ବଲାଙ୍ଗିର, (କେପିଏନ୍ଏସ୍) : ବଲାଙ୍ଗିର ଜିଲ୍ଲା ପାଟଣାଗଡ ଫରେଷ୍ଟ ରେଞ୍ଜରୁ ପ୍ରତିଦିନ ବ୍ୟାପକ ଭାବେ ଖଇର କାଠ ଚୋରା ଚାଲାଣ ହେଉଥିବା ପୁଣି ଥରେ ସ୍ପଷ୍ଟ ହୋଇଯାଇଛି । କାଠ ମାଫିଆମାନେ ରାତି ଅଧିଆ ଲୋଇସିଂହା ବନାଞ୍ଚଳ ଅଧୀନ ରେଙ୍ଗାଲି – ଫଲସାମା – ଉପରବାହାଲ ରାସ୍ତାରେ କାଠ ଚାଲାଣ କରୁଥିବା ଜଣାପଡିଛି । ସୋମବାର ରାତିରେ ଏକ ୪୦୭ ଗାଡ଼ି ଯୋଗେ ବିପୁଳ ପରିମାଣର ଖଇର କାଠ ଚୋରା ଚାଲାଣ ହେଉଥିବା ବେଳେ ଲୋଇସିଂହା ବ୍ଲକ ଉପରବାହାଲ ପଞ୍ଚାୟତ ଅନ୍ତର୍ଗତ ସାନ ଝାଙ୍କରପାଲି ନିକଟରେ ଗାଡ଼ିଟି ଓଲଟି ପଡିଥିବା ଜଣାପଡିଛି । ତେବେ ଦୁର୍ଘଟଣା ସ୍ଥଳରେ କେହି ନଥିବା ବେଳେ ୪୦୭ ଗାଡ଼ିରେ ବ୍ୟାପକ ପରିମାଣର ଖଇର କାଠ ଗଣ୍ଡି ବୋଝେଇ ହୋଇ ରହିଥିବା ଦେଖିବାକୁ ମିଳିଛି । ଲୋଇସିଂହା ବନ ବିଭାଗ ଅଧିକାରୀ ଘଟଣାସ୍ଥଳରେ ପହଞ୍ଚି ଗାଡ଼ି ଜବତ କରିବା ସହିତ ଅଧିକ ତଦନ୍ତ ଜାରି ରଖିଥିବା ଜଣାପଡିଛି ।