- ବିପର୍ଯ୍ୟୟ ପାଣ୍ଠି ଖର୍ଚ୍ଚରେ ଅବହେଳା କରାଯାଉଛି – ହେମନ୍ତ ପଣ୍ଡା
ବଲାଙ୍ଗିର, (କେପିଏନ୍ଏସ୍) : ରାଜ୍ୟରେ ପ୍ରାକୃତିକ ବିପର୍ଯ୍ୟୟ ଜନିତ ବନ୍ୟା, ବାତ୍ୟା ଓ ମରୁଡି ସମୟରେ କ୍ଷତିଗ୍ରସ୍ତ ଚାଷୀ, ବିପନ୍ନ ଜନତାଙ୍କୁ ତୁରନ୍ତ ଆର୍ଥିକ ସହାୟତା ଯୋଗାଇବା ପାଇଁ ସମସ୍ତ ରାଜ୍ୟରେ ପ୍ରାକୃତିକ ବିପର୍ଯ୍ୟୟ ପାଣ୍ଠିର ବ୍ୟବସ୍ଥା ରହିଛି । ଓଡିଶାର ପ୍ରାକୃତିକ ବିପର୍ଯ୍ୟୟ ପାଣ୍ଠିରେ ବର୍ତ୍ତମାନ ପ୍ରାୟ ୬୦୦୦ କୋଟିରୁ ଅଧିକ ଟଙ୍କା ଗଚ୍ଛିତ ରହିଥିବା ଜଣାପଡିଛି । ବଲାଙ୍ଗିରର ବିଶିଷ୍ଠ ସୂଚନା କର୍ମୀ ହେମନ୍ତ କୁମାର ପଣ୍ଡାଙ୍କୁ ରାଜ୍ୟର ସ୍ୱତନ୍ତ୍ର ରିଲିଫ କମିଶନରଙ୍କ କାର୍ଯ୍ୟାଳୟରୁ ପ୍ରଦାନ କରାଯାଇଥିବା ତଥ୍ୟରେ ଉଲ୍ଲେଖ କରାଯାଇଛି ଯେ, ଓଡିଶାର ବିପର୍ଯ୍ୟୟ ପରିଚାଳନା ପାଇଁ ଗତ ୨୦ ବର୍ଷରେ ତଥା ୨୦୦୬-୦୭ରୁ ୨୦୨୫-୨୬ ପର୍ଯ୍ୟନ୍ତ ସିଆର୍ଏଫ୍/ଏସ୍ଡି ଆର୍ଏଫ୍ ଓ ଏନ୍ଡିଆର୍ଏଫ୍/ଏନ୍ସିସିଏଫ୍ ଅଧିନରେ ରାଜ୍ୟକୁ ମୋଟ ୨୬୫୧୨. ୮୨ କୋଟି ଟଙ୍କା ମିଳିଛି । ଏହି ଟଙ୍କାରୁ ସିଆର୍ଏଫ୍/ଏସ୍ଡିଆର୍ଏଫ୍ରେ ୧୮୭୫୭.୭୭ କୋଟି ଟଙ୍କା ମିଳିଥିବା ବେଳେ ଏନ୍ସିସିଏଫ୍/ଏନ୍ଡିଆର୍ଏଫ୍ରେ ୭୭୫୫.୦୫ କୋଟି ମିଳିଥିବା ସରକାରୀ ତଥ୍ୟରୁ ଜଣାପଡିଛି । ସିଆର୍ଏଫ୍/ ଏସ୍ ଡିଆର୍ଏଫ୍ ଅଧିନରେ ମିଳିଥିବା ୧୮୭୫୭.୭୭ କୋଟି ଟଙ୍କାରୁ ୧୪୦୬୮.୩୨ କୋଟି ତଥା ୭୫ ପ୍ରତିଶତ କେନ୍ଦ୍ର ସରକାର ପ୍ରଦାନ କରିଥିବା ବେଳେ ରାଜ୍ୟର ଭାଗ ୪୬୮୯.