ସୁବର୍ଣ୍ଣପୁର, (କେପିଏନ୍ଏସ୍) : ବୀରମହାରାଜପୁର ଥାନା ଅନ୍ତର୍ଗତ ବୀରମହାରାଜପୁରରୁ ସୁବଲୟା ରାସ୍ତା ବାଗବର ନିକଟସ୍ଥ ଚମ୍ପା ପେଟ୍ରୋଲ ପମ୍ପ ନିକଟରେ ୨ ବାଇକ ମୁହାଁମୁହିଁ ଧକ୍କା ହୋଇ ଜଣେ ଗୁରୁତର ହୋଇଥିବା ବେଳେ ଅନ୍ୟ ୩ଜଣ ଆହତ ହୋଇଥିବା ଜଣାପଡିଛି । ପ୍ରାପ୍ତ ସୁଚନା ଅନୁସାରେ ବୀରମହାରାଜପୁର ଜଗନ୍ନାଥ ମନ୍ଦିର ସେବକଙ୍କ ଭାଇ ନିଜେ ଶାରିରୀକ ଅକ୍ଷମ ହୋଇଥିବାରୁ ତାଙ୍କର ଜଣେ ପ୍ରିୟଜନଙ୍କ ସହିତ ଜଟେସିଂହା ପଞ୍ଚାୟତ ସ୍ଥିତ ନିଜ ଗାଁ ବଡଖମାରକୁ ଯାଉଥିଲେ । ହେଲେ ସୁବଲୟା ରାସ୍ତାର ବାଗବର ନିକଟସ୍ଥ ପେଟ୍ରୋଲ ପମ୍ପ ନିକଟ ଆପର ପାର୍ଶ୍ବରୁ ନିଶାପାନ କରି ଆସୁଥିବା ବାଇକଟି ତାଙ୍କୁ ଧକ୍କା ଦେଇଥିଲା । ଫଳରେ ଜଗନ୍ନାଥ ମନ୍ଦିର ସେବକଙ୍କ ଭାଇ ଶୁକାନ୍ତ ପୁରୋହିତ (୩୮) ବାଇକରୁ ଛିଟିକି ପଡିବା ସହ ଶାରିରୀକ ଦୁର୍ବଳ ଥିବା ଯୋଗୁଁ ତାଙ୍କ ଉପରେ ବାଇକ ଚଢିଯାଇଥିଲା । ଏଥିରେ ଡାହାଣ ଗୋଡ ହାଡ ସମ୍ପୂର୍ଣ୍ଣ ଛିଣ୍ଡି ଯାଇଥିବା ବେଳେ ତାଙ୍କ ଗୋଡ ଏବଂ ଅଣ୍ଟାରେ ବଡ଼ କ୍ଷତ ହୋଇ ପ୍ରବଳ ରକ୍ତସ୍ରାବ ହୋଇଥିଲା । ରକ୍ତ ବନ୍ଦ ନ ହେବାରୁ ତାଙ୍କୁ ଡାକ୍ତର ଜିଲ୍ଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତରିତ କରିଥିଲେ । ଅନ୍ୟ ଆହତମାନଙ୍କୁ ପ୍ରାଥମିକ ଚିକିତ୍ସା ପରେ ଡାକ୍ତରଖାନାରୁ ଡିସଚାର୍ଚ୍ଚ କରାଯାଇଛି ।