ତୁଷୁରା ବାଳକ ଉଚ୍ଚ ବିଦ୍ୟାଳୟର ବାର୍ଷିକ ଉତ୍ସବ ଅନୁଷ୍ଠିତ

ତୁଷୁରା, (କେପିଏନ୍‌ଏସ୍‌) : ତୁଷୁରା ବାଳକ ଉଚ୍ଚ ବିଦ୍ୟାଳୟର ବାର୍ଷିକ ଉତ୍ସବ ପ୍ରଧାନ ଶିକ୍ଷୟିତ୍ରୀ ଶ୍ରୀମତୀ ଭାନୁମତୀ ଛତ୍ରିଆଙ୍କ ଅଧ୍ୟକ୍ଷତାରେ ଅନୁଷ୍ଠିତ ହୋଇଛି । ଉକ୍ତ କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବରେ ଏନ୍‌ଏ‌ସି ଅଧ୍ୟକ୍ଷ ଅଜୟ କୁମାର ଜୟଶ୍ୱାଲ ଯୋଗ ଦେଇ କୃତି ପ୍ରତିଯୋଗୀମାନଙ୍କୁ ପୁରସ୍କାର ବିତରଣ କରିଥିଲେ । ମୁଖ୍ୟବକ୍ତା ବିଦ୍ୟାଳୟର ପୂର୍ବତନ ପ୍ରଧାନ ଶିକ୍ଷକ ରାମଚନ୍ଦ୍ର ପ୍ରଧାନ, ସମ୍ମାନିତ ଅତିଥି ଭାବରେ ଗୁଡଭେଲା ଗୋଷ୍ଠୀ ଶିକ୍ଷା ଅଧିକାରୀ ରୁଷିଆ ମେହେର, ଟିଟଲାଗଡ ଡିଏଭିର ପୂର୍ବତନ ଅବସରପ୍ରାପ୍ତ ପ୍ରାଧ୍ୟାପକ ଶିବୁ ବେହେରା, ବିଦ୍ୟାଳୟ ଏସ୍‌ଏମ୍‌ଡି‌ସି ସଭାପତି ସୁଧାକର ପ୍ରଧାନ ଯୋଗଦେଇ ନିଜ ଓଜସ୍ୱିନୀ ବକ୍ତବ୍ୟ ମାଧ୍ୟମରେ ଛାତ୍ର ମାନଙ୍କୁ ମାର୍ଗଦର୍ଶନ କରିବା ସହ ପୁରସ୍କୃତ କରିଥିଲେ ଏବଂ ରାଜ୍ୟ ସ୍ତରରେ ସୁନାମ ଆଣିବା ପାଇଁ ପ୍ରୋତ୍ସାହିତ କରିଥିଲେ । ଏହି ଅବସରରେ ବିଦ୍ୟାଳୟର ପୂର୍ବତନ ଅବସରପ୍ରାପ୍ତ କର୍ମଚାରୀ ମାନଙ୍କୁ ସମ୍ବର୍ଦ୍ଧିତ କରିବା ସଙ୍ଗେ ସଙ୍ଗେ ବିଦ୍ୟାଳୟର ସର୍ବାଙ୍ଗୀନ ବିକାଶରେ ସହଯୋଗ କରୁଥିବା ଆଲୁମିନି ସଦସ୍ୟ ନନ୍ଦଲାଲ ଜୟଶ୍ୱାଲ, କମଳ କିଶୋର ଜୈନ, ପିଙ୍କୁ ଅଗ୍ରୱାଲ, ତୁଳସୀ ଜୈନ ଓ ଭକ୍ତ ପ୍ରସାଦ ଜୟଶ୍ୱାଲଙ୍କୁ ଉପଢ଼ୌକନ ଓ ପୁଷ୍ପଗୁଚ୍ଛ ପ୍ରଦାନ କରି ସମ୍ବର୍ଦ୍ଧନା ଜ୍ଞାପନ କରାଯାଇଥିଲା । ପୁନଶ୍ଚ ଛାତ୍ର ମାନଙ୍କୁ ବାର୍ଷିକ କ୍ରୀଡ଼ାର ପୁରସ୍କାର ପ୍ରଦାନ କରାଯାଇଥିଲା । ବିଭିନ୍ନ ସାଂସ୍କୃତିକ କାର୍ଯ୍ୟକ୍ରମ ମାଧ୍ୟମରେ ଛାତ୍ର ମାନେ ସେମାନଙ୍କ ଅନ୍ତର୍ନିହିତ କଳା ପ୍ରଦର୍ଶନ କରିଥିଲେ । ସହକାରୀ ଶିକ୍ଷକ ବାଳକୃଷ୍ଣ ମହାପାତ୍ର ଓ ଜଗଦୀଶ ନାଗ ସଭା ସଞ୍ଚାଳନ କରିଥିଲେ ଏବଂ ରମେଶ ପଣ୍ଡା ବାର୍ଷିକ ବିବରଣୀ ପାଠ କରିଥିଲେ । ଅନ୍ୟାନ୍ୟ ଶିକ୍ଷକ ଯଥା ପ୍ରଭାତ ହରପାଲ, ମନସ୍ଵିନୀ ସ୍ୱାଇଁ, ଭକ୍ତ ବାଗ, ଭୂପେନ୍ଦ୍ର ରଣା କାର୍ଯ୍ୟକ୍ରମର ସଫଳ ରୂପାୟନରେ ସହଯୋଗ କରିଥିଲେ ।