ସୁଜିତ୍ କୁମାର ଶତପଥି
ମୁଇଁ ଥିମି ନି ଥିମି ଉଁଝା କଥା
ହେଲେ ଇ ଶବଦମାନେ
ଥିବାର କଥା
ବିନକୁହେ ତ ଉଦୁରମାତ
ଫଏଲି ଯଉଛେ ଅଂଧାର
କେତେଦିନ ଛେଁକି ପାରମା ଯେ
କେତେଦିନ ଭି ରହେମା !
ଆସ ଇ ଶବଦମାନକୁ ପଜେଇଥିମା ଯେ
ଅଂଧାରର ଡେନା କାଟି
ନିବୁଜ୍ ପନନୁ
ମୁକଲେଇ ଆନବେ ବେଲ୍ ।
ଶବଦ୍ ସରସରା ଆକାଶେ
ମୁଟେ ନି ଥାଏ ଡର
ହରାଜିତାର କି କପ୍ସି ଯିବାର
ଢୁକୁଲଗା ଖୁଁଟର ଦିହେଁ ଭି
ଶବଦ୍ ଦେସି ପିକାବାର ତହଁକ
ପାଚଲା ପତର ଭିତରେ
ସାଗୁଆ ପନ୍କେ
ପାଆଁଲିବାର ବପୁ ।
ଇନ୍ତା ଭି ହେବା ଯେ
ସଭେ ଦିନେ ଶବଦ୍ ହେଇଯିମା
ଶବଦ୍ ଫୁଲ ହେଇ ଫୁଟବା
ପାଏନ ହେଇ ଝର୍ବା
ତରା ହେଇ ଝକ୍ବା ।
ଆସ ଶବଦ୍ ଜଗାମା..ଶବଦ୍
ଆମେ ଥିମା ନି ଥିମା ଉଁଝା କଥା
ଶବଦ୍ ଥିବାର କଥା
ଆଏବାର ସମିଆର୍ ଲାଗି
ଉଜଲ ପୁର୍ଥିର ଲାଗି । ।
ବାଗାଶ୍ରିତା, ସାଲେଭଟା,
ବଲାଙ୍ଗିର -୨୧
ମୋ.ନଂ. : ୯୫୫୬୭୧୧୨୭୨