ରାଉରକେଲା, (କେପିଏନ୍ଏସ୍) : ରାଉରକେଲାର ଟାଙ୍ଗରପାଲି ଥାନା ଅଞ୍ଚଳରେ ଘରେ ପଶି ସୁନା, ରୂପା ଅଳଙ୍କାର ଓ ନଗଦ ଟଙ୍କା ଚୋରି ଘଟଣାରେ ପୁଲିସକୁ ମିଳିଛି ବଡ ସଫଳତା । ଏହି ଘଟଣାରେ ପୁଲିସ ୪ ଜଣ ଅଭିଯୁକ୍ତଙ୍କୁ ଗିରଫ କରିବା ସହ ବହୁ ସୁନା ଓ ରୂପା ଅଳଙ୍କାର ଜବତ କରିଛି । ପୁଲିସର ପ୍ରେସ୍ ନୋଟ୍ ଅନୁଯାୟୀ, ଟାଙ୍ଗରପାଲି ଥାନା କେସ୍ ନମ୍ବର ୧୯୨, ତାରିଖ ୨୪ ସେପ୍ଟେମ୍ବର ୨୦୨୬ରେ ଏହି ମାମଲା ରୁଜୁ ହୋଇଥିଲା । ଫର୍ଟିଲାଇଜର ଟାଉନସିପ୍ର ବି/୨୦୬ ନମ୍ବର କ୍ୱାର୍ଟର୍ସରେ ରହୁଥିବା ସନ୍ତୋଷ କୁମାର ସାହୁ ୨୪ ସେପ୍ଟେମ୍ବର ଦିନ ପ୍ରାୟ ୧୨ଟା ୧୫ ମିନିଟ୍ ସମୟରେ ଟାଙ୍ଗରପାଲି ଥାନାରେ ଲିଖିତ ଅଭିଯୋଗ କରିଥିଲେ । ଅଭିଯୋଗ ଅନୁଯାୟୀ, ୨୩ ସେପ୍ଟେମ୍ବର ଅପରାହ୍ନ ପ୍ରାୟ ୪ଟା ସମୟରେ ସନ୍ତୋଷ କୁମାର ସାହୁ ନିଜ ପରିବାର ସଦସ୍ୟଙ୍କ ସହ ଗଣେଶ ପୂଜା ବିସର୍ଜନ ଶୋଭାଯାତ୍ରାକୁ ଯାଇଥିଲେ । ଘରକୁ ଫେରିବା ପରେ ଘରର ତାଲା ଭଙ୍ଗାଯାଇଥିବା ସେ ଦେଖିଥିଲେ । ଘର ଭିତରେ ଥିବା ସୁନା ଓ ରୂପା ଅଳଙ୍କାର ସହ ୧ ଲକ୍ଷ ୫୦ ହଜାର ଟଙ୍କା ନଗଦ ଚୋରି ହୋଇଥିବା ସେ ଅଭିଯୋଗ କରିଥିଲେ । ଏହି ଅଭିଯୋଗ ପରେ ଟାଙ୍ଗରପାଲି ପୁଲିସ ମାମଲା ରୁଜୁ କରି ତଦନ୍ତ ଆରମ୍ଭ କରିଥିଲା । ତଦନ୍ତ ପରେ ପୁଲିସ ମହମ୍ମଦ ଆରବାଜ୍ (୨୩), ସମଶେର ଖାନ୍ ଓରଫ୍ ଲାଲୁଆ (୨୪), ମନୋଜ କୁମାର ମୁଦୁଲି (୩୬) ଏବଂ ପ୍ରଫୁଲ୍ଲ ଚନ୍ଦ୍ର ସାହୁ (୫୦)ଙ୍କୁ ଗିରଫ କରିଛି । ଗିରଫ ଅଭିଯୁକ୍ତ ମହମ୍ମଦ ଆରବାଜ୍ ପାନପୋଷ କୋଏଲ ବ୍ୟାଙ୍କ ଅଞ୍ଚଳର ମାଲଗୋଦାମ ୱାର୍ଡ ନମ୍ବର ୧୦ର ବାସିନ୍ଦା । ସମଶେର ଖାନ୍ ଓରଫ୍ ଲାଲୁଆ ମାଲଗୋଦାମ ୱାର୍ଡ ନମ୍ବର ୧୪ର ବାସିନ୍ଦା । ମନୋଜ କୁମାର ମୁଦୁଲି ଟାଙ୍ଗରପାଲି ଥାନା ଅନ୍ତର୍ଗତ ଇ-ବ୍ଲକ୍ ମାର୍କେଟ୍ର ମାଉସୀମା ମନ୍ଦିର ନିକଟର ବାସିନ୍ଦା ହୋଇଥିବା ବେଳେ ପ୍ରଫୁଲ୍ଲ ଚନ୍ଦ୍ର ସାହୁ ଛେଣ୍ଡର ପ୍ରଥମ ପର୍ଯ୍ୟାୟ ଇ/୫୨ ଅଞ୍ଚଳର ବାସିନ୍ଦା ବୋଲି ପ୍ରେସ୍ ନୋଟ୍ରେ ଉଲ୍ଲେଖ ରହିଛି । ପୁଲିସ ଅଭିଯୁକ୍ତମାନଙ୍କଠାରୁ ଗୋଟିଏ ଯୋଡ଼ା ସୁନା କାନଫୁଲ, ମଙ୍ଗଳସୂତ୍ରର ୩ଟି ସୁନା ଲକେଟ୍, ୮ଟି ସୁନା ମୁଦି, ଗୋଟିଏ ସୁନା ଚେନ୍, ଗୋଟିଏ ରୂପା ଚେନ୍, ଗୋଟିଏ ରୂପା ବ୍ରେସଲେଟ୍, ୨ଟି ରୂପା ପାଦ ମୁଦି ଏବଂ ୩ ଯୋଡ଼ା ରୂପା ପାଉଁଜି ଜବତ କରିଛି । ପ୍ରେସ୍ ନୋଟ୍ରେ ଆହୁରି ଉଲ୍ଲେଖ ରହିଛି ଯେ, ଅଭିଯୁକ୍ତ ମହମ୍ମଦ ଆରବାଜ୍ଙ୍କ ନାମରେ ପୂର୍ବରୁ ପ୍ଲାଣ୍ଟସାଇଟ୍, ଉଦିତନଗର, ସେକ୍ଟର-୭, ସେକ୍ଟର-୧୫ ଓ ଛେଣ୍ଡ ଥାନାରେ ବିଭିନ୍ନ ମାମଲା ରହିଛି । ସେହିପରି ସମଶେର ଖାନ୍ ଓରଫ୍ ଲାଲୁଆଙ୍କ ନାମରେ ମଧ୍ୟ ଉଦିତନଗର ଓ ପ୍ଲାଣ୍ଟସାଇଟ୍ ଥାନାରେ ପୂର୍ବ ମାମଲା ଥିବା ଉଲ୍ଲେଖ କରାଯାଇଛି । ମନୋଜ କୁମାର ମୁଦୁଲିଙ୍କ ନାମରେ ଲହୁଣୀପଡ଼ା ଥାନାରେ ଏକ ମାମଲା ଥିବା କଥା ମଧ୍ୟ ପ୍ରେସ୍ ନୋଟ୍ରେ ଦର୍ଶାଯାଇଛି । ଏହି ଚୋରି ଘଟଣାରେ ଆଉ କେହି ସମ୍ପୃକ୍ତ ଅଛନ୍ତି କି ନାହିଁ, ତାହା ତଦନ୍ତରୁ ସ୍ପଷ୍ଟ ହେବ । ଟାଙ୍ଗରପାଲି ପୁଲିସର ତଦନ୍ତ ଆଧାରରେ ଏହି ମାମଲାର ପରବର୍ତ୍ତୀ ତଥ୍ୟ ସାମ୍ନାକୁ ଆସିବ ।