ସେଞ୍ଚୁରିଅନ ବିଦ୍ୟାଳୟରେ ଆକାଶ ଏଡ଼ୁକେସନାଲ୍ ସର୍ଭିସେସ୍ ଲିମିଟେଡ଼୍ ଦ୍ୱାରା ପ୍ରାୟୋଜିତ ଆକାଶ ନେସ୍ନାଲ୍ ଟେଲେଣ୍ଟ ହଣ୍ଟ ଏକ୍ଜାମିନେସନ୍ର ୧୬ ବର୍ଷ ପୂର୍ତ୍ତି ଉପଲକ୍ଷେ ବିଶେଷ ସ୍କଲାରସିପ ଯୋଜନାର ପ୍ରାରମ୍ଭ
ବଲାଙ୍ଗିର, (କେପିଏନ୍ଏସ୍) : ଛାତ୍ରର ପୂର୍ଣ୍ଣାଙ୍ଗ ବିକାଶ ନିମନ୍ତେ ଶିକ୍ଷା କ୍ଷେତ୍ରରେ ଛାତ୍ର ମେଧା ବୃତ୍ତିର ଏକ ପ୍ରମୁଖ ଭୂମିକା ରହିଛି । ସେଞ୍ଚୁରିଅନ ବିଦ୍ୟାଳୟର କର୍ତ୍ତୁପକ୍ଷ ଏଇ ଆବଶ୍ୟକତାକୁ ଉପଲବ୍ଧି କରି ବିଦ୍ୟାଳୟ ସହ ଅନୁବନ୍ଧିତ ଆକାଶ ଏଡ଼ୁକେସନାଲ୍ ସର୍ଭିସେସ୍ ଲିମିଟେଡ଼୍ର ଆକାଶ ନେସ୍ନାଲ୍ ଟେଲେଣ୍ଟ ହଣ୍ଟ ଏକ୍ଜାମିନେସନ୍ କାର୍ୟ୍ୟକ୍ରମର ୧୬ ବର୍ଷ ପୂର୍ତ୍ତି ଉପଲକ୍ଷେ ଏକ ବିଶେଷ ସ୍କଲାରସିପର ବ୍ୟବସ୍ଥା କରିଛନ୍ତି । ଏଇ କାର୍ଯ୍ୟକ୍ରମ ପଞ୍ଚମ ଶ୍ରେଣୀରୁ ଦ୍ୱାଦଶ ଶ୍ରେଣୀର ଛାତ୍ରଛାତ୍ରୀଙ୍କ ପାଇଁ ଉଦ୍ଦିଷ୍ଟ । ଏଇ ଯୋଜନାର ଉଦ୍ଦେଶ୍ୟ ହେଲା, ଛାତ୍ରଛାତ୍ରୀଙ୍କୁ ଭବିଷ୍ୟତ ପାଇଁ ପ୍ରସ୍ତୁତ କରିବା, ସେମାନେ ଯେପରି ସମସ୍ୟା ଗୁଡିକର ସମାଧାନ ଅଚିରେ ସମାଧାନ କରି ପାରୁଥିବେ । ଭବିଷ୍ୟତର ସମସ୍ତ ପ୍ରତିବନ୍ଧକକୁ ସହଜରେ ଦୂର କରିପାରିବେ । ଏଇ ମେଧା ବୃତ୍ତି ପାଇଁ ପିଲାଙ୍କୁ ଏକ ପ୍ରତିଯୋଗିତା ମୂଳକ ପରୀକ୍ଷା ଦେବାକୁ ପଡିବ ଯେଉଁଥିରେ ୪୦ ମାର୍କର “ସଠିକ ଉତ୍ତର ବାଛ’ ପ୍ରଶ୍ନ ରହିବ ଓ ଏହାର ମେଧା ବୃତ୍ତି ୨.