ବଲାଙ୍ଗିର, (କେପିଏନ୍ଏସ୍) : ଗାନ୍ଧୀନଗର ପଡା ସ୍ଥିତ ଗାନ୍ଧୀ ପ୍ରତିମା ନିକଟରେ, ଅଖିଳ ଭାରତୀୟ ଯୁବ କଂଗ୍ରେସ କମିଟି ରାଷ୍ଟ୍ରୀୟ ପ୍ରବକ୍ତା ଅଙ୍କିତ ସାହୁଙ୍କ ଅଧ୍ୟକ୍ଷତାରେ ବଲାଙ୍ଗିର ଜିଲ୍ଲା ଯୁବ କଂଗ୍ରେସ କମିଟି ଦ୍ଵାରା କ୍ରାନ୍ତି ଦିବସ ପାଳନ କରାଗଲା । କ୍ରାନ୍ତି ଦିବସ ଭାରତୀୟ ଜାତୀୟ ସ୍ଵାଧୀନତା ଆନ୍ଦୋଳନରେ ଏକ ଗୁରୁତ୍ୱପୂର୍ଣ୍ଣ ଦିନ ଭାବେ ପାଳନ କରାଯାଏ । ଏହା ଅଧିନେ, ୧୯୪୨ ମସିହାରେ ମହାତ୍ମା ଗାନ୍ଧୀଙ୍କ ନେତୃତ୍ୱରେ ଚାଲିଥିବା ‘ଭାରତ ଛାଡ଼’ ଆନ୍ଦୋଳନର ସ୍ମୃତିରେ ପ୍ରତିବର୍ଷ ୯ ଅଗଷ୍ଟରେ ଏହି ଦିବସ ପାଳିତ ହୁଏ । ଏହା ଭାରତୀୟ ସ୍ଵାଧୀନତା ସଂଗ୍ରାମୀ ମାନଙ୍କର ତ୍ୟାଗ ଓ ସଂଘର୍ଷକୁ ସ୍ମରଣ କରାଏ । ଏହି ସୁଅବସରରେ, ବଲାଙ୍ଗିର ଜିଲ୍ଲା ଯୁବ କଂଗ୍ରେସ କମିଟି ମହାତ୍ମା ଗାନ୍ଧୀଙ୍କ ପ୍ରତିମାରେ ମାଲ୍ୟାପର୍ଣ୍ଣ କରି ଏବଂ ସ୍ଵାଧୀନତା ସଂଗ୍ରାମରେ ଅମର ଶହୀଦମାନଙ୍କୁ ସ୍ମରଣ କରି ନତମସ୍ତକ ହେଲେ । ଏହା ସହିତ, ଭାରତୀୟ ଜାତୀୟ ଯୁବ କଂଗ୍ରେସର ପ୍ରତିଷ୍ଠା ଦିବସ ମଧ୍ୟ ପାଳନ କରାଗଲା । ଏହି ସଂଗଠନ ଦେଶର ଯୁବପିଢ଼ିଙ୍କ ମଧ୍ୟରେ ଜାତୀୟତା ଭାବ ଉଦ୍ରେକ କରିବା ପାଇଁ ସର୍ବଦା ଚେଷ୍ଟା କରିବା ସହ ଯୁବବର୍ଗଙ୍କ ସହ ହେଉଥିବା ଅନ୍ୟାୟ, ଅନୀତିରେ ସେମାନଙ୍କ ସହ ଛିଡା ହୋଇଥାଏ ବୋଲି ବକ୍ତାମାନେ ମତପୋଷଣ କରିଥିଲେ । ଲୋଇସିଂହା ଅଞ୍ଚଳରେ ଭାରତୀୟ ଯୁବ କଂଗ୍ରେସ ସଦସ୍ୟମାନଙ୍କ ଦ୍ଵାରା ଏକ ବୃକ୍ଷରୋପଣ କାର୍ଯ୍ୟକ୍ରମ ଆୟୋଜିତ କରାଗଲା । ଏହି କାର୍ଯ୍ୟକ୍ରମର ଉଦ୍ଦେଶ୍ୟ ପରିବେଶ ସୁରକ୍ଷା ଓ ଅଧିକ ପରିବେଶାନୁକୂଳ ଜୀବନ ପ୍ରତି ଆଗ୍ରହ ବୃଦ୍ଧି କରାଇବା ଥିଲା । ଏହି କାର୍ଯ୍ୟକ୍ରମରେ ପୂର୍ବତନ ଜିଲ୍ଲା କଂଗ୍ରେସ କମିଟି କାର୍ଯ୍ୟକାରୀ ସଭାପତି ମନୀଷ ମିଶ୍ର, ଜିଲ୍ଲା କଂଗ୍ରେସ ପ୍ରବକ୍ତା ଅଜୟ ବାଲି, କୋଷାଧ୍ୟକ୍ଷ ଜୁଲୁ ପଟ୍ଟନାୟକ, କିଷାନ କଂଗ୍ରେସ ସଭାପତି ସାନନ୍ଦ ମିଶ୍ର, ବଲାଙ୍ଗିର ବିଧାନସଭା ଯୁବ କଂଗ୍ରେସ କମିଟି ସଭାପତି ନାଶିର ଖାନ, ଲୋଇସିଂହା ବିଧାନସଭା ଯୁବ କଂଗ୍ରେସ କମିଟି ସଭାପତି ସଂଜୀବ ନାଗ, ବରିଷ୍ଠ କଂଗ୍ରେସ ନେତା ଟିଟୁ ମହାନ୍ତି, ରାଜା ଖାନ, କିରଣ ସେଠ, ଛାତ୍ର ନେତା ଚିନ୍ମୟ ବେହେରା, ମନୋରଞ୍ଜନ ବିଶ୍ୱାଳ, ସାନୁ ମନହିରା, ଆଶିଷ ମହାରଣା ଏବଂ ଆୟାସ ପଣ୍ଡା ପ୍ରମୁଖ ଉପସ୍ଥିତ ଥିଲେ ।
