ରାଉରକେଲା, (ସସ୍ମିତା ପ୍ରଧାନ) : ଇମେଟ୍ ଆବାକସ ଏକାଡେମୀ ତରଫରୁ ଦ୍ୱିଦିବସୀୟ ଚେସ୍ ଟୁର୍ଣ୍ଣାମେଣ୍ଟ ସେକ୍ଟର ୫ ସ୍ଥିତ ଦୀପିକା ପ୍ରାଇମେରୀ ସ୍କୁଲ ଠାରେ ଅନୁଷ୍ଠିତ ହୋଇଯାଇଛି । ଏହି କାର୍ଯ୍ୟକ୍ରମରେ ମୁଖ୍ୟ ଆୟୋଜକ ଭାବେ ଆବାକସର ସ୍ଥାନୀୟ ମୁଖ୍ୟ ସନ୍ଧ୍ୟା ସାହୁଙ୍କ ଆବାହକତ୍ୱରେ ଆୟୋଜିତ ଏହି ଟୁର୍ଣ୍ଣାମେଣ୍ଟରେ ସହରର ବିଭିନ୍ନ ବିଦ୍ୟାଳୟରୁ ୧୦୬ଜଣ ଶିକ୍ଷାର୍ଥୀ ଅଂଶଗ୍ରହଣ କରିଥିଲେ । ଚେସ୍ ଆରବିଟର ପ୍ରଫୁଲ୍ଲ କୁମାର ସାହୁଙ୍କ ପ୍ରତ୍ୟକ୍ଷ ତତ୍ତ୍ଵାବଧାନରେ ଆୟୋଜିତ ଏହି ଟୁର୍ଣ୍ଣାମେଣ୍ଟରେ ୭, ୯, ୧୧, ୧୩, ୧୫ବର୍ଷ ଭିତରେ ଥିବା ଛାତ୍ରଛାତ୍ରୀମାନେ ଏଥିରେ ଅଂଶଗ୍ରହଣ କରିଥିଲେ । ଉଦ୍ଯାପନୀ କାର୍ଯ୍ୟକ୍ରମରେ ଏନ୍ଆଇଟିର ପ୍ରଫେସର ବିବିଭିଏଲ୍ ଦୀପକ ମୁଖ୍ୟଅତିଥି ଓ ଦୀପିକା ଇଂରାଜୀ ମାଧ୍ୟମ ବିଦ୍ୟାଳୟ ଅଧ୍ୟକ୍ଷ ପ୍ରବୀଣ କୁମାର ଜେନା ସମ୍ମାନିତ ଅତିଥି ଭାବେ ଯୋଗଦେଇ ଏହି ଟୁର୍ଣ୍ଣାମେଣ୍ଟରେ କୃତିତ୍ୱ ହାସଲ କରିଥିବା ପ୍ରତିଯୋଗୀଙ୍କୁ ପୁରସ୍କୃତ କରିଥିଲେ । ଅନ୍ୟ ମାନଙ୍କ ମଧ୍ୟରେ ଶ୍ୟାମ ହେମ୍ବ୍ରମ, ପ୍ରଦୀପ କୁମାର ବିଶୋଇ, ରୀନା ଟପ୍ପୋ, ଲିଲି ମାକ୍ସିମା ମିଞ୍ଜ, ଚିନ୍ମୟ ସାହୁ, ଚମ୍ପାବତୀ ଅମାତ ପ୍ରମୁଖ ଉପସ୍ଥିତ ରହି କାର୍ଯ୍ୟକ୍ରମ ପରିଚାଳନାରେ ସହଯୋଗ କରିଥିଲେ । ଅତିଥି ମାନେ ସେମାନଙ୍କ ବକ୍ତବ୍ୟରେ ଏହି ଖେଳ ମାନସିକ ସ୍ଥିତିକୁ ଦୃଢ଼ କରିବା ସହ ଏକାଗ୍ରତା ବଢାଇ ଥାଏ ବୋଲି ମତ ରଖିବା ସହ ଆବାକସର ଏଭଳି କାର୍ଯ୍ୟକୁ ପ୍ରଶଂସା କରିଥିଲେ । ଶେଷରେ ଆରବିଟର ଶ୍ରୀ ସାହୁ ଧନ୍ୟବାଦ ଅର୍ପଣ କରିଥିଲେ ।