍ତଃକାର୍ଯ୍ୟକ୍ଷମତା ଏବଂ ଏକୀକୃତ ଉପଭୋକ୍ତା ଅଭିଜ୍ଞତା ସୁନିଶ୍ଚିତ କରିବ । ସେହିପରି ଡିଜିଟାଲ ଇଣ୍ଡିଆ କର୍ପୋରେସନର ସିଇଓ ନନ୍ଦ କୁମାରମ କହିଛନ୍ତି, ମାଇଁ ଭାରତ ୨.୦ ସଂସ୍କରଣ ୨୦୪୭ ସୁଦ୍ଧା ଅମୃତପିଢିଙ୍କୁ ସଶକ୍ତ କରିବ ଏବଂ ବିକଶିତ ଭାରତର ଦୃଷ୍ଟିକୋଣକୁ ଆଗକୁ ବଢ଼ାଇବ । ଏହା ଯୁବକମାନଙ୍କୁ ସ୍ମାର୍ଟ ସିଭି ବିଲ୍ଡର, ଏଆଇ ଚାଟବଟ୍ସ ଏବଂ ଭଏସ୍-ଆସିଷ୍ଟେଡ୍ ନେଭିଗେସନ୍ ସୁବିଧା ସହିତ ସକ୍ଷମ କରିବ । ଏଥିରେ ଜାତୀୟ କ୍ୟାରିଅର ସେବା, ମେଣ୍ଟରସିପ୍ ହବ୍ ଏବଂ ଫିଟ୍ ଇଣ୍ଡିଆ ପାଇଁ ସମର୍ପିତ ବିଭାଗ ରହିବ । ପୂର୍ବରୁ ମାଇଁ ଭାରତ ପ୍ଲାଟଫର୍ମର ପ୍ରଥମ ସଂସ୍କରଣକୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ୩୧ ଅକ୍ଟୋବର ୨୦୨୩ରେ ଶୁଭାରମ୍ଭ କରିଥିଲେ । ବର୍ତ୍ତମାନ ସୁଦ୍ଧା, ୧.୭୬ କୋଟିରୁ ଅଧିକ ଯୁବକ ଏବଂ ୧.୧୯ ଲକ୍ଷରୁ ଅଧିକ ସଂଗଠନ ମାଇଁ ଭାରତ ପ୍ଲାଟଫର୍ମରେ ପଞ୍ଜିକୃତ ହୋଇସାରିଛନ୍ତି ।
