ଖପ୍ରାଖୋଲ, (ଅଶୋକ କୁମାର ବାଗ) : ବଲାଙ୍ଗିର ଜିଲ୍ଲା ଖପ୍ରାଖୋଲ ଥାନା ଅନ୍ତର୍ଗତ ଭେଲୁଆଖୋଲ ଗ୍ରାମ ନିକଟସ୍ଥ ମେନ ରୋଡ଼ରେ ଭାରସାମ୍ୟ ହରାଇ ଏକ ବାଇକ ଜଣେ ସାଇକେଲ ଆରୋହୀଙ୍କ ସହ ପିଟି ହୋଇ ବାଇକ ଚାଳକ ଗୁରୁତର ଅବସ୍ଥାରେ ବଲାଙ୍ଗିର ସ୍ଥାନାନ୍ତର ହୋଇଥିବା ଜଣାପଡିଛି । ସୂଚନା ଅନୁସାରେ ଚାଉଳବାଞ୍ଜି ଗ୍ରାମର ଗୋବିନ୍ଦ ସେଠ(୬୦) ବାଇକ ଯୋଗେ ଖପ୍ରାଖୋଲ ମାର୍କେଟକୁ ଆସିଥିଲେ । ଖପ୍ରାଖୋଲରୁ ସନ୍ଧ୍ୟା ୬:୩୦ରେ ଘରକୁ ଫେରୁଥିବା ସମୟରେ ଭେଲୁଆଖୋଲ ଗ୍ରାମର ଜଣେ ସାଇକେଲ ଆରୋହୀଙ୍କ ସହ ପିଟି ହୋଇ ପଡି ଯାଇଥିଲେ । ଘଟଣାସ୍ଥଳରୁ କେହି ଜଣେ ସ୍ଥାନୀୟ ଲୋକ ଖପ୍ରାଖୋଲ ଅଗ୍ନିଶମ ଦଳକୁ ଫୋନ କରି ଜଣାଇଥିଲେ । ଅଗ୍ନିଶମ ବିଭାଗ ଘଟଣାସ୍ଥଳରେ ପହଞ୍ଚି ଗୋବିନ୍ଦ ସେଠଙ୍କୁ ଗୁରୁତର ଅବସ୍ଥାରେ ଖପ୍ରାଖୋଲ ଡାକ୍ତରଖାନାକୁ ଆଣିଥିଲେ । ଗୋବିନ୍ଦ ସେଠଙ୍କ ଅବସ୍ଥା ଗୁରୁତର ଥିବା ବେଳେ ଡାକ୍ତର ତାଙ୍କୁ ଶୀଘ୍ର ବଲାଙ୍ଗିର ସ୍ଥାନାନ୍ତର କରିବା ପାଇଁ ତାଙ୍କ ପରିବାର ଲୋକଙ୍କୁ କହିଥିଲେ କିନ୍ତୁ ଖପ୍ରାଖୋଲ ଡାକ୍ତରଖାନାରେ କୌଣସି ଆମ୍ବୁଲାନ୍ସ ସୁବିଧା ନ ଥିବାରୁ ଏବଂ ୧୦୮ ଆମ୍ବୁଲାନ୍ସ ବ୍ୟସ୍ତ ଥିବାରୁ ପରିବାର ଲୋକେ ଏକ ପ୍ରାଇଭେଟ ଗାଡି ଯୋଗାଡ଼ କରିଥିଲେ । ଗୁରୁତର ବ୍ୟକ୍ତିଙ୍କ ପ୍ରାଥମିକ ଚିକିତ୍ସା କଲା ପରେ ତାଙ୍କୁ ବଲାଙ୍ଗିର ଡାକ୍ତରଖାନାକୁ ସ୍ଥାନାନ୍ତର କରାଯାଇଥିବା ଡାକ୍ତର ଭକ୍ତବନ୍ଧୁ ଭୋଇ କହିଛନ୍ତି ।