ମୁରିବାହାଲ, (ଦୁର୍ଗାନନ୍ଦ ମହାକୁର) : ବଲାଙ୍ଗିର ଜିଲ୍ଲା ମୁରିବାହାଲ ଥାନା ଗୁଡିଘାଟ ପଂଚାୟତ ଘୁସୁରାମୁଣ୍ଡା ଗ୍ରାମ ତ୍ରିଖୁଟି ଛକରେ ଶନିବାର ବସୁଥିବା ସାପ୍ତାହିକ ବଜାରରୁ ଏକ ବାଇକ୍ ଚୋରୀ ହୋଇଥିବା ନେଇ ମୁରିବାହାଲ ଥାନାରେ ଲିଖିତ ଅଭିଯୋଗ ହୋଇଛି । ପୁଲିସ ସୂତ୍ରରୁ ସୂଚନା ମତେ ଏହି ବଜାର ପାଖ କୁମ୍ଭାରୀ ଗ୍ରାମର ଅଭି ବଗର୍ତ୍ତିଙ୍କ ପୁଅ ଧୃବରାଜ ବଗର୍ତ୍ତି(୩୦)ଦିନ ୧୦ଟା ବେଳେ ନିଜର ହିରୋ ସ୍ପ୍ଲେଣ୍ଡର ପ୍ଲସ ବାଇକ୍ ନଂ (ଓଡ଼ି ୦୩ ଟି ୮୭୫୨)ଯୋଗେ ଏହି ବଜାରକୁ ପନିପରିବା କିଣିବା ପାଇଁ ଆସିଥିଲେ । ସେ ବାଇକକୁ ବଜାର ପାଖରେ ରଖି ପନିପରିବା କିଣି ଫେରିବା ବେଳକୁ ରଖିଥିବା ସ୍ଥାନରେ ଆଉ ବାଇକ୍ ନ ଥିଲା । ସେ ସମ୍ପୂର୍ଣ୍ଣ ବଜାର ଅଞ୍ଚଳ ଖୋଜିବା ସହିତ ଅନ୍ୟମାନଙ୍କୁ ମଧ୍ୟ ପଚରାଉଚରା କରିଥିଲେ । କୌଣସି ଦୁର୍ବୃତ୍ତ ତାଙ୍କ ବାଇକକୁ ଚୋରୀ କରି ନେଇଥିବା ନେଇ ଶେଷରେ ସେ ଥାନାରେ ଲିଖିତ ଏତଲା ଦେଇଥିଲେ । ଦୀର୍ଘଦିନ ପରେ ମୁରିବାହାଲ ଥାନା ଅଞ୍ଚଳରୁ ପୁଣି ବାଇକ୍ ଚୋରୀ ଅଭିଯୋଗ ହେବା ପରେ ପୁଲିସ୍ ତୁରନ୍ତ ବଜାରକୁ ପହଞ୍ଚି ଅଧିକ ତଦନ୍ତ କରିବା ସହ ଏଥିରେ ସ୍ଥାନୀୟ ନା ବାହାର ଅଞ୍ଚଳର ଦୁର୍ବୃତ୍ତମାନେ ସାମିଲ ଅଛନ୍ତି ସେ ସଂପର୍କରେ ତନାଘନା ତଦନ୍ତ ଜାରି ରଖିଛି । ଧୃବରାଜଙ୍କ ଏତଲା ଆଧାରରେ ମୁରିବାହାଲ ଥାନା ପୁଲିସ ପକ୍ଷରୁ କେସ୍ ନଂ ୮୨/୨୪ରୁଜ୍ଜୁ କରାଯାଇ ଅଧିକ ତଦନ୍ତ ଜାରି ରହିଥିବା ଥାନା ଆଇଆଇସି ସିପୋରା ସରାୟ ଲୁଗୁନ ପ୍ରକାଶ କରିଛନ୍ତି ।