ଦେଓଗାଁ, (କେପିଏନ୍ଏସ୍) : ବଲାଙ୍ଗିର ଜିଲ୍ଲାର ଦେଓଗାଁ ବ୍ଲକ ଅନ୍ତର୍ଗତ ରାମଚନ୍ଦ୍ରପୁର ଠାରେ ଜଗନ୍ନାଥ ଚେତନା ତରଫରୁ ଦ୍ଵିତୀୟ ବାର୍ଷିକ ଉତ୍ସବ ଅନୁଷ୍ଠିତ ହେଇଯାଇଛି । ଏହି ଉତ୍ସବ ଆରମ୍ଭରେ ପ୍ରଥମେ ଜଗନ୍ନାଥ ମନ୍ଦିର ଠାରେ ପୂଜାର୍ଚ୍ଚନା କରାଯାଇଥିଲା । ପରେ ମନ୍ଦିର ନିକଟସ୍ଥ ବଗିଚାରେ ପ୍ରହରୀ ଅନୁଷ୍ଠିତ ହୋଇଥିଲା ଓ ପ୍ରହରୀରେ ପ୍ରଭୁ ଜଗନ୍ନାଥଙ୍କ ନାମ ଉଚ୍ଛାରଣରେ ପ୍ରକମ୍ପିତ ହୋଇ ଉଠିଥିଲା । ମୋଟ ୫ଟି ଗ୍ରାମର କୀର୍ତ୍ତନ ଦଳ ଏହି କାର୍ଯ୍ୟକ୍ରମରେ ସାମିଲ ହେଇଥିଲେ । ଏହି ଉତ୍ସବରେ ରାମଚନ୍ଦ୍ରପୁର ସମେତ ଆଖପାଖ ଗ୍ରାମର ଭକ୍ତଙ୍କ ସୁଅ ଛୁଟି ଥିଲା । ସମସ୍ତ ଭକ୍ତଙ୍କ ପାଇଁ ଅନ୍ନପ୍ରସାଦ ସେବନର ବ୍ୟବସ୍ଥା କରାଯାଇଥିଲା । ସେହିପରି ରାମଚନ୍ଦ୍ରପୁର ଗ୍ରାମର ସମସ୍ତ ଘର ସମ୍ମୁଖକୁ ପରିଷ୍କାର କରି ସେଠାରେ କଳସ ସ୍ଥାପନ କରାଯାଇଥିଲା । ଯାହାକି ଗ୍ରାମର ଶୋଭାକୁ ଦ୍ୱିଗୁଣିତ କରିଥିଲା । ଏହି ଉତ୍ସବରେ ପୂଜକ ଭାବରେ ନନ୍ଦରାଜ ନନ୍ଦ ଓ କର୍ତ୍ତା ଭାବରେ ଉମେଶ ପଟେଲ ଓ ରିତା ପଟେଲ ଦାୟିତ୍ୱ ନିର୍ବାହ କରିଥିଲେ । ସମସ୍ତ ରାମଚନ୍ଦ୍ରପୁର ଗ୍ରାମବାସୀ ଓ ଜଗନ୍ନାଥ ଚେତନାର ଭକ୍ତ ବୃନ୍ଦ ଉତ୍ସବ ଆୟୋଜନରେ ସହଯୋଗ କରିଥିଲେ ।