ବଲାଙ୍ଗିର, (କେପିଏନ୍ଏସ୍) : କରୋନା ସଂକ୍ରମଣ ଏବେ ସାରା ରାଜ୍ୟରେ ବିସ୍ଫୋରଣ ମୁହାଁ । ରାଜ୍ୟରେ ଗତ ୨୪ ଘଂଟା ମଧ୍ୟରେ ୧୨ ଶହ ୧୬ ଜଣ କରୋନା ସଂକ୍ରମିତ ହୋଇଥିବା ବେଳେ ହଠାତ୍ ଏଭଳି ସଂକ୍ରମିତଙ୍କ ସଂଖ୍ୟା ବଢ଼ିବା ଜନସାଧାରଣରେ ଆତଙ୍କ ସୃଷ୍ଟି କରିଛି । ବଲାଙ୍ଗିର ଜିଲ୍ଲାରେ ମଧ୍ୟ ଗତ ୨୪ ଘଂଟାରେ ୧୪ ଜଣ ସଂକ୍ରମିତ ହୋଇଥିବା ରାଜ୍ୟ ସୂଚନା ଓ ଲୋକ ସଂପର୍କ ବିଭାଗ ପକ୍ଷରୁ ସୂଚନା ଦିଆଯାଇଛି । ସୂଚନାଯୋଗ୍ୟ ଯେ, ଗତ ୩ ତାରିଖ ଦିନ ଜିଲ୍ଲାରେ ୬ ଜଣ ଓ ୪ ତାରିଖ ଗତକାଲି ୪ ଜଣ ସଂକ୍ରମିତ ହୋଇଥିବା ସରକାରୀ ରିପୋର୍ଟରେ କୁହାଯାଇଥିବା ବେଳେ ଆଜି ଗତ ୨୪ ଘଂଟାରେ ୧୪ ଜଣ ସଂକ୍ରମିତ ଚିହ୍ନଟ ହୋଇଥିବା ସୂଚନା ଦିଆଯାଇଛି । କରୋନା ସଂକ୍ରମଣ ଏଭଳି ବଢ଼ି ଚାଲିଥିବା ସ୍ଥିତିରେ ସମସ୍ତେ ସଜାଗ ହେବା ନିହାତି ଆବଶ୍ୟକ ବୋଲି କୁହାଯାଇଛି । ସମସ୍ତେ ମାସ୍କ ପିନ୍ଧିବା, ବାରମ୍ବାର ସାନିଟାଇଜର୍ ବ୍ୟବହାର କରିବା, ହାତ ସଫା ରଖିବା ଓ ସାମାଜିକ ଦୂରତା ରକ୍ଷା କରି ସରକାରୀ କୋଭିଡ୍ ଗାଇଡ୍ ଲାଇନ୍ ମାନି ଚଳିବା ନିହାତି ଆବଶ୍ୟକ ।