ମୁମ୍ବାଇ : ଶାହାରୁଖ ଖାନଙ୍କ ପୁଅ ଆର୍ୟ୍ୟନ୍ ଆଜି ୨୮ ଦିନ ପରେ ଘରକୁ ଫେରିବାକୁ ଯାଉଛନ୍ତି । ଆଜି ସକାଳ ୫.୩୦ ସମୟରେ ମୁମ୍ବାଇର ଆର୍ଥର ରୋଡ ଜେଲର କର୍ମଚାରୀମାନେ ଜେଲ ବାହାରେ ଥିବା ଜାମିନ ବାକ୍ସରୁ ଜାମିନ ଆଦେଶ ନେଇଛନ୍ତି । ଆର୍ୟ୍ୟନ୍ ବ୍ୟତୀତ ଅନ୍ୟ ଲୋକଙ୍କ ପାଖରେ ମଧ୍ୟ ଏହି ବାକ୍ସରେ ଜାମିନ ଆଦେଶ ରହିଛି । ଜେଲ ପ୍ରଶାସନ ବର୍ତ୍ତମାନ ଏହି ଜାମିନ ଆଦେଶ ଯାଞ୍ଚ କରିବ ଏବଂ କେବଳ ସେତେବେଳେ ଆର୍ୟ୍ୟନଙ୍କୁ ମୁକ୍ତ କରାଯିବ । କୁହାଯାଉଛି ଯେ, ଆର୍ୟ୍ୟନ ସକାଳ ୧୦ ଟା ସୁଦ୍ଧା ମୁକ୍ତ ହୋଇପାରିବେ ।
ସୂଚନାଯୋଗ୍ୟ ଯେ, ଡ୍ରଗ୍ସ ମାମଲାରେ ଅଭିଯୁକ୍ତ ଆର୍ୟ୍ୟନ୍ ଖାନ୍ ଗୁରୁବାର ଦିନ ବମ୍ବେ ହାଇକୋର୍ଟରୁ ଜାମିନ ପାଇଛନ୍ତି, କିନ୍ତୁ ନିୟମାବଳୀ ହେତୁ ଶାହରୁଖ ଏବଂ ଗୌରୀ ଖାନଙ୍କ ପୁଅ ଜେଲ୍ରୁ ମୁକୁଳିବା ସମୟ ଟିକିଏ ଅଧିକ ହୋଇଛି । ଜାମିନ ପରେ ମଧ୍ୟ ଶୁକ୍ରବାର ରାତିରେ ଆର୍ୟ୍ୟନ ଖାନଙ୍କୁ ମୁମ୍ବାଇର ଆର୍ଥର ରୋଡ ଜେଲରେ ବିତାଇବାକୁ ପଡୁଥିଲା, କିନ୍ତୁ ଆଜି ଆର୍ୟ୍ୟନଙ୍କ ମୁକ୍ତି କାଗଜପତ୍ର ଜେଲରେ ପହଞ୍ଚିଛି ଏବଂ ବର୍ତ୍ତମାନ ତାଙ୍କୁ ମୁକ୍ତ କରାଯିବ ବୋଲି ଜଣାପଡ଼ିଛି ।