ପାଟଣାଗଡ଼, (କେପିଏନ୍ଏସ୍) : ଜଣେ ମାତାଲ୍ ସ୍ୱାମୀ ଟାଙ୍ଗିଆରେ ଆକ୍ରମଣ କରିଛନ୍ତି ନିଜ ଧର୍ମପତ୍ନୀଙ୍କୁ । ଏଭଳି ଏକ ଅମାନବୀୟ କାଣ୍ଡ ଘଟିଛି ପାଟଣାଗଡ଼ ବରମ୍ପୁରା ସଅଁରାପଡ଼ାରେ । ମୁହଁରେ ଟାଙ୍ଗିଆ ଚୋଟ ଯୋଗୁଁ ପତ୍ନୀଙ୍କ ଅବସ୍ଥା ଗୁରୁତର ହେବାରୁ ତାଙ୍କୁ ପ୍ରଥମେ ପାଟଣାଗଡ଼ ଡାକ୍ତରଖାନାକୁ ଅଣାଯାଇଥିବା ବେଳେ ପରେ ତାଙ୍କୁ ବଲାଙ୍ଗିର ଭୀମଭୋଇ ମେଡ଼ିକାଲ୍ କଲେଜ ହସ୍ପିଟାଲ୍କୁ ପଠାଇ ଦିଆଯାଇଥିବା ସୂଚନା ମିଳିଛି । ସେପଟେ ନୃଶଂସ କାଣ୍ଡ ଘଟାଇ ସ୍ୱାମୀ ଘଟଣା ସ୍ଥଳରୁ ଫେରାର୍ ଥିବା ବେଳେ ପୋଲିସ ତଦନ୍ତ ଜାରି ରଖିଛି । ଗୁରୁତର ମହିଳା ଜଣକ ହେଲେ ମଦନା ଯୁଏଡ଼ । ସ୍ୱାମୀ ପ୍ରକାଶ ଯୁଏଡ଼ କୌଣସି କାରଣରୁ ଉତ୍କ୍ଷିପ୍ତ ହୋଇ ତାଙ୍କ ପତ୍ନୀଙ୍କୁ ଟାଙ୍ଗିଆରେ ଆକ୍ରମଣ କରିଥିଲେ । ପତ୍ନୀ ଜଣକ ଗୁରୁତର ହୋଇ ପଡ଼ିଥିବା ବେଳେ ଘଟଣା ସ୍ଥଳରୁ ଫେରାର୍ ମାରିଥିଲେ ନୃଶଂସ ସ୍ୱାମୀ । ଏହି ଘଟଣା ସାରା ଅଂଚଳରେ ଚାଂଚଲ୍ୟ ସୃଷ୍ଟି କରିଛି । ବଲାଙ୍ଗିର ଭୀମଭୋଇ ମେଡ଼ିକାଲ୍ କଲେଜ ହସ୍ପିଟାଲ୍ରେ ପତ୍ନୀଙ୍କ ଅବସ୍ଥା ଅତ୍ୟନ୍ତ ଗୁରୁତର ଥିବା ଜଣାପଡ଼ିଛି ।