ଦେଓଗାଁ, (ମନୀଷ କୁମାର ସାହୁ) : ଗତ ୯ ତାରିଖ ଦିନ ବଲାଙ୍ଗିର ସଦର ବ୍ଳକର ଭୁତିଆରବାହାଲ ପଞ୍ଚାୟତର ସମିତି ସଭ୍ୟ ଉପନିର୍ବାଚନ ଅନୁଷ୍ଠିତ ହୋଇଯାଇଛି । ଶୁକ୍ରବାର ଥିଲା ଭୋଟ ଗଣତି ଦିବସ । ଏଥିରେ ନିକଟତମ ପ୍ରତିଦ୍ବନ୍ଦି ଦମନ ପଟେଲଙ୍କଠାରୁ ୩୧୮ଟି ଅଧିକ ଭୋଟ ପାଇଁ ଅଜିତ ସାହୁ ବିଜୟୀ ହୋଇଥିବା ଜଣାପଡ଼ିଛି । ବିଜୟୀ ଅଜିତ ସାହୁ ୧୦୬୧ଟି ଭୋଟ ପାଇଥିବା ବେଳେ ଦମନ ପଟେଲ ୭୪୩ଟି, ରାଧାକାନ୍ତ ବାଗ ୨୦୬ ଓ ଦମୟନ୍ତୀ ପସାଏତ ୧୭୭ଟି ଭୋଟ ପାଇଥିଲେ । ମୋଟ ମତଦାତା ସଂଖ୍ୟା ୩୭୪୩ ମଧ୍ୟରୁ ୨୨୬୦ଟି ମତଦାନ ଦେଇଥିବା ବେଳେ ୭୩ଟି ରିଜେକ୍ଟ ହୋଇଥିବା ଜଣାପଡ଼ିଛି ।
ସୂଚନା ଯୋଗ୍ୟ ଯେ, ବଲାଙ୍ଗିର ସଦର ବ୍ଳକ ଅନ୍ତର୍ଗତ ଭୁତିଆରବାହାଲ, କୁଠୁର୍ଲା, ରଜାମୁଣ୍ଡା, ନାରାୟଣପୁର ଓ ନୁନିଆଁଢ଼ିପା ମୋଟ ୫ଟି ଗାଁକୁ ନେଇ ଭୁତିଆରବାହାଲ ପଞ୍ଚାୟତ ଗଠିତ । ଭୁତିଆବାହାଲ ପଞ୍ଚାୟତର ସମିତି ସଭ୍ୟ ଶ୍ରୀବତ୍ସ ସାହୁଙ୍କ ଅକାଳ ବିୟୋଗ ହେବା ପରେ ସମିତି ସଭ୍ୟ ପଦବୀ ଖାଲି ପଡ଼ିଥିଲା । ଗତ ୯ ତାରିଖ ଦିନ ଉପନିର୍ବାଚନ ଅନୁଷ୍ଠିତ ହୋଇଥିଲା ।