ରାଉରକେଲା, (ସସ୍ମିତା ପ୍ରଧାନ) : ପଣ୍ଡିତ ଦୁର୍ଗା ଚରଣ କର ସାହିତ୍ୟ ସଂସଦ କେରାର ବସନ୍ତ କବିତା ଆସର “ଚୋରା ମଳୟ” କାର୍ଯ୍ୟକ୍ରମ ଆସନ୍ତା ମାର୍ଚ୍ଚ ୩୦ ତାରିଖ ରବିବାର ଦିନ ମାଆ ଭଗବତୀ କେରା ଠାକୁରାଣୀ ମନ୍ଦିର ପ୍ରାଙ୍ଗଣ ରେ ଅନୁଷ୍ଠିତ ହେବାକୁ ଯାଉଛି । ଉକ୍ତ କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ ବିଶିଷ୍ଟ ବ୍ୟଙ୍ଗ କବି ସତ୍ୟନାଶ ଯୋଗଦେବେ । ଓଡ଼ିଶାର ବିଭିନ୍ନ କୋଣ ଅନୁକୋଣ ସହିତ ଅବିଭକ୍ତ ସିଂହଭୂମି, ଝାଡ଼ଖଣ୍ଡର ଅନେକ କବି ସାହିତ୍ୟିକ ଏହି କାର୍ଯ୍ୟକ୍ରମରେ ଅଂଶ ଗ୍ରହଣ କରି ନିଜର କବିତା ପାଠ କରିବେ । ଝାଡ଼ଖଣ୍ଡ ରାଜ୍ୟ ରେ ଓଡ଼ିଆ ଭାଷା ସାହିତ୍ୟ ଓ ସଂସ୍କୃତିର ସୁରକ୍ଷା ଦିଗରେ ପଣ୍ଡିତ ଦୁର୍ଗା ଚରଣ କର ସାହିତ୍ୟ ସଂସଦ କେରା ଦୀର୍ଘ ଛଅ ବର୍ଷ ଧରି ଅବିରତ କାର୍ଯ୍ୟ କରି ଚାଲିଛି । ଉକ୍ତ ଅନୁଷ୍ଠାନ ଦୁଇଟି ବର୍ଣ୍ଣାଢ୍ୟ ସାହିତ୍ୟ ଆସର ସହିତ ମାଣବସା ଲକ୍ଷ୍ମୀ ପୁରାଣ ପାଠ ପ୍ରତିଯୋଗିତା ଏବଂ ଉତ୍କଳ ସମ୍ମିଳନୀ ପକ୍ଷରୁ ନିୟୋଜିତ ଅବିଭକ୍ତ ସିଂହଭୂମିର ସମସ୍ତ ଓଡ଼ିଆ ଶିକ୍ଷକ ଶିକ୍ଷୟତ୍ରୀ ମାନଙ୍କୁ ପ୍ରଶଂସା ପତ୍ର ପ୍ରଦାନ କରି ନିଜର ଦାୟିତ୍ୱ ନିର୍ବାହ କରିଛି । ଅନୁଷ୍ଠାନର ସଭାପତି ବୟୋଜ୍ୟେଷ୍ଠ ସାହିତ୍ୟ ଅନୁରାଗୀ ମୋତିଲାଲ କର କହିଛନ୍ତି କି ଏ ବର୍ଷ ବସନ୍ତ କବିତା ଆସର “ଚୋରା ମଳୟ” କାର୍ଯ୍ୟକ୍ରମ ରେ ମୁଖ୍ୟ ଅତିଥି ଭାବେ ଓଡ଼ିଶାର ବିଶିଷ୍ଟ ବ୍ୟଙ୍ଗ କବି ସତ୍ୟନାଶ ଯୋଗଦେବେ ବୋଲି କଥା ଦେଇଛନ୍ତି ।ତେଣୁ ବିଚ୍ଛିନ୍ନାଞ୍ଚଳର ସମସ୍ତ ଓଡ଼ିଆ ଭାଷା ପ୍ରେମୀ ମାନଙ୍କୁ ଉକ୍ତ କାର୍ଯ୍ୟକ୍ରମ ରେ ସାମିଲ ହୋଇ କାର୍ଯ୍ୟକ୍ରମକୁ ସଫଳ କରିବା ପାଇଁ ଅନୁରୋଧ କରିଛନ୍ତି ।