ଗଞ୍ଜାମ, (ପ୍ରଦୀପ କୁମାର ପଣ୍ଡା) : ଗଞ୍ଜାମ ସହର ସ୍ଥିତ ପୁରୁଣା ପେଟ୍ରୋଲ ପମ୍ପ ପଡିଆରେ ଭାରତୀୟ କମ୍ୟୁନିଷ୍ଟ ପାର୍ଟିଭାରତର କମ୍ୟୁନିଷ୍ଟ ପାର୍ଟି (ମାକ୍ସବାଦୀ )ଷୋଡଶ ଗଞ୍ଜାମ ଜିଲ୍ଲା ସମ୍ମିଳନୀ ଅବସରରେ ଖୋଲା ଅଧିବେଶନ ଶନିବାର ଅନୁଷ୍ଠିତ ହୋଇଥିଲା । ଏହି ଅବସରରେ ପୂର୍ବତନ ସରପଞ୍ଚ ତଥା ଆଞ୍ଚଳିକ କମିଟି ସମ୍ପାଦକ ସାଥି ଦିଲ୍ଲୀପ କୁମାର ଛୋଟରାୟଙ୍କ ନେତୃତ୍ୱରେ ଶତାଧିକ ମହିଳା ପୁରୁଷ ତ୍ରିବେଣୀ ମଠ ଛକରୁ ଏକ ବିଶାଳ ରାଲିରେ ବାହାରି ବଡ଼ ବଜାର ଓ ସାନ ବଜାର ପରିକ୍ରମା କରି ସଭା ସ୍ଥଳ ଠାରେ ପହଂଚିବା ପରେ ସଭା ଆରମ୍ଭ ହୋଇଥିଲା । ରାଜ୍ୟ କମିଟି ସଦସ୍ୟ ରାମଚନ୍ଦ୍ର ନାୟକଙ୍କ ସଭାପତିତ୍ୱରେ ଆୟୋଜିତ ସଭାରେ ରାଜ୍ୟ ସମ୍ପାଦକ ଅଳିକିଶୋର ପଟ୍ଟନାୟକ, ଜିଲ୍ଲା ସମ୍ପାଦକ କୈଳାଶ ଷଢଙ୍ଗୀ, ସମ୍ପାଦକ ଯୁଧିଷ୍ଠିର ବେହେରା, ପୂର୍ବତନ ସମିତି ସଭ୍ୟ ପି. ହରେକୃଷ୍ଣ ରେଡ୍ଡୀ, କ୍ଷେତ ମୁଲିଆ ନେତା ବିଦ୍ୟାଧର ଜେନା ପ୍ରମୁଖ ଉପସ୍ଥିତ ରହି ଭାଜପା ଶାସିତ କେନ୍ଦ୍ର ଓ ରାଜ୍ୟ ସରକାରଙ୍କ ଉପରେ ବର୍ଷୀଥିଲେ । ରାଜ୍ୟରେ ବର୍ତମାନ କୃଷି ଓ କୃଷକଙ୍କ ଅବସ୍ଥା ସଙ୍କଟପର୍ଣ୍ଣ । ଏଥିପାଇଁ ପ୍ରତି ଅଧଘଣ୍ଟାରେ ଜଣେ ଚାଷୀ ଆତ୍ମହତ୍ୟା କରୁଛନ୍ତି ବୋଲି ବାମପନ୍ଥୀ ନେତା ମାନେ କହିଥିଲେ । ଏହି ଜିଲ୍ଲାରେ ମୁଖ୍ୟତଃ ଧାନ ଚାଷ ହେଉଛି ମୁଖ୍ୟ ଫସଲ । ଚାଷୀର ଧାନ ବିକ୍ରି ପାଇଁ ଧାନ ରଖିବା ବ୍ୟବସ୍ଥା ନଥିବା ଯୋଗୁଁ ମିଲର ମାନଙ୍କ ଦୟାରେ ମଣ୍ଡି ଚାଲୁଛି ବୋଲି କମ୍ୟୁନିଷ୍ଟ ଦଳର ନେତା ମାନେ ଅଭିଯୋଗ କରିଛନ୍ତି । ଏନେଇ ଏଗାର ଦଫା ଦାବି ରଖିଛନ୍ତି ଦଳ । ସେଗୁଡିକ ହେଲା ଡ. ଏମ୍ଏସ୍ ସ୍ୱାମିନାଥନ କମିଟି ସୁପାରିଶ କାର୍ଯ୍ୟକାରୀ କରିବା, ଚାଷୀ ଉତ୍ପାଦିତ ସମସ୍ତ ଫସଲ ଖର୍ଚ୍ଚ ଦେଢ଼ ଗୁଣ ଦେବା, ଧାନର ମାନ କୋହଳ କରି କ୍ୱିଣ୍ଟାଲ ପିଛା ୩୫୦୦ରେ କ୍ରୟ କରିବା, ଚାଷୀର ସମସ୍ତ ଋଣ ଛାଡ଼ କରିବା ଚାଷୀଙ୍କୁ ୧ ଲକ୍ଷ ଟଙ୍କା ପର୍ଯ୍ୟନ୍ତ ଋଣ ଦେବା, ୫ ହଜାର ଟଙ୍କା ଭତ୍ତା ବୃଦ୍ଧି ଆଦି ଦାବି ରହିଛି । ଏଥିସହ ବିଭିନ୍ନ ଅତ୍ୟାବଶକ ସାମଗ୍ରୀର ଦରବୃଦ୍ଧି ଯୋଗୁଁ ଗରିବ ଜନସଧାରଣ ନାନା ପ୍ରକାର ହଇରାଣ ହେଉଛନ୍ତି । ତୁରନ୍ତ ଦରଦାମ ବୃଦ୍ଧିରେ ରୋକ ଲଗାଇବାକୁ କଡା ଚେତାବନୀ ଦେଇଛି ଦଳ । ତା’ନହେଲେ ଆଗାମୀ ଦିନରେ ବଡ ଧରଣର ଆନ୍ଦୋଳନ କରାଯିବ ବୋଲି ଦଳୀୟ ନେତା ମାନେ ଗଣମାଧ୍ୟମକୁ ସୂଚନା ଦେଇଛନ୍ତି ।