କଣ୍ଟାବାଞ୍ଜି, (କେପିଏନ୍ଏସ୍) : ମାଟି ତଳୁ ବୃଦ୍ଧଙ୍କ ଶବ ଉଦ୍ଧାର । ହତ୍ୟାପରେ ପୋତି ଦେଇଥିବା ଅଭିଯୋଗ । କଣ୍ଟାବାଞ୍ଜି ଥାନା ରଜାମରା ଗାଁରେ ଘଟିଛି ଏଭଳି ଏକ ଜଘନ୍ୟ ହତ୍ୟାକାଣ୍ଡ । ଗାଁର ଧୁବଲ ରଣା ଗତ ଫେବୃୟାରୀ ୨୧ ତାରିଖରୁ ନିଖୋଜ ଥିଲେ । ମୁରିବାହାଲ ଥାନା କରାଡୁଙ୍ଗରି ନିକଟସ୍ଥ ଏକ ମନରେଗା ଯୋଜନାରେ କାମ ହୋଇଥିବା ଜମିରେ ଠାବ ହୋଇଛି ମୃତ ଧୁବଲଙ୍କ ଶବ । ପରିବାର ଲୋକଙ୍କ ଅଭିଯୋଗ ପରେ ଗାଁର ଅଭିଯୁକ୍ତ ପରମେଶ ମହାକୁରଙ୍କୁ ଗିରଫ କରିଛି କଣ୍ଟାବାଞ୍ଜି ପୋଲିସ । ଅଭିଯୁକ୍ତ ନିଜେ ଦେଖାଇଛି ଶବ ପୋତିଥିବା ସ୍ଥାନ । ମାଟିକୁ ଖୋଲି ସାଇଣ୍ଟିଫିକ ଟିମ, ତହସିଲଦାର ଓ ପୋଲିସର ଉପସ୍ଥିତରେ ଶବ ବାହାର କରିଛି ପୋଲିସ । ହତ୍ୟା ପରେ ଏକ ବଡ଼ ବସ୍ତାରେ ଭରି ମାଟି ତଳେ ପୋତି ଥିଲା ଅଭିଯୁକ୍ତ । ଏଥିରେ ଆଉ ଅନ୍ୟ କାହାର ହାତ ଅଛି ସେନେଇ ତଦନ୍ତ ଜାରି ରଖିଛି କଣ୍ଟାବାଞ୍ଜି ପୋଲିସ ।