ସୁବର୍ଣ୍ଣପୁର, (ରାଜ କିଶୋର ତ୍ରିପାଠୀ) : ସୋନପୁର ସହରର କଲେଜ ରାସ୍ତା ତୁରନ୍ତ ମରାମତି ପାଇଁ ପୂର୍ତ୍ତ ବିଭାଗ କାର୍ଯ୍ୟ ନିର୍ବାହୀ ଯନ୍ତ୍ରୀଙ୍କୁ ଦାବୀପତ୍ର ପ୍ରଦାନ କରିଛନ୍ତି ସହରର ସ୍ୱେଚ୍ଛାସେବୀ । ଚଳିତ ବର୍ଷ ଚାଲୁ ରହିଥିବା ଲଗାଣ ବର୍ଷା ଯୋଗୁଁ ସୋନପୁର କଲେଜ ରାସ୍ତା ଦୀର୍ଘ ଦିନରୁ ଖାଲ ଖମା ହୋଇ ମରଣଯନ୍ତା ପାଲଟିଛି । ସେମାନେ ଲିଖିତ ଅଭିଯୋଗ କରିଛନ୍ତି ଯେ, ସୁବର୍ଣ୍ଣପୁରର ରେଜିଷ୍ଟ୍ରି ଅଫିସ ପାଖ ସୌମ୍ୟା ହୋଟେଲ ସମ୍ମୁଖରେ ଥିବା ରାସ୍ତାଟି ବହୁତ କ୍ଷତିଗ୍ରସ୍ତ ହୋଇଛି ଯାହା ଜିଲ୍ଲା ମୁଖ୍ୟ ଚିକିତ୍ସାଳୟ ଏବଂ ରାଜ କଲେଜକୁ ଏକ ଗୁରୁତ୍ୱପୂର୍ଣ୍ଣ ସଂଯୋଗ ପ୍ରଦାନ କରେ । ଏହି ରାସ୍ତାଟି ପ୍ରାୟତଃ ରୋଗୀ, ସେମାନଙ୍କ ସାଥୀ, ଡାକ୍ତର, ହସ୍ପିଟାଲ କର୍ମଚାରୀ, ଛାତ୍ରଛାତ୍ରୀ, ଶିକ୍ଷକ, ସ୍ଥାନୀୟ ବାସିନ୍ଦା ଏବଂ ପ୍ରତିଦିନ ଯିବା ଆସିବା କରୁଥିବା ଯାତ୍ରୀଙ୍କ ଦ୍ୱାରା ବ୍ୟବହୃତ ହୁଏ । ଏହି ରାସ୍ତାରେ ପଡ଼େ ସୋନପୁର କଲେଜ, ପିଏଚଡି ଅଫିସ, ଜନସ୍ୱାସ୍ଥ୍ୟ ବିଭାଗ, ତେଲ ଜଳସମ୍ପଦ ବିଭାଗ, ଆର୍ଡ଼ି ଡିଭିଜନ, ଜିଲ୍ଲା ମୂଖ୍ୟ ଚିକିତ୍ସାଳୟକୁ ସଂଯୋଗ କରିବା ସହ ପ୍ରତ୍ୟେକ ଦିନ କଲେଜକୁ ଶହଶହ ଛାତ୍ରଛାତ୍ରୀ ଯିବାଆସିବା କରନ୍ତି । ସମ୍ପ୍ରତି ପ୍ରବଳ ବର୍ଷା ହେତୁ ରାସ୍ତାର ଅନେକ ଅଂଶରେ ଗଭୀର ଖାଲ, ଅସମତଳ ପୃଷ୍ଠ, ଫାଟ ଏବଂ କ୍ଷତିଗ୍ରସ୍ତ ଅଂଶ ସୃଷ୍ଟି ହୋଇଛି, ଯାହା ଫଳରେ ଗାଡ଼ି ଚାଳକ ଏବଂ ପଥଚାରୀଙ୍କ ପାଇଁ ଏହି ରାସ୍ତାରେ ଯିବା ଅତ୍ୟନ୍ତ କଷ୍ଟକର ଏବଂ ବିପଜ୍ଜନକ ହୋଇପଡ଼ିଛି । ଅନେକ ସ୍ଥାନରେ, ବର୍ଷା ପାଣି ଏବଂ ଜମା ହୋଇଥିବା କାଦୁଅ ସ୍ଥିତିକୁ ଆହୁରି ଜଟିଳ କରିଛି ବିଶେଷକରି ସନ୍ଧ୍ୟା ଏବଂ ରାତି ସମୟରେ କ୍ଷତିଗ୍ରସ୍ତ ଅଂଶ ଗୁଡ଼ିକୁ ଚିହ୍ନଟ କରିବା କଷ୍ଟକର ହୋଇପଡ଼ୁଛି । ରୋଗୀ, ବୟସ୍କ ବ୍ୟକ୍ତି, ଭିନ୍ନକ୍ଷମ, ଆମ୍ବୁଲାନ୍ସ ଏବଂ ଜରୁରୀକାଳୀନ ବ୍ୟକ୍ତି ବିଶେଷ ନାହିଁ ନ ଥିବା ଅସୁବିଧାର ସମ୍ମୁଖୀନ ହେଉଛନ୍ତି । ଏଣୁ କ୍ଷୟକ୍ଷତି ଆକଳନ କରିବା ସହ ରାସ୍ତାର ମରାମତି ପାଇଁ ତୁରନ୍ତ ଆବଶ୍ୟକୀୟ ପଦକ୍ଷେପ ଗ୍ରହଣ କରିବା ପାଇଁ ସହରବାସୀଙ୍କ ପକ୍ଷରୁ କିଶୋର ଦାନୀ, ଭାରତ ଭୂଷଣ ଦାସ, ଅମିତ୍ ଦାଶ, ସତ୍ୟଜିତ୍ ସାହୁ ପ୍ରମୁଖ ପୂର୍ତ୍ତ ବିଭାଗ ଯନ୍ତ୍ରୀଙ୍କୁ ଦାବୀପତ୍ର ପ୍ରଦାନ କରିଛନ୍ତି ।