ଭୁବନେଶ୍ୱର : ଶୁକ୍ରବାର ବିଳମ୍ବିତ ରାତିରେ ୟୁନିଟ-୩ ସ୍ଥିତ ଏକ ସପିଙ୍ଗ ମଲରେ ଅଗ୍ନିକାଣ୍ଡ ଘଟିଛି । ଏଥିରେ କେହି ମୃତାହତ ହୋଇନାହାନ୍ତି । ଲକ୍ଷାଧିକ ଟଙ୍କାର ପୋଷାକପତ୍ର ଜଳିପୋଡ଼ି ପାଉଁଶ ହୋଇଯାଇଛି । ଅଗ୍ନିଶମ ବାହିନୀର ୨ଟି ଦମକଳ ପ୍ରାୟ ଘଣ୍ଟାଏ ପରିଶ୍ରମ କରିବା ପରେ ନିଆଁକୁ ଆୟତ୍ତ କରିପାରିଛନ୍ତି । ସୂଚନାଯୋଗ୍ୟ ଯେ, ଶୁକ୍ରବାର ରାତି ପ୍ରାୟ ସାଢେ ୧୦ଟାରେ ଶ୍ରୀୟା ଛକ ନିକଟରେ ଥିବା ଅରେଲିଆ ସପିଙ୍ଗ ମଲ୍ର ଦ୍ୱିତୀୟ ମହଲାରୁ ଧୂଆଁ ବାହାରିଥିଲା । ମଲ୍ ବାହାରେ ଜଗିଥିବା ସୁରକ୍ଷାକର୍ମୀ ଏହା ଦେଖି ସଙ୍ଗେ ସଙ୍ଗେ ଅଗ୍ନିଶମ କେନ୍ଦ୍ରକୁ ଖବର ଦେଇଥିଲେ । କଳ୍ପନା ଓ ଲୋକସେବା ଭବନରୁ ୨ଟି ଦମକଳ ଗାଡି କିଛି ସମୟ ଭିତରେ ଘଟଣାସ୍ଥଳରେ ପହଞ୍ଚିଲା । କିନ୍ତୁ ସପିଙ୍ଗ ମଲରେ ତାଲା ପଡ଼ିଥିବାରୁ ଆଗ୍ନିକମାନେ ଭିତରକୁ ପଶି ପାରିନଥିଲେ । ପରେ ୨ଟି ସିଡ଼ି ଯୋଗେ ଅଗ୍ନିଶମ କର୍ମଚାରୀମାନେ ଦ୍ୱିତୀୟ ମହଲାକୁ ଚଢ଼ିଥିଲେ । ବାହାରପଟୁ କାଚ ଓ ଫାଇଭରକୁ ଭାଙ୍ଗି ଭିତରକୁ ପଶିଥିଲେ । ସେତବେଳକୁ ଦ୍ୱିତୀୟ ମହଲାର କିଛି ଅଂଶ ଜଳୁଥିଲା । ଅଗ୍ନିଶମ କର୍ମଚାରୀମାନେ ପାଣି ସ୍ପ୍ରେ କରି ନିଆଁ ଲିଭାଇଥିଲେ । ସର୍ଟ ସର୍କିଟରୁ ନିଆଁ ଲାଗିଥିବା ସନ୍ଦେହ କରାଯାଉଛି ।