ଦେଓଗାଁ, (ମନୀଷ କୁମାର ସାହୁ) : ଦେଓଗାଁ ଥାନାର ଦେଓଗାଁ- ଭୁତିଆରବାହାଲ ରାସ୍ତାର ସିକୁଆଁ ଛକଠାରେ ମା’ କ୍ରସର୍ର ଏକ ହାଇୱା ଗାଡ଼ି ବାଇକ୍କୁ ଧକ୍କା ଦେବାରୁ ବାଇକ୍ ଆରୋହୀଙ୍କ ମୃତ୍ୟୁ ଘଟିଥିଲା । ବାଇକ୍ରେ ଥିବା ଅନ୍ୟ ଜଣେ ଗୁରୁତର ହୋଇଥିଲେ । ମୃତକ ଜଣକ ବଲାଙ୍ଗିର ସଦର ଥାନା ବାନିପାଲି ଗାଁର ହରିହର ବରିହା ବୋଲି ଜଣାପଡ଼ିଛି । ଗୁରୁତର ନଟ ବରିହାଙ୍କୁ ସ୍ଥାନୀୟ ଡାକ୍ତରଖାନାକୁ ନିଆଯାଇଥିଲା । ପୁଲିସ ହାଇୱା ଗାଡ଼ିକୁ ଜବତ କରି ତଦନ୍ତ ଜାରି ରଖିଛି । ସେହିପରି ୨୬ ନଂ ଜାତୀୟ ରାଜପଥ ଦେଓଗାଁ କଲେଜ ଛକଠାରେ ଭାରସାମ୍ୟ ହରାଇ ଏକ କାର୍ ବିଦ୍ୟୁତ୍ ଖୁଣ୍ଟରେ ପିଟିହୋଇ ଦୁର୍ଘଟଣାଗ୍ରସ୍ତ ହୋଇଛି । କାର ଭିତରେ ଥିବା ଯାତ୍ରୀମାନେ ଅଳ୍ପକେ ବର୍ତ୍ତି ଯାଇଥିଲେ । ଠିକ୍ ସେହିପରି ଅପରାହ୍ନରେ ଦେଓଗାଁ-ଉଡ଼ାର ରାସ୍ତାର ଉଡ଼ାର ଗାଁ ମୁଣ୍ଡରେ ୨ ଟି ବାଇକ୍ ମଧ୍ୟରେ ମୁହାଁମୁହିଁ ଧକ୍କା ହୋଇଛି । ଏଥିରେ ୫ ଜଣ ଗୁରୁତର ହୋଇ ବଲାଙ୍ଗିର ଭୀମଭୋଇ ମେଡିକାଲରେ ଚିକିତ୍ସିତ ହେଉଥିବା ପୁଲିସ ସୂଚନା ଦେଇଛି ।