ମଠଖାଇ ମହୋତ୍ସବର ପଞ୍ଚମ ସଂଧ୍ୟାରେ ମଂଚ ଦୁଲୁକେଇ ଦେଲା ଦୁଲ୍ଦୁଲି କଳା ପରିଷଦର ଘୁଡ଼କା : ଡା. ରୁଦ୍ର ନାରାୟଣ ପଟେଲଙ୍କୁ ମଠଖାଇ ସମ୍ମାନ ପ୍ରଦାନ
ବଲାଙ୍ଗିର, (କେପିଏନ୍ଏସ୍) : ସର୍ବଭାରତୀୟ ମଠଖାଇ ମହୋତ୍ସବ-୨୦୨୩ର ଆଜି ପଞ୍ଚମ ତଥା ଅନ୍ତିମ ସଂଧ୍ୟାରେ ବଲାଙ୍ଗିରର ଦୁଲ୍ଦୁଲି କଳା ପରିଷଦର କଳାକାରମାନଙ୍କ ଘୁଡ଼କା ସାଂସ୍କୃତିକ କାର୍ଯ୍ୟକ୍ରମରେ ମଂଚ ଦୁଲିକି ଉଠିଛି । ସାଂସ୍କୃତିକ କାର୍ଯ୍ୟକ୍ରମ ପରେ ପରେ ସାଧାରଣ ସଭା ଅନୁଷ୍ଠିତ ହୋଇଥିଲା । ଲୋଇସିଂହା ବିଧାୟକ ମୁକେଶ ମହାଲିଙ୍ଗ, ବିଶିଷ୍ଟ ମଂଚ ତଥା ଚଳଚିତ୍ର ଅଭିନେତା ଗଦାଧର ବାରିକ, ମଠଖାଇ ମହୋତ୍ସବ କମିଟିର ଅଧ୍ୟକ୍ଷ ତଥା ବଲାଙ୍ଗିର ବିଧାୟକ ନରସିଂହ ମିଶ୍ର, ‘ଭୂମିକା’ର ବରିଷ୍ଠ ସଦସ୍ୟ ଚିତ୍ତରଂଜନ ମିଶ୍ର ଓ ଅଶୋକ ଦାଶ ମଂଚାସୀନ ଥିବା ବେଳେ ବିଶିଷ୍ଟ ଲୋକକଳା ସଂରକ୍ଷକ ଡା. ରୁଦ୍ର ନାରାୟଣ ପଟେଲଙ୍କୁ ମଠଖାଇ ସମ୍ମାନ ପ୍ରଦାନ କରାଯାଇଛି । ସାଧାରଣ ସଭା ପରେ ରାୟପୁରର ଅଭିନତ୍ ଫିଲ୍ମ ଓ ନାଟ୍ୟ ପ୍ରତିଷ୍ଠାନର କଳାକାରମାନେ ଛତିଶ୍ଗଡ଼ୀ ନାଟକ ‘ଶକୁବାଈ’ ପରିବେଷଣ କରିଛନ୍ତି । ନାଦୀରା ବବରଙ୍କ ଲିଖିତ ତଥା ୟୋଗ ମିଶ୍ରଙ୍କ ନିର୍ଦ୍ଦେଶିତ ଏହି ନାଟକ ଦର୍ଶକଙ୍କୁ ବେଶ୍ ଉଲ୍ଲସିତ କରିଛି ।
