ଆନ୍ତର୍ଜାତୀୟ ବନ୍ଧୁତ୍ଵ ଦିବସ

ଡେଲାଙ୍ଗ, (ଦିଲ୍ଲୀପ କୁମାର ଧାଉଡିଆ) : ପ୍ରତିବର୍ଷ ଜୁଲାଇ ୩୦ରେ ‘ଆନ୍ତର୍ଜାତୀୟ ବନ୍ଧୁତ୍ଵ ଦିବସ’ ପାଳନ କରାଯାଏ । ଏହି ଦିବସରେ ବନ୍ଧୁମାନଙ୍କୁ ସମ୍ମାନିତ କରିବା ଏବଂ ଆମ ଜୀବନରେ ଉନ୍ନତି ଆଣିବାରେ ସେମାନଙ୍କର ଗୁରୁତ୍ୱପୂର୍ଣ୍ଣ ଭୂମିକାକୁ ପ୍ରଶଂସା କରିବା । ବନ୍ଧୁମାନେ ଆମ ଜୀବନକୁ ରୁଦ୍ଧିମନ୍ତ କରନ୍ତି, ଆମ ସହିତ ଯାତ୍ରା କରନ୍ତି, ଆବଶ୍ୟକ ବେଳେ ଆମର ସମସ୍ୟା ଶୁଣନ୍ତି ଏବଂ ସୁଚିନ୍ତିତ ପରାମର୍ଶ ମଧ୍ୟ ଦିଅନ୍ତି । କେବଳ ଦୁଃଖ କଷ୍ଟ ସମୟରେ ନୁହେଁ, ଆନନ୍ଦ ବାଣ୍ଟିବାରେ, ଆମ ସହିତ ସବୁ ସମୟରେ ଅର୍ଥାତ୍ ସୁଖ ଦୁଃଖରେ ଯୋଗ ଦିଅନ୍ତି ଯାହା ଆମ ପାଇଁ ସର୍ବଦା ଏକ‌ ପ୍ରକାର ଦୃଢ ସମର୍ଥନ । ଉତ୍ତମ ସାଙ୍ଗ ବନ୍ଧୁ ମାନଙ୍କ ବିନା ଦୁନିଆରେ ବଞ୍ଚିବାକୁ ହେଲେ ଅଧିକ ଆହ୍ଵାନର ସାମ୍ନା କରିବାକୁ ହେବ । ମିଳିତ ଜାତିସଂଘ ସାଧାରଣ ସଭା ଦ୍ୱାରା‌ ୨୦୧୧ରେ ଏହି ଦିବସ ପାଳନ ବିଷୟରେ ଘୋଷଣା କରାଯାଇଥିଲା । ଉଦ୍ଦେଶ୍ୟ ଥିଲା ଏଭଳି ଏକ ଧାରଣାକୁ ପ୍ରୋତ୍ସାହିତ କରିବା ଯେ ‘ଲୋକ, ଦେଶ, ସଂସ୍କୃତି ଏବଂ ବ୍ୟକ୍ତିବିଶେଷଙ୍କ ମଧ୍ୟରେ ବନ୍ଧୁତା ଶାନ୍ତି ପ୍ରୟାସକୁ ପ୍ରେରଣା ଦେଇପାରେ ଏବଂ ସମ୍ପ୍ରଦାୟ ମଧ୍ୟରେ ସେତୁ ନିର୍ମାଣ କରିପାରିବ । ଏହି ସଂକଳ୍ପରେ ଯୁବକମାନେ, ଭବିଷ୍ୟତର ନେତା ଭାବରେ, ସମ୍ପ୍ରଦାୟର କାର୍ଯ୍ୟକଳାପରେ ବିଭିନ୍ନ ସଂସ୍କୃତି ଅନ୍ତର୍ଭୁକ୍ତ ଏବଂ ଆନ୍ତର୍ଜାତୀୟ ବୁଝାମଣା ଏବଂ ବିବିଧତାକୁ ସମ୍ମାନ ଦେବା ବିଷୟରେ ଯେଭଳି ଅଂଶ ଗ୍ରହଣ କରିବେ ତାହାରି ଉପରେ ଗୁରୁତ୍ୱ ଦିଆଯାଇଛି । ମିଳିତ ଜାତିସଂଘ, ସରକାର, ଆନ୍ତର୍ଜାତୀୟ ସଂଗଠନ ଏବଂ ନାଗରିକ ସମାଜ ସଂଗଠନ ଗୁଡିକୁ ଆନ୍ତର୍ଜାତୀୟ ବନ୍ଧୁତ୍ୱ ଦିବସ ଅବସରରେ ବିଭିନ୍ନ କାର୍ଯ୍ୟକଳାପ ଏବଂ ପଦକ୍ଷେପ ଆୟୋଜନ କରିବାକୁ ଉତ୍ସାହିତ କରେ ଯାହା ପାରସ୍ପରିକ ବୁଝାମଣା, ପୁନଃ ସମନ୍ୱୟ, ଏକତା ଏବଂ ସଭ୍ୟତା ମଧ୍ୟରେ ଏକ ସଂଳାପକୁ ଆଗେଇ ନେବା ପାଇଁ ବିଶ୍ୱ ଉଦ୍ୟମକୁ ସମର୍ଥନ କରେ । ଆଜି ଦେଶ ଦେଶ ମଧ୍ୟରେ ଯେଭଳି ଦ୍ଵନ୍ଦ, ଯୁଦ୍ଧ, କଳହ ଲାଗି ରହିଛି ଜାତିସଂଘ ସେଥିପାଇଁ ଚିନ୍ତିତ । ତେଣୁ ଜାତିସଂଘ ଅନୁଭବ କରେ ଯେ, ଦାରିଦ୍ର୍ୟତା, ମାନବିକ ଅଧିକାର ଉଲ୍ଲଂଘନ, ସୁରକ୍ଷା ପ୍ରତି ବିପଦ ସୃଷ୍ଟି, ବିକାଶରେ ବାଧା, ସାମାଜିକ ସୈହାର୍ଦ୍ଦ୍ୟ ବାତାବରଣରେ ଭୟ ଆଶଙ୍କା ଏବଂ ଶାନ୍ତି କ୍ଷୁର୍ଣ୍ଣ ତଥା ସେପରି ଅନେକ ସମସ୍ୟାର ସମ୍ମୁଖୀନ ହେବା ଭଳି ଆହ୍ଵାନର ମୁକାବିଲା ଶାନ୍ତି ସଦ୍ଭାବ ଦ୍ଵାରା ସମ୍ଭବ ହୋଇପାରିବ । ଆନ୍ତର୍ଜାତୀୟ ବନ୍ଧୁତା ଦିବସ ପାଳନ କରି, ଆମେ ନିଶ୍ଚିତ ଭାବରେ ପରସ୍ପର ସହିତ ଦୃଢ ବିଶ୍ୱାସର ସମ୍ପର୍କ ସ୍ଥାପନ କରିବାକୁ ଲକ୍ଷ୍ୟ ରଖିବା ଆବଶ୍ୟକ ଯେ, ଏକ ଶାନ୍ତିପୂର୍ଣ୍ଣ ଭବିଷ୍ୟତ ପ୍ରତି ବିପଦ ଥିବା ସେହି ସମସ୍ତ କାରଣକୁ ଆମେ ଏକତ୍ର ବିଲୋପ କରିବା । ୟୁନେସ୍କୋ ଦେଇଥିବା ପ୍ରସ୍ତାବ ଉପରେ ପର୍ଯ୍ୟବେସିତ ଥିବାରୁ ଏହି ପଦକ୍ଷେପ ମଧ୍ୟ ଗୁରୁତ୍ୱପୂର୍ଣ୍ଣ ଅଟେ । ଏହି ସୁପାରିଶ ଶାନ୍ତି ସଂସ୍କୃତିକୁ ମୂଲ୍ୟବୋଧ, ଆଚରଣ ଏବଂ ମନୋଭାବର ଏକ ପ୍ରୟାସ ଭାବରେ ବ୍ୟାଖ୍ୟା କରେ ଯାହା ଦ୍ଵାରା ଏହା ହିଂସାକୁ ପ୍ରତ୍ୟାଖ୍ୟାନ କରିପାରେ ଏବଂ ମୂଳ କାରଣକୁ ସମାଧାନ କରି ବିବାଦକୁ ରୋକିପାରେ । ଆନ୍ତର୍ଜାତୀୟ ବନ୍ଧୁତା ଦିବସ ୨୦୨୪ ର ବିଷୟବସ୍ତୁ ହେଉଛି ‘ବିବିଧତାକୁ ଗ୍ରହଣ କରିବା, ଏକତାକୁ ପ୍ରତିପୋଷଣ କର’ । ଏହି ଥିମ୍ ବିଭିନ୍ନ ପୃଷ୍ଠଭୂମି, ସଂସ୍କୃତି, ଏବଂ ଦୃଷ୍ଟିକୋଣକୁ ସ୍ବୀକୃତି ଦେବା ଏବଂ ମୂଲ୍ୟବୋଧ କରିବାର ମହତ୍ତ୍ୱ ଉପରେ ଗୁରୁତ୍ୱ ଦେଇଥାଏ ଯାହା ଆମ ବନ୍ଧୁ ମାନେ ଆମ ଜୀବନରେ ଆଣିଥାନ୍ତି । ପ୍ରକୃତ ବନ୍ଧୁତା ହେଉଛି ପ୍ରେମ, ବିଶ୍ୱାସ ଏବଂ ଅସୀମ ସମର୍ଥନ ସହିତ ଅଙ୍କା ହୋଇଥିବା ଏକ କାରୁକାର୍ଯ୍ୟ ଶୋଭିତ ବସ୍ତ୍ର ସଦୃଶ୍ୟ ।