ରାୟଗଡା, (ଅକ୍ଷୟ କୁମାର ପିଡ଼ିସିକା) : ଚନ୍ଦ୍ରଗିରି ଉଚ୍ଚ ପ୍ରାଥମିକ ବିଦ୍ୟାଳୟରେ ଏକ ଅଭାବନୀୟ ଘଟଣା ଦେଖିବାକୁ ମିଳିଛି । କାଲି ମଧ୍ୟାହ୍ନରେ ଉକ୍ତ ବିଦ୍ୟାଳୟର ଚତୁର୍ଥ ଶ୍ରେଣୀ ଛାତ୍ର ନିଜ ବେକରେ ଟାୱାଲ ଯୋଗେ ଆତ୍ମହତ୍ୟା କରିଥିବା ଜଣାପଡିଛି । ହେଲେ ମୃତ୍ୟୁର କାରଣ ଅସ୍ପଷ୍ଟ ହେଇଥିବାବେଳେ ମୃତ୍ୟୁକୁ ନେଇ ପରିବାର ପକ୍ଷରୁ ସନ୍ଦେହ କରୁଥିବା ଅଭିଯୋଗ ହୋଇଛି । ଘଟଣାର ସତ୍ୟସତ୍ୟା ଉନ୍ମୋଚନ ପାଇଁ କାଶୀପୁର ଥାନା ଅଧିକାରୀ, କାଶୀପୁର ତହସିଲଦାର ଓ ଏସ୍ଡିପିଙ୍କ ଉପସ୍ଥିତିରେ କାଶୀପୁର ପୋଲିସ ଅଧିକ ତଦନ୍ତ ଜାରୀ ରଖିଛି । ମୃତ ଛାତ୍ର ଜଣଙ୍କ ହେଲେ କାଶୀପୁର ବ୍ଲକ ଅନ୍ତର୍ଗତ ଖୁରିଗାଁ ଗ୍ରାମର କୁନା ଝୋଡ଼ିଆଙ୍କର ଦ୍ଵିତୀୟ ସନ୍ତାନ ଖଗେଶ୍ୱର ଝୋଡ଼ିଆ (୧୦) ବୋଲି ଜଣାପଡିଛି । ଛୁଟି ଅବଧି ପରେ ରବିବାର ଦିନ କୁନା ଝୋଡ଼ିଆ ଖଗେଶ୍ୱରଙ୍କୁ ଚନ୍ଦ୍ରଗିରି ବିଦ୍ୟାଳୟରେ ଛାଡି ଆସିଥିଲେ । ହେଲେ କୌଣସି କାରଣରୁ ନିଜ ଖଟିଆରେ ଥିବା ମଶାରୀ ଟାଙ୍ଗିବା ଲୁହା ରଡ଼ରେ ଏକ ଟାୱାଲ ଯୋଗେ ବେକରେ ବନ୍ଧା ହେଇଥିବା ଖଗେଶ୍ୱର ଝୋଡ଼ିଆଙ୍କର ମୃତଦେହକୁ ଝୁଲନ୍ତା ଅବସ୍ଥାରେ ଦେଖିବାକୁ ମିଳିଥିଲା । ଘଟଣା ସମ୍ପର୍କରେ ଜାଣିବା ପରେ ବିଦ୍ୟାଳୟ କର୍ତ୍ତୃପକ୍ଷ ସ୍ଥାନୀୟ ପୋଲିସକୁ ଅବଗତ କରାଇଥିଲେ । ଖବର ପାଇ କାଶୀପୁର ଥାନା ଅଧିକାରୀ ସୂର୍ଯ୍ୟ ପ୍ରକାଶ ନାଏକଙ୍କ ସହ ଏକ ଟିମ୍ ଘଟଣାସ୍ଥଳରେ ପହଞ୍ଚି ତଦନ୍ତ ଚଳାଇଥିବା ଜଣାପଡ଼ିଛି । ଏଭଳି ଏକ ଦୁଃଖଦ ଖବର ପୁରା ଅଞ୍ଚଳରେ ଶୋକର ଛାୟା ଖେଳାଇଦେଇଛି ।