୧୩ କୋଟି ଟଙ୍କା । ଗତ ୨୦ ବର୍ଷରେ ଏନ୍ସିସିଏଫ୍/ ଏନ୍ଡିଆର୍ଏଫ୍ ଅଧିନରେ ମିଳିଥିବା କେନ୍ଦ୍ରୀୟ ସହାୟତାରୁ ଆଜି ପର୍ଯ୍ୟନ୍ତ ରାଜ୍ୟକୁ ମିଳିଥିବା ୭୭୫୫.୦୫ କୋଟି ଟଙ୍କାରୁ ୨୦୧୯-୨୦ ମସିହାରେ ସର୍ବକାଳୀନ ଅଧିକ ପାଣ୍ଠି ତଥା ୩୧୧୪.୪୫ କୋଟି ଓ ୧୭୯.୬୪ କୋଟି ଟଙ୍କା ଯଥାକ୍ରମେ ଫନି ଓ ବୁଲବୁଲ ବାତ୍ୟା ପାଇଁ ମିଳିଥିବା ଜଣାପଡିଛି । ଏହା ପୂର୍ବରୁ ୨୦୧୧-୧୨ ମସିହାରେ ଅଦିନିଆ ବର୍ଷା ଜନିତ ବନ୍ୟା ପାଇଁ ୧୦୩୮.୮୨ କୋଟି ଟଙ୍କା ସହାୟତା ମିଳିଥିଲା । କିନ୍ତୁ ଆଶ୍ଚର୍ଯ୍ୟର କଥା ଯେ, ୨୦୨୫-୨୬ ଆର୍ଥିକ ବର୍ଷ ଆରମ୍ଭରେ ୬୪୬୮.୫୯ କୋଟି ଟଙ୍କାର ଓପନିଙ୍ଗ ବାଲାନ୍ସ ରହିଛି । ୨୦୨୩-୨୪ ଆର୍ଥିକ ବର୍ଷ ଆରମ୍ଭରେ ଏହା ୩୨୦୮.୨୪ କୋଟି ରହିଲା । ଓଡିଶା ଭଳି ପ୍ରାକୃତିକ ବିପର୍ଯ୍ୟୟ ପ୍ରବଣ ତଥା ବନ୍ୟା, ବାତ୍ୟା, ମରୁଡିରେ ରାଜ୍ୟର ନିତିଦିନିଆ ଦୁଃଖ ହୋଇଥିବା ବେଳେ ମାତ୍ର ଦୁଇ ବର୍ଷରେ ବଳକା ରାଶି ଦ୍ୱିଗୁଣିତ ହୋଇଛି । ରାଜ୍ୟର ସାଧାରଣ ଜନତା ବନ୍ୟା, ବାତ୍ୟାରେ ନାହିଁ ନଥିବା ଦୁର୍ଦ୍ଦଶାର ସମ୍ମୁଖୀନ ହେଉଥିବା ବେଳେ ଏହି ବିପୁଳ ପାଣ୍ଠିର ସଦୁପଯୋଗ ହୋଇପାରୁ ନାହିଁ ବୋଲି ସୂଚନା କର୍ମୀ ଶ୍ରୀ ପଣ୍ଡା ଗୁରୁତର ଅଭିଯୋଗ କରିଛନ୍ତି । ଏହି ୨୦ ବର୍ଷରେ ରାଜ୍ୟର ମରୁଡି କ୍ଲିଷ୍ଟ ଏବଂ ଅପେକ୍ଷାକୃତ ଅବିକଶିତ କେବିକେ ଅଞ୍ଚଳକୁ ଆବଶ୍ୟକତା ଠାରୁ ଅତ୍ୟନ୍ତ କମ ସହାୟତା ପ୍ରଦାନ କରାଯାଇଛି ବୋଲି ମଧ୍ୟ ଶ୍ରୀ ପଣ୍ଡା କହିଛନ୍ତି ।