୫ କୋଟି ପର୍ଯ୍ୟନ୍ତ ହେବ । ଆଜି ବିଦ୍ୟାଳୟ ପରିସରରେ ଏହି କାର୍ଯ୍ୟକ୍ରମଟିର ଆକାଶ ଅନୁଷ୍ଠାନର ମୁଖ୍ୟ ସତ୍ୟଦର୍ଶୀ ବେହେରା ଶୁଭାରମ୍ଭ କରିଥିଲେ । ଉତ୍ସବରେ ଏକାଡେ଼ମିକ ମୁଖ୍ୟ ଶାନ୍ତି ସ୍ୱରୂପ ନାୟକ, ବକ୍ତା ଭାବରେ ସିଦ୍ଧାନ୍ତ ରଞ୍ଜନ ବାଗ ମଧ୍ୟ ଉପସ୍ଥିତ ରହି କାର୍ଯ୍ୟକ୍ରମଟିର ସଫଳ କାମନା କରିଥିଲେ । ଏଥିରେ ଆକାଶ ଅନୁଷ୍ଠାନର ସମସ୍ତ ସଦସ୍ୟ ଉପସ୍ଥିତ ଥିଲେ । ଏହି ଅବସରରେ ସେଞ୍ଚୁରିଅନ ବିଦ୍ୟାଳୟର ଆଞ୍ଚଳିକ ନିର୍ଦେଶକ ଡ.ପ୍ରଦୀପ ଷଡ଼ଙ୍ଗୀ, ଅଧ୍ୟକ୍ଷ ତମାଳ ଚକ୍ରବର୍ତ୍ତି ଓ ଉପାଧ୍ୟକ୍ଷା ଡ.ପୂଣ୍ୟତୋୟା ବିଶ୍ୱାଳ ଉପସ୍ଥିତ ରହି ଛାତ୍ରଛାତ୍ରୀଙ୍କୁ ମାର୍ଗ ଦର୍ଶନ କରିଥିଲେ । ଆକାଶ ଅନୁଷ୍ଠାନର ମୁଖ୍ୟ ବେହେରା ଗଣମାଧ୍ୟମ ପ୍ରତିନିଧିଙ୍କୁ ସମ୍ବୋଧନ କରି ଆକାଶର ଆକାଶ ନେସ୍ନାଲ୍ ଟେଲେଣ୍ଟ ହଣ୍ଟ ଏକ୍ଜାମିନେସନ୍ର ବିଭିନ୍ନ ଗୁଣାତ୍ମକ ଦିଗ ଉପରେ ଆଲୋଚନା କରିଥିଲେ । ସେ କହିଥିଲେ ଯେ, ବିଦ୍ୟାଳୟର ପଞ୍ଚମ ଶ୍ରେଣୀରୁ ଦ୍ଵାଦଶ ଶ୍ରେଣୀର ଛାତ୍ରଛାତ୍ରୀମାନେ ପରୀକ୍ଷା ଦେଇ ପାରିବେ । ଏହାର ମେଧା ବୃତ୍ତି ୧୦୦% ଭାବରେ ୨୫୦ କୋଟି ପର୍ଯ୍ୟନ୍ତ ହୋଇପାରିବ । ବିଦ୍ୟାଳୟର ଛାତ୍ରଛାତ୍ରୀ ମାନେ ପରୀକ୍ଷା ପାଇଁ ଆଜିଠୁ ରେଜିଷ୍ଟ୍ରେସନ କରିପାରିବେ । ବିଦ୍ୟାଳୟର ଏପରି ଅଭିନବ ପ୍ରୟାସ ଛାତ୍ରଛାତ୍ରୀଙ୍କୁ ପ୍ରେରଣା ଯୋଗାଇବା ସହିତ ଭବିଷ୍ୟତର ପ୍ରତିଯୋଗିତା ମୂଳକ ପରୀକ୍ଷା ପାଇଁ ପାରଙ୍ଗମ କରାଇ ପାରିବ । ବାସ୍ତବରେ ଅନୁଷ୍ଠାନର ଏପରି ପ୍ରୟାସ ସ୍ୱାଗତଯୋଗ୍ୟ ।
