ବଲାଙ୍ଗିର, (କେପିଏନ୍ଏସ୍) : ସାମାଜିକ କାର୍ଯ୍ୟ ହେଉଛି ଏକ ଅଭ୍ୟାସ ଭିତ୍ତିକ ବୃତ୍ତି ଏବଂ ଏକ ଶିକ୍ଷାଗତ ଅନୁଶାସନ ଯାହା ସାମାଜିକ ପରିବର୍ତ୍ତନ ଏବଂ ବିକାଶ, ସାମାଜିକ ଏକତା ଏବଂ ଲୋକଙ୍କ ସଶକ୍ତିକରଣ ଏବଂ ମୁକ୍ତିକୁ ପ୍ରୋତ୍ସାହିତ କରେ । ସାମାଜିକ ନ୍ୟାୟ, ମାନବିକ ଅଧିକାର, ସାମୂହିକ ଦାୟିତ୍ୱ ଏବଂ ବିବିଧତା ପ୍ରତି ସମ୍ମାନର ନୀତିଗୁଡିକ ସାମାଜିକ କାର୍ଯ୍ୟର ମୂଳ ସ୍ଥାନ ଅଟେ । ସହଯୋଗ ଫାଉଣ୍ଡେସନ୍ ସାମାଜିକ କାର୍ଯ୍ୟ, ସାମାଜିକ ବିଜ୍ଞାନ, ମାନବିକତା ଏବଂ ସ୍ୱଦେଶୀ ଜ୍ଞାନର ନୀତି ଉପରେ ଏହାର କାର୍ଯ୍ୟ କରିଥାଏ । ପ୍ରତିଦିନ ଭୀମ ଭୋଇ ସରକାରୀ ଡାକ୍ତରଖାନାକୁ ଶତାଧିକ ରୋଗୀ ଏବଂ ଏହା ସହିତ ପରିବାର ସଦସ୍ୟ ଓ ସମ୍ପର୍କୀୟମାନେ ମଧ୍ୟ ସେମାନଙ୍କ ସହିତ ଆସନ୍ତି । ବଲାଙ୍ଗିରର ଅଗ୍ରଣୀ ସାମାଜିକ ସଂଗଠନ ସହଯୋଗ ଫାଉଣ୍ଡେସନ ଗତ ଏକ ବର୍ଷ ଧରି ପ୍ରତ୍ୟେକ ରବିବାର କ୍ରମାଗତ ଭାବରେ ଅନ୍ନପୂର୍ଣ୍ଣା କାର୍ଯ୍ୟକ୍ରମ ଚଳାଉଛି, ଯେଉଁଥିରେ ଚାଉଳ, ଡାଲମା, ଖଟା, ଦାହିପାଣି, ଆଚାର ଏବଂ ମିଠା ୩୫୦ରୁ ୪୦୦ ଲୋକଙ୍କୁ ଦିଆଯାଉଛି । ଆଜି ଅନ୍ନପୂର୍ଣ୍ଣା କାର୍ଯ୍ୟକ୍ରମର ଏକ ବର୍ଷ ପୂର୍ତ୍ତି ଅବସରରେ ମୁଖ୍ୟ ଅତିଥି ଭାବରେ ବିଶିଷ୍ଟ ଯୁବ ବ୍ୟବସାୟୀ ଶୁବମ୍ ଦର୍ଜୀ ଯୋଗ ଦେଇଥିଲେ । ଶ୍ରୀ ଦର୍ଜୀ କହିଛନ୍ତି ଯେ, ସେ ଜନ କଲ୍ୟାଣ କାର୍ଯ୍ୟ ପାଇଁ ସର୍ବଦା ପ୍ରସ୍ତୁତ ଏବଂ ଅଭାବୀ ଲୋକଙ୍କୁ ଖାଦ୍ୟ ଯୋଗାଇବାଠାରୁ ବଡ଼ ଧର୍ମ ନାହିଁ । ପ୍ରଭାତ ଶ୍ରୀବାସ୍ତବଙ୍କ ନେତୃତ୍ଵରେ ଆୟୋଜିତ ଏହି କାର୍ଯ୍ୟକ୍ରମରେ ଶ୍ରୀକାନ୍ତ ଶର୍ମା, କେଦାର ଅଗ୍ରୱାଲ, ଶ୍ରୀମତୀ ନାନକୀ ଅଗ୍ରୱାଲ, ସୁଦୀପ ତ୍ରିପାଠୀ, ଦୁର୍ଗା ପ୍ରସାଦ ଆଚାର୍ଯ୍ୟ, ରାମ ନାରାୟଣ ଦାଶ, ଦୀପକ ଜୈନ, ପୀୟୁଷ ଅଗ୍ରୱାଲ, ପରେଶ ଅଗ୍ରୱାଲ, ପଞ୍ଚାନନ ପ୍ରଧାନ, ଶ୍ରୀମତୀ ସୁମନ ଶର୍ମା, ତୁଫାନ ପାତ୍ର, ନିରୋଜ ମିଶ୍ର ଏବଂ ଆର୍ତତ୍ରାଣ ପାଢୀ ଉପସ୍ଥିତ ଥିଲେ । ସହଯୋଗ ଫାଉଣ୍ଡେସନର ସମ୍ପାଦିକା ପିଙ୍କି ମୋଦୀ କହିଛନ୍ତି ଯେ, ଅନ୍ନପୂର୍ଣ୍ଣା କାର୍ଯ୍ୟକ୍ରମରେ ଯେତେ ଅଧିକରୁ ଅଧିକ ଲୋକ ଯୋଗ ଦେବେ ସେତେ ଅଧିକ ଆମକୁ ଖୁସି ଲାଗିବ ଏବଂ ସେମାନଙ୍କର ଜନ୍ମଦିନ, ବିବାହ ବାର୍ଷିକ ଉତ୍ସବ କିମ୍ବା କୌଣସି ଖୁସିର ମୁହୂର୍ତ୍ତକୁ ସ୍ମରଣୀୟ କରିବା ପାଇଁ ଅଭାବୀ ଲୋକଙ୍କୁ ଖାଇବାକୁ ଦେଇ ଗୁଣବତ୍ତା ଅର୍ଜନ କରିବା ଉଚିତ ବୋଲି କହିଛନ୍ତି ।