ଡୁଙ୍ଗୁରିପାଲି, (କେପିଏନ୍ଏସ୍) : ସୁବର୍ଣ୍ଣପୁର ଜିଲ୍ଲା ଡୁଙ୍ଗୁରିପାଲି ବ୍ଲକ ସମଲେଇଚୁଆଁ ପଂଚାୟତର ଅଇଁଲାସାରୀ ଗଙ୍ଗାଧର ମେହେର ପାଠାଗାରଠାରେ ଜାତୀୟ ଯୁବ ସପ୍ତାହ ଉପଲକ୍ଷେ ଶାନ୍ତି ପାଇଁ ଯୁବକ ଦିବସ ପାଳିତ ହୋଇଯାଇଛି । ପାଠାଗାରର କୋଷାଧ୍ୟକ୍ଷ ଅନିରୁଦ୍ଧ ଗଡତିଆଙ୍କ ସଭାପତିତ୍ୱରେ ଅନୁଷ୍ଠିତ କାର୍ଯ୍ୟକ୍ରମକୁ ବରିଷ୍ଠ ସଭ୍ୟ ନରେନ୍ଦ୍ର ପୁରୋହିତ ସଂଯୋଜନା କରିଥିଲେ । ପୋଲିସ ବିଭାଗରେ କାର୍ଯ୍ୟରତ ଉଦୀୟମାନ ଯୁବକ ଶାନ୍ତନୁ ଗଡତିଆ ମୁଖ୍ୟ ଅତିଥି ଭାବେ ଯୋଗଦେଇ ଯୁବକମାନେ ଶାନ୍ତି ପ୍ରତିଷ୍ଠାରେ ବ୍ରତୀ ହେଲେ ସ୍ୱାମୀ ବିବେକାନନ୍ଦଙ୍କ ସ୍ୱପ୍ନ ସାକାର ହୋଇପାରିବ ବୋଲି କହିଥିଲେ । ଶିକ୍ଷାବିତ୍ ଜ୍ଞାନଦେବ ଭୁକ୍ତା ମୁଖ୍ୟବକ୍ତା ଭାବେ ଯୋଗଦେଇ ସ୍ୱାମୀ ବିବେକାନନ୍ଦଙ୍କ ଜୀବନୀ ଉପରେ ଆଲୋକପାତ କରିବା ସହ ବିଶ୍ୱ ଶାନ୍ତି ପ୍ରତିଷ୍ଠାରେ ତାଙ୍କ ଭୂମିକା ବିଷୟରେ ଆଲୋଚନା କରିଥିଲେ । ସମ୍ମାନିତ ଅତିଥି ଭାବେ ଉଦୀୟମାନ ଯୁବକ ସୂର୍ଯ୍ୟଭାନୁ ବଣିଆ ଯୋଗଦେଇ ବିବେକାନନ୍ଦଙ୍କ ଜୀବନୀରୁ ଅନେକ ସଫଳତାର ସୂତ୍ର ମିଳିଥାଏ ବୋଲି କହିଥିଲେ । ଯୁବକ ଯୁବତୀଙ୍କ ମଧ୍ୟରେ ଜ୍ଞାନର ବିକାଶ ପାଇଁ ଅନୁଷ୍ଠିତ ପ୍ରତିଯୋଗିତାରେ ଅମିତ ବେହେରା, ନୀତେଶ ଛତର, ସାଇ କ୍ରିଷ୍ଣା ଗଡତିଆ ଯଥାକ୍ରମେ ପ୍ରଥମ, ଦ୍ଵିତୀୟ ଓ ତୃତୀୟ ସ୍ଥାନ ଅଧିକାର କରିଥିଲେ । ବିଜୟୀ ପ୍ରତିଯୋଗୀଙ୍କୁ ଅତିଥିମାନେ ପ୍ରମାଣପତ୍ର ଓ ଟ୍ରଫି ସହ ପୁରସ୍କାର ପ୍ରଦାନ କରିଥିଲେ । ଶେଷରେ ପାଠାଗାରର ସଭ୍ୟ ବିନୟ ବିଭାର ଧନ୍ୟବାଦ ଅର୍ପଣ କରିଥିଲେ । କାର୍ଯ୍ୟକ୍ରମ ପରେ ଏକ ଶାନ୍ତି ଶୋଭାଯାତ୍ରାକୁ ପାଠାଗାରର ଗ୍ରନ୍ଥଗାରିକ ଅନନ୍ତ ସେଟ ପରିଚାଳନା କରିଥିଲେ । ପାଠାଗାରର ସଭ୍ୟ ଦିନେଶ ପଧାନ, ନୀଳାଚଳ ବାଗ, ଉପେନ୍ଦ୍ର ସେଠ ସହଯୋଗ କରିଥିଲେ ।