ବଲାଙ୍ଗିର, (କେପିଏନ୍ଏସ୍) : ବଲାଙ୍ଗିର ଜିଲ୍ଲା ପୁଇଁତଳା ବ୍ଲକ ଅନ୍ତର୍ଗତ ବିଲେଇସର୍ଡା ମିନି ଷ୍ଟାଡିୟମ ଠାରେ ତୃତୀୟ ବିମଲେଇ ମହୋତ୍ସବ ଉଦ୍ଯାପିତ ହୋଇଯାଇଛି । ମହୋତ୍ସବର ସଭାପତି ଭରତଭୂଷଣ ପ୍ରଧାନଙ୍କ ସଭାପତିତ୍ୱରେ ଅନୁଷ୍ଠିତ ଉଦ୍ଯାପନୀ ସଭାରେ ମୁଖ୍ୟ ଅତିଥିଭାବେ ବିଲେଇସର୍ଡା ସେବା ସମବାୟ ସମିତିର ସଭାପତି ଉମେଶ ପଧାନ ଯୋଗଦେଇ ସର୍ଜନଶୀଳତାରେ ଈର୍ଷା, ମିଥ୍ୟାଚାର ଭଳି ସ୍ୱଭାବ ଓ ଆଚରଣ ସର୍ବାଦୌ ବାଞ୍ଛନୀୟ ଅଟେ ବୋଲି ନିଜ ବକ୍ତବ୍ୟରେ କହିଥିଲେ । ମୁଖ୍ୟବକ୍ତା ଭାବେ ପିପିର୍ଡା ସେବା ସମବାୟ ସମିତିର ସଭାପତି ମନୋରଞ୍ଜନ ତ୍ରିପାଠୀ ଯୋଗଦେଇ ମନରେ ଗଭୀର ବିଶ୍ୱାସ ରଖି ପ୍ରତ୍ୟେକ ବ୍ୟକ୍ତି ଅନୁଶାସିତ ହୋଇ ଧୈର୍ଯ୍ୟ, ସାହସର ସହ ନିଜ ସାଧ୍ୟ ମତେ ଦେଶ ନିର୍ମାଣରେ ଲାଗିପଡିବା ଉଚିତ୍ ବୋଲି କହିଥିଲେ । ସମ୍ମାନୀତ ଅତିଥିଭାବେ ବିଲେଇସର୍ଡା ସରପଞ୍ଚ ତଥା ଆୟୋଜକ ବିମଲେଇ ମହୋତ୍ସବ କମିଟି ସୁଶାନ୍ତ ଛତ୍ରିଆ ମହୋତ୍ସବ ଶାନ୍ତି ଶୃଙ୍ଖଳାର ସହ ଆଯୋଜନ ହୋଇଥିବାରୁ କାର୍ଯ୍ୟକ୍ରମ ସହ ଜଡିତ ଥିବା ପ୍ରତ୍ୟେକ ବ୍ୟକ୍ତି ବିଶେଷଙ୍କୁ ଧନ୍ୟବାଦ ଦେଇଥିଲେ । ସଭାପତି ବଲାଙ୍ଗିର କୃଷକ ମହାସଂଘ ଜତି ପଧାନ ମଂଚାସୀନ ଥିଲେ । ସନ୍ଥ ଦିବ୍ୟଜୀବନ ଗୁରୁକୁଳର ଛାତ୍ରୀମାନଙ୍କ ଦ୍ୱାରା ସ୍ୱାଗତ ନୃତ୍ୟ ପରିବେଷଣ ହୋଇଥିଲା । ଜ୍ୟୋତିପ୍ରକାଶ ସାହୁ କାର୍ଯ୍ୟକ୍ରମର ସଂଯୋଜନା କରିଥିଲେ । ସଭାପରେ କଂସ ଦରବାର ବସିଥିଲା । ଗୋପାଳ ଦାସଙ୍କ ଅଭିନୀତ କଂସ ଦରବାରରେ ସୁଶ୍ରୀ ଶ୍ରଦ୍ଧାମୟୀ ବିଶ୍ୱାଳଙ୍କ ସ୍ୱରଚିତ କବିତାପାଠ, ଜ୍ୟୋତିଧାରା କଳା ପରିଷଦ ବେଲବାହାଲିରର କୁନି କଳାକାରମାନଙ୍କ ଦ୍ୱାରା ଦଳଗତ ନୃତ୍ୟ, ଈଶା ପାତ୍ର, ସ୍ୱପ୍ନା ରଣା, ତୃପ୍ତି ପ୍ରଧାନ, ସୌମ୍ୟାରାଣୀ ଭୋଇଙ୍କ ଏକକ ନୃତ୍ୟ ଦର୍ଶକଙ୍କୁ ମନ୍ତ୍ରମୁଗ୍ଧ କରିଥିଲା । କାର୍ଯ୍ୟକ୍ରମରେ ବିମଲେଇ ମହୋତ୍ସବ କମିଟିର ସମସ୍ତ କର୍ମକର୍ତ୍ତା ସହଯୋଗ କରିଥିଲେ ।