ଭବାନୀପାଟଣା/କେସିଙ୍ଗା, (ପି.କେ. ସାହୁ) : ୨୬ ନମ୍ଵର ଜାତୀୟ ରାଜପଥ କେସିଙ୍ଗା ଥାନା ଚାଞ୍ଚେର ସ୍ଥିତ ପାଣି ପାଉଚ ଫ୍ୟାକ୍ଟ୍ରି ନିକଟରେ ସୋମବାର ବିଳମ୍ଵିତ ରାତିରେ ବସ୍ ଓ କାର୍ ମୁହାଁମୁହିଁ ଧକ୍କା ହୋଇ ଦୁର୍ଘଟଣା ଘଟିଥିବା ଜଣାପଡିଛି । ଏହି ଦୁର୍ଘଟଣାରେ ୨ ଜଣଙ୍କର ମୃତ୍ୟୁ ହୋଇଛି । ମୃତକ ୨ ଜଣ ଭବାନୀପାଟଣା ସହରର ଇରିଗେସନ କଲନୀର ଦିନେଶ ନାଏକ (୩୪ ବର୍ଷ) ଏବଂ ଦିଲିପ ଗୋଚ୍ଛାୟତ (୩୧ ବର୍ଷ) ବୋଲି ଜଣାପଡିଛି । ସୂଚନା ଅନୁସାରେ, ମାଲକାନଗିରି ଠାରୁ ଭୁବନେଶ୍ୱର ଅଭିମୁଖେ ଯାଉଥିବା ଓଡି ୦୨ ଏୟୁ ୨୫୯୭ ନମ୍ବର ବିଶିଷ୍ଟ ପ୍ରାଇଭେଟ୍ ଏକ୍ସପ୍ରେସ ଦିଲଖୁସ୍ ବସ୍ ଓ କେସିଙ୍ଗା ପଟୁ ଭବାନୀପାଟଣା ଅଭିମୁଖେ ଯାଉଥିବା ଓଡି ୦୮ପି ୭୭୮୦ ନମ୍ବର ବିଶିଷ୍ଟ ଏକ କାର୍ ମୁହାଁମୁହିଁ ଧକ୍କା ହୋଇଥିଲେ । ରାତି ପ୍ରାୟ ୧୨ଟା ୨୦ରେ ଚାଞ୍ଚେର ନିକଟସ୍ଥ ପାଣି ପାଉଚ ଫ୍ୟାକ୍ଟ୍ରି ନିକଟରେ ଏହି ଦୁର୍ଘଟଣା ଘଟିଥିଲା । ଫଳରେ କାର୍ ଭିତରେ ବସିଥିବା ଦୁଇ ଯୁବକଙ୍କ ମୃତ୍ୟୁ ଘଟିଛି । ଦୁର୍ଘଟଣାରେ କାର ଚୁରମାର୍ ହୋଇଯାଇ ଥିବା ବେଳେ କାର ଭିତରେ ବସିଥିବା ଅନ୍ୟ ୩ ଜଣଙ୍କ ଅବସ୍ଥା ଗୁରୁତର ରହିଛି । ସେମାନଙ୍କୁ ଭବାନୀପାଟଣା ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇ ଚିକିତ୍ସା କରାଯାଉଥିବା ଜଣାପଡିଛି । ଅପରପକ୍ଷରେ ବସରେ ବସିଥିବା ୨ ଜଣ ମହିଳା ସାମାନ୍ୟ ଆହତ ହୋଇଥିବା ସୂଚନା ମିଳିଛି ।