ବଲାଙ୍ଗିର, (କେପିଏନ୍ଏସ୍) : ସହରର କନ୍ଧପାଲିପଡା ଠାରେ ଜଣେ ଯୁବକଙ୍କୁ କିଛି ଯୁବକ ମରଣାନ୍ତକ ଆକ୍ରମଣ କରିଥିବା ନେଇ ବଲାଙ୍ଗିର ଟାଉନ ଥାନାରେ ଅଭିଯୋଗ ହୋଇଛି । ଆକ୍ରମଣର ଶିକାର ହୋଇଥିବା ଯୁବକ ଜଣକ ହେଲେ ବଲାଙ୍ଗିର ଶାନ୍ତିପଡାର ପ୍ରକାଶ ଚନ୍ଦ୍ର ବେହେରା । ସୂଚନା ଅନୁସାରେ, ପ୍ରକାଶ ଗତକାଲି ତାଙ୍କର ଜଣେ ସଂପର୍କୀୟଙ୍କୁ ଛାଡ଼ିବାକୁ ଚନ୍ଦନଭାଟି ଯାଇଥିଲେ । ସେଠାରୁ ଫେରିବା ବାଟରେ କନ୍ଧପାଲିପଡାରେ ଏକ ଘର ସାମ୍ନାରେ ଅଟକି ଜୈନିକ ଯୁବକଙ୍କୁ ପଚାରିଥିଲେ । ଏତିକି ଶୁଣିବା ମାତ୍ରେ ହଠାତ୍ ତିନିଜଣ ଯୁବକ ମାରଣାସ୍ତ୍ର ଧରି ତାଙ୍କୁ ଅତର୍କିତ ଭାବେ ଆକ୍ରମଣ କରିଥିଲେ । ଯୁବକ ଜଣକ ସେଠାରୁ ଖସି ଆସି ଥାନାରେ ଅଭିଯୋଗ କରିବା ପରେ ପୁଲିସ ତାଙ୍କୁ ମେଡିକାଲକୁ ଆଣି ଭର୍ତ୍ତି କରିଥିବା ନେଇ ଖବର ମିଳିଛି ।